Դարպասապահ Ռոման Բերեզովսկու անվան մանկապատանեկան ֆուտբոլի մրցաշարի մեկնարկը տրվել է Գյումրիից

Այսօր Գյումրիում մեկնարկել է լեգենդար դարպասապահ Ռոման Բերեզովսկու անվան դպրոցականների ֆուտբոլի փորձնական մրցաշարը։ Այն անցկացվում է «Ռոսսոտրուդնիչեստվո» կազմակերպության հայաստանյան ներկայացուցչության հովանու ներքո՝ աջակցությամբ Հայաստանի ֆուտբոլի ֆեդերացիայի և ԿԳՄՍ նախարարության։ Մրցումներին մասնակցում էին չորս թիմեր՝ երեքը Գյումրիից, մեկը՝ Վանաձորից։ Պատանի ֆուտբոլիստների համար լավագույն հնարավորություններից մեկն է ստեղծվել բակայինից  դեպի մեծ ու պրոֆեսիոնալ ֆուտբոլ տեղափոխվելու համար։

Մրցապայքարում Գյումրիի թիվ 19  ռուսական և թիվ 23 միջնակարգ դպրոցների  ֆուտբոլային թիմերն են։ Նրանց խաղով տրվեց անվանի դարպասապահ Ռոման Բերեզովսկու անվան մրցաշարի մեկնարկը։

Ֆուտբոլային մրցաշար անցկացնելու նպատակը  նոր ու տաղանդավոր պատանի ֆուտբոլիստների բացահայտումն է։ Ըստ նախագծի հեղինակների՝ հանրապետության ամենահեռավոր գյուղերում կան շատ տաղանդավոր տղաներ, որոնք դեռ մանկուց զբաղվում են  սիրողական ու բակային ֆուտբոլով, նրանց պետք է հայտնաբերել ու պատրաստել  սերնդափոխության։

«Սա ոնց որ պիլոտային ծրագիր լինի, և ինչ նպատակ ունենք, որ երեխաները փողոցից կտրվեն, զբաղվեն սպորտով, որովհետև ֆուտբոլը այնպիսի մարզաձև է, որ կարողանում է հավաքի տարբեր ներկայացուցիչների տարբեր հնարավորություն ունեցող երեխաների, որ իրենք սկսեն պարապելու ժամանակ նաև իրար հետ շփվել, ընկերություն ու բարեկամություն անեն»,- SHANTNEWS.am-ի հետ զրույցում նշել է հայտնի մարզիկի եղբայրը՝ «Բարության ուղի» ՀԿ ղեկավար Ալեքսանդր Բերեզովսկին։

Բակային ֆուտբոլից է սկսել իր կարիերան Հայաստանի ազգային հավաքականի  լեգենդար  դարպասապահ Ռոման Բերեզովսկին։ 20 տարի պաշտպանելով հավաքականի դարպասը, բազմաթիվ հաղթական պահեր է պարգևել ֆուտբոլասերներին։ Իր համար ևս ուրախալի է, որ մրցաշարի մեկնարկը տրվում է սպորտային քաղաքից։

«Գիտեք, Գյումրին միշտ  Հայաստանին շատ սպորտսմեններ է տվել, ուժեղ սպորտսմեններ է ունեցել, բացի դրանից՝  մարդկային առումով շատ հումորով մարդիկ են։ Ինձ թվում է՝ շատ լավ է, որ հենց այստեղից է սկսվում մրցաշարը»,- SHANTNEWS.am-ի հետ զրույցում նշել է լեգենդար դարպասապահ Ռոման Բերեզովսկին։

Ռոման Բերեզովսկին թեև հիմա ակտիվ ֆուտբոլով չի զբաղվում, բայց ուշադրությամբ հետևում է հայկական ֆուտբոլային թիմերի խաղերին, նկատում խոստումնալից, պատանի ու երիտասարդ ֆուտբոլիստների, որոնք արժանի են համալրելու ազգային ու մյուս հավաքականների կազմերը։

«Որ մենք ունենք  ապագա, դա հարյուր տոկոս է, մի քիչ ժամանակի հարց է, որովհետև նոր է գալիս մեր ավելի պրոֆեսիոնալ ֆուտբոլային ջահելությունը»- վստահեցնում է Ռոման Բերեզովսկին։

Շիրակի մարզում ևս կա այդ պոտենցիալը։ Հայաստանի  Ֆուտբոլի ֆեդերացիան արդեն մի քանի տարի է՝ հեռավոր գյուղերում հիմնում է մինի ֆուտբոլի դաշտեր ու փորձում զարգացնել մանկապատանեկան ֆուտբոլը՝ ստեղծելով աշակերտական թիմեր, անցկացնելով միջհամայնքային մրցաշարեր։

Հաջորդ տարի Ռոման Բերեզովսկո անվան  մրցաշարին կմասնակցեն նաև մարզի գյուղական համայնքների պատանեկան ֆուտբոլային թիմերը, մրցաշարը կանցկացվի նաև Տավուշի, Սյունիքի  մարզերում։

Մրցաշարի հաղթող թիմը կորոշվի հանրապետական փուլի արդյունքներով։ Լավագույնները կպարգևատրվեն գավաթներով ու մեդալներով, իսկ առավել աչքի ընկած տաղանդավոր պատանիները հնարավորություն կստանան ընդգրկվելու հայկական առաջատար ֆուտբոլային թիմերի կազմերում։