Շիրակի մարզի ջրամբարներում ջրի բավարար պաշար կա, բայց առայժմ պահանջարկ չկա․ տեղումնառատ ամիսները խախտել են ոռոգման սեզոնի մեկնարկը

Շիրակի մարզի առնվազն երեք՝ Կառնուտի, Վարդաքարի և Սառնաղբյուրի ջրամբարներում այս պահին բավարար ջրային պաշար կա կուտակված: 22 միլիոն խմ տարողության Կառնուտի ջրամբարում պատվարի ճաքերի պատճառով հնարավոր է կուտակել մինչև 18 միլիոն խմ պաշար: Ախուրյան գետից այս տարի ջրառը սկսվել է մարտի երկրորդ տասնօրյակից: Ջրամբարն անցած տարի ձմեռացման էր գնացել մոտ 2 միլիոն խմ ջրի պաշարով: Նախատեսվում է Շիրջրանցքով օրական մինչև 200 հազար խմ ջրալրում կատարել մինչ ոռոգման սեզոնի մեկնարկը և կուտակել անհրաժեշտ քանակության ջուր: Նախորդ տարվա համեմատ այժմ ջրամբարում հաջողվել է լցնել 15 միլիոն 200 հազար խմ ջուր:

Կառնուտի ջրամբարն ունի դոտացիոն մուտքեր, իսկ Վարդաքարի ու Սառնաղբյուրի ջրամբարներում հիմնական ջրի ծավալն ապահովում են ավազանների ձնհալքերից ու ընթացիկ տեղումներից: Երկու ջրամբարներում առայժմ բավարար քանակի ջրի ծավալ ապահովել չի հաջողվել:

Արագածի բարձրադիր լեռնային գոտիներում նոր սկսված ձնհալի միջոցով կհասցնեն  Վարդաքարի ու Սառնաղբյուրի ջրամբարներում անհրաժեշտ ջրալրումներ  կատարել: Թեև այս տարի վարուցանքի ուշ մեկնարկով ու տեղումների առատությամբ պայմանավորված գյուղացիական տնտեսություններից ոռոգման ջրի  պահանջարկ դեռ չի ներկայացվել: Այսինքն՝ հիմա էլ ջրամբարներում ջուր կա, բայց սպառող չկա:

«Մինչ օրս մարզի ջրօգտագործողներից հայտեր չենք ստացել, թեկուզ բազմամյա խոտաբույսերի կամ հացահատիկային կուլտուրաների ցանքերը ոռոգելու համար։ Նախորդ տարի էս ժամանակ արդեն բավականին հայտեր ունեինք, բավականին ջուր ունեինք տված ջրօգտագործողներին։ Անցած տարի ունեինք դեֆիցիտ ջրի թե՛ ջրամբարներում, թե՛ գետերում։ Անցած տարի ոռոգման ջրի հետ կապված մեծ պրոբլեմներ էին առաջանում»,- նշում է Շիրակ ՋՕ ընկերության ջրօգտագործման բաժնի պետ  Արթուր Սիմոնյանը։

Ջրի պահանջ հողօգտագործողներն ու ֆերմերները դեռ չեն ներկայացրել, բայց ընկերությունը շարունակում է ջրամատակարարման դիմաց պայմանագրերի կնքման գործընթացը: Այս դեպքում էլ գյուղացիական տնտեսությունները պայմանագրեր կնքել չեն շտապում։ Պայմանագրերի ձևաթղթերում  ու պարտավորությունների դրույթներում նաև կատարվել են որոշակի փոփոխություններ։ Հենց կնքվող պայմանագիրը կհամարվի ընկերության ու գյուղացու միջև իրավական այն փաստաթուղթը, որով էլ նախապես կպլանավորվի ջրամբարներից բաց թողնման ենթակա անհրաժեշտ քանակության ջրի ծավալը:

«Պայմանագրի նոր ձևաթուղթ ենք ստացել կառավարությունից։ Պայմանագիրը կնքելու համար  անհրաժեշտ է տվյալ հողօգտագործողի հողերի կադաստրային կոդերը, որ ձևակերպումը GPS համակարգում ճիշտ կատարվի, հետո այդ պայմանագրի հիման վրա նոր ծրագիրը  կհաշվարկի տվյալ մշակաբույսին անհրաժեշտ ջրի ծավալները, որ մենք կարողանանք  հատուկ պլանավորում անենք տվյալ ջրանցքում կամ համայնքում»,- նշում է Արթուր Սիմոնյանը։

Այս տարի ջրընդունիչ կետերում տեղադրվել են 170 նոր ջրաչափական սարքեր որոնցով կվերահսկեն մատակարարվող ջրի ծավալները։ Բայց հիմա էլ ջրբաժան մասնագետների պակաս ունեն, համայնքներում աշխատողներ չեն կարողանում գտնել: Այս պահին ընկերությունը ունի 20 ջրբաժան մասնագետի կարիք։

Ջուրն առաջնահերթ կհասնի պայմանագիր ունեցող հողօգտագործողների ցանքատարածքներին, իսկ չունեցողները նախորդ տարիների նման, ստիպված սպասելու են իրենց հերթին: Մարզում այս տարի, ըստ մասնագետների, ոռոգման ջրի դեֆիցիտ չի լինի, այս ընթացքում կարգավորվել է նաև ջրանցքից սնվող ՀԷԿ-երին մատակարարվող ջրի ծավալը: