Ջրամատակարարման ցանցի նորացման ծրագիրն ավարտվում է առանց փողոցների հիմնանորոգման․ Գյումրիի «Անի» թաղամասում միայն երկու փողոց կասֆալտապատվի

«Անի» թաղամասի մի քանի փողոցներում դեռ քանդման աշխատանքներ են, անցած տարվանից սկսված ջրամատակարարման համակարգի նորացումն ավարտել են, բայց մեկ -երկու տեղամասերում կոյուղատար ցանցի նորոգման գործեր են բացվել։ Դրանց ավարտից հետո էլ, բացի երկու փողոցից մնացածում հիմնանորոգումներ այս տարի չեն լինի։ Սա հայտնի դարձավ գարնանը, երբ 58-ի բոլոր բնակիչները բողոքում էին ցեխից, ամռան այս ամիսներին արդեն բողոքի պատճառը փոշին էր ու անանցանելի վիճակը։

ՎԶԵԲ-ի ծրագրով հիմնանորոգումները մեկ տարով էլ կուշանան։ Հիմա ժամանակավոր  հարթեցման ու խճապատման աշխատանքներ են կատարվում՝  ընդամենը փողոցներն անցանելի պահելու համար: Ամբողջ  «Անի»  թաղամասում ընդամենը երկու փողոց է  այս տարվա մեջ ասֆալտապատվելու։ Խոսքը 3 և 11-րդ փողոցների մասին է, որոնք սուբվենցիոն ծրագրում են հայտնվել։ Արդեն աշխատանքներն ընթանում են։

Սուբվենցիոն ծրագրում ընդգրկված Գյումրիի երկու տասնյակ փողոցների և միջփողոցային հատվածների հիմնանորոգման աշխատանքները գրեթե միաժամանակ՝ հուլիսից սկսվեցին: Հայտարարված շինմրցույթներին մասնակցում էին 7 ընկերություններ, բայց առավել ցածր գին էին առաջարկել ու հաղթող էին ճանաչվել 5-ը: Ծրագրում են այն փողոցները, որոնք ավելի քան 30 տարի չեն նորոգվել, ինչի պատճառով խիստ վթարային վիճակում են հայտնվել նաև ներքին ենթակառուցվածքներն ու կոյուղատար համակարգը:

Ծրագրում ընդգրկված մյուս 19 փողոցները քաղաքի տարբեր թաղամասերում են։ Ռասկատլյան փողոցում աշխատանքները հուլիսից են սկսել, փոխել են կոյուղու խողովակաշարերը,  հիմա դիտահորերն են  փոխարինում նորերով։ Հիմնանորոգվող տարածքը  ընդհանուր 9000 քմ է:

Հիմնանորոգվող տարածքն ընդհանուր 9000 քմ է: Աշխատանքները դանդաղում են հիմնականում սեփական տներին կից ինքնակամ բացված դռների ու դարպասների պատճառով, երբեմն ստիպված են լինում նախագծից շեղվել:

«Աշխատանքին ամեն ինչն էլ խանգարում է, բայց աշխատում ենք, որ և՛ բնակիչներին հարմար լինի, և՛ մուտքերը հարմար լինի, և՛ բնակարանների մոտ ջուր չկուտակվի։ Էն, ինչ որ հնարավոր է փոփոխություն կատարել, որը չի վնասի ընդհանուր գործին, կատարում ենք  փոփոխություններն ու շարժվում ենք առաջ»,- նշում է «Ախուրյան կոոպշին» ՍՊԸ փոխտնօրեն Վաչիկ Ղազարյանը։

Փողոցից բացի, բարեկարգվելու և ասֆալտապատվելու են թաղամասի երկու բնակելի շենքերի բակերն ու հարակից տարածքները: Ռասկատլյան փողոցում ջրահեռացման ցանցի կառուցում նախատեսված չէ, անձրևաջրերի հեռացումը կկատարվի ինքնահոս եղանակով:

Բայց սուբվենցիոն ծրագրում ընդգրկված մի քանի փողոցներում կկառուցվեն ջրահեռացման փակ համակարգեր։ Իսկ լուսավորության ցանց կունենան բոլոր 21 փողոցները։ Ռասկատլյանում կտեղադրվեն 17 նոր լուսակետեր:

Հիմնանորոգվող բոլոր փողոցներում աշխատանքների ավարտի ժամկետը նույնն է՝ մինչև դեկտեմբերի 1-ը։ Անցած տարիների նախադեպերն հաշվի առնելով, չի բացառվում, որ մի քանիսը կդառնան փոխանցիկ օբյեկտներ՝ պայմանավորված աշխատուժի ու տեխնիկայի պակասով։