Արդյո՞ք Վենգերի խորտակվող նավը կփրկվի. Հենրիխ Մխիթարյանը վաղը կրկին խաղադաշտ դուրս կգա

Լոնդոնի «Արսենալը» Անգլիայի Պրեմիեր լիգայի 29-րդ տուրի շրջանակներում վաղը կհյուրընկալվի «Բրայթոնին»: Այս օրերին «զինագործները» ճգնաժամում են գտնվում: Պարտվում են մեկը մյուսի հետևից, թիմի նորեկներ Օբամեյնագին և Մխիթարյանին էլ չի հոջողվում հաջողություն բերել իրենց նոր թիմին: Վենգերի թիմի ձախորդությունները առիթ են դարձել, որ մամուլը և երկրպագուները սուր քննադատության ենթարկեն թե՛ «Արսենալի» պաշտպաններին և հարձակվողներին և թե՛ գլխավոր մարզիչ Արսեն Վենգերին:

Վերջինս, թերևս, ամենաբարդ իրավիճակում է հայտնվել: «Զինագործների» ֆանատները վիրավորական արտահայտություններ հնչեցնելով նրա հասցեին՝ պահանջում են Վենգերի հրաժարականը: Նրանցից շատերը ցանկանում են, որ Վենգերի փոխարեն «Արսենալը» գլխավորի ֆրանսիացի լեգենդար ֆուտբոլիստ Թիերի Անրին, այն դեպքում, երբ վերջինս էլ արդեն իսկ պատրաստակամություն է հայտնել դառնալ «Արսենալի» մարզիչ:  

Որ «Արսենալը» հեշտ ժամանակներ չի ապրում, այդ մասին Մխիթարյանն ու Օբամեյանգն էլ են օրերս Sky Sports-ին տված բացառիկ հարցազրույցում խոստովանել: Օրինակ Մխիթարյանը նշել է.

«Ակումբի համար հեշտ ժամանակահատված չէ, բայց մենք այստեղ ենք, որ օգնենք թիմին ոտքի կանգնել ու վերադառնալ իր նախկին մակարդակին: Հասկանում եմ, որ հեշտ չի լինելու, բայց մենք կփորձենք, ամեն ինչ կանենք դրա համար: Ինձ շատ է դուր գալիս աշխատել Վենգերի հետ: Նա շատ բան գիտե ֆուտբոլի մասին, կարող է լավ խորհուրդներ տալ: Ուրախ եմ, որ այստեղ եմ: Իհարկե, նրա համար նույնպես հեշտ չէ, բայց մենք պետք է խաղանք ակումբի պատվի ու նրա համար, որովհետև Վենգերն այս ակումբի համար մեծ մարդ է: Պետք է հնարավորինս ամեն ինչ անել ցույց տալու համար, որ պատրաստ ենք պայքարել»:

Իսկ Օբամեյանգն ասել է.

«Ճիշտ է, բարդ ժամանակահատված է, բացի դրանից այս ընթացքում մրցել ենք մեծ ակումբների հետ: Պետք է համախմբվել ու քրտնաջան աշխատել: Հիանալի մարզիչ ունենք, բոլորը դա գիտեն: Պետք է ողջ ուժերս ներդնենք, որ ցույց տանք Վենգերին, որ խաղում ու ամեն ինչ տալիս ենք նրա համար: 

Ամեն հանդիպումից առաջ լրատվամիջոցները գրում են, որ կայանալիք խաղը կարող է ճակատագրական լինել ֆրանսիացի մասնագետի համար: «Արսենալ»-«Բրայթոն» հանդիպումն էլ բացառություն չէ: Բրիտանացի փորձագետները կարծում են, որ վաղվա մրցավեճում Վենգերը լուրջ փոփոխությունների չի գնա, քանի որ կադրերի լուրջ խնդիր ունի: Այսինքն, «Արսենալը» կրկին կպայքարի 4-2-3-1 մարտավարությամբ: Դարպասապահը կլինի Պետեր Չեխը, իսկ պաշտպանությամբ կհոգան Մուստաֆին, Կոսելնին, Բելերինը և Կոլաշինացը: Կիսապաշտպանության կենտրոնում կգործեն Ջական ու Ուիլշերը: Ենթահարձակվողի դիրքում կլինի Օզիլը, աջ եզրում՝ Հենրիխ Մխիթարյանը, իսկ ձախ եզրում էլ հանդես կգա Իվոբին: «Զինագործների» կենտրոնական հարձակվողը Օբամեյանգը կլինի:  

28-րդ տուրից հետո «Բրայթոնը» 31 միավորով գտնվում է 12-րդ հորիզոնականում: Բուքմեյքերները շարունակում են դեռևս հավատալ «Արսենալի» հաղթանակին: Այդ գործակիցը բարձր է՝ 2, ոչ-ոքին գնահատված է 3․6, իսկ «Բրայթոնի» հաղթանակը՝ 3․75 գործակցով:

Հիշեցնենք, որ «Բրայթոն»-«Արսենալ» հանդիպումը կսկսվի Երևանի ժամանակով 17:30-ին: