Հայաստանը ձեռք է բերել ծառի հատման վաղեմությունը որոշող փորձագիտական սարք

Գլխավոր դատախազ Արթուր Դավթյանը երեկ՝ փետրվարի 2-ին, այցելել է ԳԱԱ «Փորձաքննությունների ազգային բյուրո» ՊՈԱԿ: Դատախազության  աշխատակազմի հանրային կապերի բաժնից հայտնում են, որ գլխավոր դատախազը շրջել է Բյուրոյի ստորաբաժանումներում, տեղում հետևել ձեռքբերված նոր սարքավորումների միջոցով իրականացվող փորձաքննությունների ընթացքին, կենտրոնի փորձագետների հետ զրուցել առանձին նեղ ոլորտային ուղղություններով փորձաքննությունների առանձնահատկությունների մասին: Արթուր Դավթյանին հետաքրքրել է դատախազության անմիջական նախաձեռնությամբ բնապահպանության նախարարության կողմից ձեռքբերված և «Փորձաքննությունների ազգային բյուրո»-ին հանձնված՝ ծառի հատման վաղեմությունը որոշող և կոճղի հետ փայտանյութի նույնականացումն ապահովող դենդրոխրոնոլոգիական փորձաքննության սարքի շահագործման արդյունավետությունը:

Բյուրոյի աշխատակիցների և փորձագետների հետ հանդիպման ժամանակ գլխավոր դատախազը նշել է, որ դժվար է գերագնահատել փորձագետների դերակատարումը քրեական գործերով լրիվ, ամբողջական և բազմակողմանի քննության ապահովման, հանցագործությունների բացահայտման վերջնարդյունքում արդարադատության իրականացման տեսանկյունից: Դրան զուգահեռ գլխավոր դատախազը շեշտել է որ շատ դեպքերում հենց փորձաքննությունների արդյունքներն են բեկումնային նշանակություն ունենում քրեական գործերի արդյունքների համար՝ ինչպես դրական, այնպես էլ բացասական իմաստով:

Ողջ քրեական հետապնդման ոլորտն անկարող է ազնիվ, օբյեկտիվ քննություն իրականացնել, եթե փորձագետներն իրենց եզրակացությունները կազմելիս չեն գտնվում բավարար չափով անաչառ և չեն մնում զուտ մասնագիտական գնահատականների սահմաններում: Հնարավոր է ապահովված լինել գերժամանակակից սարքավորումներով, սակայն դրանք որևէ արժեք չունեն, եթե փորձագետն առաջնորդվի բացառապես նեղ անձնական կամ ինչ-ինչ այլ շահերից, գործոններից ելնելով,- ասել է Արթուր Դավթյանը:

Արթուր Դավթյանը կարևորել է նաև փորձագետների մասնագիտական կարողությունների և որակական հատկանիշների շարունակական, համաշխարհային տեխնոլոգիական և մեթոդաբանական տենդենցներին համահունչ զարգացնելու, ինչպես նաև փորձաքննության լիարժեքությունն ու ճշգրտությունն ապահովելուն միտված սարքավորումների ձեռքբերման ուղղությամբ առանձնահատուկ նախաձեռնողականություն ցուցաբերելու անհրաժեշտությունը: 

Գլխավոր դատախաղը կարևորել է նաև կրիմինոլոգիական հետազոտությունների իրականացումը, որն էական նշանակություն կունենա քրեական քաղաքականությունը ճիշտ և նպատակային ուղղությամբ զարգացնելու առումով:

ԳԱԱ «Փորձաքննությունների ազգային բյուրո»-ի  տնօրեն Արգամ Հովսեփյանը տեղեկացրել է, որ աշխատանքներ են իրականացվում համաշխարհային փորձագիտական հեղինակավոր կենտրոնների և կառույցների հետ համագործակցությունն ընդլայնելու, նրանց ներուժը Հայաստանում կիրառելու, արտերկրում կենտրոնի փորձագետների մասնագիտական կարողությունները զարգացնելու, նշանակվող փորձաքննությունների ժամանակակից գիտափորձնական մեթոդների, գիտատեխնիկական միջոցների մշակման, փորձարկման և ներդրման ուղղությամբ: