Ձմեռային Օլիմպիադան՝ հարաբերությունների ջերմացման հնարավորություն. ավարտվել են 2018թ. Օլիմպիական խաղերը

«Խաղաղության օլիմպիադա». ահա այսպիսի անվանում են ստացել 23-րդ ձմեռային Օլիմպիական խաղերը, որոնք այս տարի հյուրընկալեց Հարավային Կորեան: Խաղերի փակման արարողությունը տեղի ունեցավ փետրվարի 25-ին:

Փհենչհանում կայացած խաղերի փակման շքեղ արարողության համար առկա էին բոլոր անհրաժեշտ բաղադրիչները՝ կոստյումներ, հրավառություն, պարային և համերգային շոու, որի ավարտին Օլիմպիական դրոշն իջեցվեց և կատարվեց Օլիմպիական հիմնը:

Հաջորդ ձմեռային Օլիմպիական խաղերը կկայանան 2022թ. Պեկինում: Ընդ որում՝ Պեկինը կդառնա առաջին քաղաքը, որը հյուրընկալած կլինի թե՛ ամառային, թե՛ ձմեռային Օլիմպիական խաղերը:

Խաղերը ռեկորդային էին մասնակիցների քանակով: Այս տարի Օլիմպիադայում սառույցի և ձյան վրա մրցեց 92 երկիր ներկայացնող 2920 մարզիկ:

Օլիմպիադայի հաղթող ճանաչվեց Նորվեգիան՝ նվաճելով 14 ոսկե մեդալ, նույնքան արծաթե և 11 բրոնզե մեդալներ: Երկրորդ տեղում էր Գերմանիան, երրորդում՝ Կանադան:

Իսկ Ռուսաստանի հավաքականը մեդալների քանակով գրավեց 13-րդ հորիզոնականը: Ինչպես և խաղերի ընթացքում, փակման արարողության ժամանակ ևս Ռուսաստանի հավաքականը քայլեց չեզոք դրոշի ներքո: Նման որոշման համար հիմք էին հանդիսացել ռուս մարզիկների կողմից հակադոպինգային կանոնների խախտման 2 դեպքերը: Ռուսաստանը դեռ Օլիմպիական խաղերից առաջ էր հայտնվել դոպինգային սկանդալի կենտրոնում: Դեկտեմբերի սկզբին ընդունած որոշմամբ ՄՕԿ-ն արգելել էր ռուս մարզիկներին հանդես գալ Ռուսաստանի դրոշի ներքո:

Այս տարվա ձմեռային Օլիմպիական խաղերը նշանավորվեցին նաև երկու Կորեաների միջև հարաբերությունների ջերմացմամբ:

Միջազգային Օլիմպիական կոմիտեի նախագահ Թոմաս Բախն իր ելույթում հատուկ ուշադրություն հրավիրեց այս փաստին:

«Դուք ցույց տվեցիք, թե ինչպես մեր փխրուն աշխարհում սպորտը կարող է մոտեցնել մարդկանց: Դուք ցույց տվեցիք, թե ինչպես է սպորտը կամուրջներ կառուցում: ՄՕԿ-ը կշարունակի այս օլիմպիական երկխոսությունը նույնիսկ Օլիմպիական կրակը մարելուց հետո»,- իր խոսքում մասնավորապես նշեց Թոմաս Բախը:

«Խաղաղության օլիմպիադան» հնարավորություն է ստեղծել նաև Միացյալ Նահանգների և Հյուսիսային Կորեայի միջև երկխոսության համար: Փհենյանը Միացյալ Նահանգների հետ բանակցելու պատրաստակամություն է հայտնել: Հյուսիսային Կորեայի պատվիրակությունը Հարավային Կորեայի նախագահ Մուն Չժե Ինին հայտնել է, որ երկու Կորեաների միջև երկխոսությունը և Հյուսիային Կորեա-ԱՄՆ հարաբերությունները պետք է միաժամանակ բարելավվեն, սակայն Միացյալ Նահանգները նշել է, որ վերջնական նպատակը պետք է լինի Հյուսիսային Կորեայի միջուկային զինաթափումը:

Խաղերի փակման արարողությանը ներկա է գտնվել ԱՄՆ նախագահ Դոնալդ Թրամփի դուստր և խորհրդական Իվանկա Թրամփը, սակայն նրա և հյուսիսկորեական պատվիրակության միջև բանակցություններ չեն կայացել: