Արվեստի բուհերի որոշ բաժիններում մրցույթներ են սպասվում

Գյումրիի Արվեստների ակադեմիայում դիմորդների թիվը, նախորդ տարվա համեմատ, էական փոփոխություն չի կրել, ինչպես և հատկացված տեղերը։ Մայիսի 10-ից հետո հայտագրումների այդպիսի պատկեր է արվեստի բուհերի Գյումրիի 3 մասնաճյուղերում։ Մրցույթ երեք բուհերի ոչ բոլոր բաժիններում են սպասվում, իսկ որոշ մասնագիտությունների գծով դիմորդներ չունեն։ Արվեստի բուհերը, ի տարբերություն մյուսների, մեկ յուրահատկություն ունեն՝ դիմում են նրանք, ովքեր, գիտելիքից բացի, պետք է ունենան բնատուր ձիրք և տաղանդ։

Երևանի պետական կոնսերվատորիայի Գյումրիի մասնաճյուղի 6 բաժիններում հատկացված 12 անվճար և 33 վճարովի տեղերի համար դիմել է 22 դիմորդ։ Այսպիսի արդյունք կանխատեսում էին, քանի որ դիմորդների մեծ մասը նախապատրաստական բաժնի սովորողներն են։

Կատարողական բաժիններից բացի, մի քանի տարի է՝ բուհում ավելացել է մասնագիտական մանկավարժություն բաժինը, որը նախկինում համարվում էր ՇՊՀ-ի երգ-երաժշտության բաժին։ Մասնագիտական մանկավարժությունում այս տարի էլ դիմորդների պակաս չունեն։ Երգ-երաժշտություն առարկայի ուսուցիչներ են պատրաստում հանրակրթական դպրոցների համար։

«Բնականաբար, նոր ծրագրերին համապատասխան, մեր պատրաստած մասնագետներն ավելի կատարելագործված ու դպրոցական ծրագրերին համահունչ կրթություն են ստանում»,- նշում է ԵՊԿ ԳՄ տնօրենի տեղակալ Անի Ասատրյանը։

Վերջին տարիներին բուհը դիմորդներ չունի երաժշտական արվեստ բաժնում։ Պատճառները, ըստ մասնագետների, երաժշտարվեստի նկատմամբ վերաբերմունքի պակասն է։ Դիմորդների պասիվությունը մտահոգիչ է նաև ազգային նվագարանների բաժիններում, որտեղ հատկացված տեղերը միշտ թափուր են մնում։ Սազը, թառը, քամանչան, շվին, սրինգը կամ տավիղը այս տարի էլ չեն գրավել դիմորդներին։ Տավիղի բաժնի միակ ուսանողուհին անցած տարի է բուհ ընդունվել, իսկ նորագույն այս գործիքը բուհի մասնաճյուղին նվեր է Գերմանիայից։ Նվագարանը կա, բաժինը գործում է, բայց այս տարի դիմորդ չունեն։

Նույն պատկերն է նաև ջութակի և դիրիժորական բաժիններում: Արվեստների ակադեմիայի մյուս մասնաճյուղում՝ Գեղարվեստի ակադեմիայում, դիմում-հայտերի առաջին փուլը հաջող ելք է ունեցել, սահմանված տեղերի քանակը լրացվել է, ինչը, նախորդ տարվա համեմատ, լավագույն ցուցանիշ է համարվում։

«2020 թ․-ին ունեցել ենք 31 դիմում, 2021-ին՝ 34, իսկ այս տարի միայն առաջին փուլով՝ 45 դիմորդ։ Նույնիսկ բաժիններ ունենք, որ մրցույթներ են լինելու, իսկ սա վերջին 10 տարվա լավագույն ցուցանիշն է մեզ համար»,- նշում է ՀԳՊԱ Գյումրիի մասնաճյուղի տնօրեն Վահագն Ղուկասյանը։

Մրցակցություն է սպասվում «Կերպարվեստ» մասնագիտության տարբեր բաժիններում։ Բուհի համար գնալով թրենդային են դառնում նաև հագուստի մոդելավորման, դիզայնի և գրաֆիկայի  բաժինները, պահանջված մասնագիտություններ են դարձել՝ շուկայի թելադրանքով։

Դեկորատիվ կիրառական արվեստը ևս չի զիջում մոդելավորմանը։ Այս բաժնում են համատեղվում դարբնագործությունն ու գունավոր մետաղի մշակումը։ Հետաքրքիր է նաև այն, որ այս ուղղությամբ սկսել են զբաղվել նաև աղջիկները։ Ամեն դեպքում, Գեղարվեստի ակադեմիայում ևս թափուր տեղերով մասնագիտություն ունեն։ Դիմում-հայտեր չեն ստացել «Արվեստի պատմություն և տեսություն» բաժնում։ Արվեստաբանությունն արդեն երկրորդ տարին է՝ ոչ մեկին չի հետաքրքրում։

«Այսօրվա երիտասարդությունը գնում է այնպիսի մասնագիտությունների, որտեղ կիրառելով իր գիտելիքները, կկարողանա գումար վաստակել։ Այս առումով արվեստաբանությունն այն մասնագիտությունն է, որտեղ շատ դժվար է գիտելիքների շնորհիվ օրվա ապրուստի հարցը լուծել»,- ասում է Վահագն Ղուկասյանը։

Երևանի թատրոնի և կինոյի պետական ինստիտուտի Գյումրիի մասնաճյուղում ստացված դիմում-հայտերի արդյունքներից դեռ տվյալներ չունեն, ամփոփումը մայր բուհում է տեղի ունենում։ Գյումրիի մասնաճյուղը նախորդ տարիներից է հայտնի, որ դերասանական բաժնում գրեթե միշտ դիմորդների համալրման խնդիր չի ունեցել։

Ընդհանուր առմամբ, թատրոնի և կինոյի պետական ինստիտուտում դիմորդներ չունեն «Թատերագիտություն» մասնագիտությունում։ Արվեստի բուհերի դիմորդները հանձնում են ներբուհական քննություններ։