Քիչ դիմորդներ, կրճատված մասնագիտություններ․ Գյումրիի բուհերում դիմորդների քանակը նվազում է 

Բուհերում ընդունելության քննությունների պատրասվող դիմումատուների հետ արդեն երկրորդ տարին է փաստաթղթերն ընդունող հանձնաժողովները անմիջական շփումներ չունեն։ Բուհի ու մասնագիտության ընտրությունն առցանց է։

Իսկ նախկինում կողմնորոշվել, մասնագիտության հայտ լրացնել լինում էր նաև տվյալ բուհական հաստատությունում։ Առցանց դիմում գրելու թերի կողմերն ու տեխնիկական խնդիրներները ևս չեն բացառվում, ընդունող հանձնաժողովների պատասխանատուներն էլ այն կարծիքին են, որ կենդանի շփումն այնուամենայնիվ ընդունելի մոտեցում է, ի վերջո ,անճշտության դեպքում դիմորդը դարձյալ հասնում է բուհ՝ հայտում շտկումներ անելու համար: Տեխնիկական խնդիրներից առավել բուհերի համար մտահոգիչ է քիչ դիմելիությունը և դրա հետևանք որոշ բաժինների փակվելը։

Շիրակի պետական համալսարանում վերջին տարիներին չեն համալրվում բնագիտական ֆակուլտետի բաժինները: Այս տարի ավելացել են հոգեբանություն, թարգմանչական գործ, տարրական մանկավարժություն մասնագիտություններով հայտերը:

«Տարիների փորձը ցույց է տալիս, որ բնագիտականում կաղում ենք։ Այս տարի օրինակ, մաթեմատիկա առարկայից 0 դիմում ունենք, անցյալ տարի միջմշակութային մասնագիտությամբ ունեցել ենք 1 դիմորդ, ու դիմորդն ընդունվել է, կեսից հրաժարվել է ուսումնառությունը շարունակել»,- ShantNews.am-ի հետ զրույցում նշել է Շիրակի պետական համալսարանի ընդունելության հանձնաժողովի պատասխանատու Գևորգ Ասատրյանը։

Պահանջվածների շարքում շարունակում են շահեկան մնալ տեղեկատվական տեխնոլոգիաների և տնտեսագիտական ոլորտների մասնագիտությունների դիրքերը։ Ֆինանսներ և կառավարում, այս տարի նաև մարքեթինգ բաժիններով հետաքրքրվողներն են ակտիվացել Հայաստանի տնտեսագիտական համալսարանի Գյումրիի մասնաճյուղում։

Այս մասնագիտություններով դիմորդների թվի ավելացմանը զուգահեռ բուհը գնացել է տեղերի կրճատման։ Տնօրենի ասելով՝ սա արվել է, որ բարձր միավորներով դիմորդը կարողանա համալրել այդ բաժիններում սովորողների շարքերը։

«Մենք 15-ական տեղ կրճատել ենք ֆինանսներ և կառավարում բաժնից նրա համար, որ ՀՊՏՀ-ի Գյումրի մասնաճյուղ ընդունվեն բարձր առաջադիմությամբ ուսանողները»,- նշում է ՀՊՏՀ-ի Գյումրիի մասնաճյուղի տնօրեն Կարեն Պետրոսյանը։

Դիմորդը մասնագիտություն է ընտրում հետագայում աշխատանք, ավելի ճիշտ բարձր վարձատրվող աշխատանք ունենալու հեռանկարով, իսկ մի շարք մասնագիտություններ, որոնց պահանջմունքը մշտական է սերնդափոխության չի ենթարկվում։

Հայաստանի պոլիտեխնիկական համալսարանի Գյումրիի մասնաճյուղում վերանայում կամ փոխարինում են կատարել՝ որոշ մասնագիտությունների գծով դիմորդներ չլինելու պատճառով: Բուհում դիմելիությամբ առաջատարներից է տեղեկատվական տեխնոլոգիաների ոլորտը։

«Շինարարություն և տնտեսագիտություն  մասնագիտությամբ  բավականին քիչ դիմորդներ են հավաքագրվում ընդ որում վերջին մասնագիտությունը մենք ռոտացիայի ենք ենթարկում․ամեն տարի ամենաքիչ ուսանող հավաքած մասնագիտությանը փոխարինում ենք մեկ այլ մասնագիտությամբ եթե անցյալ տարի  մեխանիկական ուղղությամբ էր այս տարի մտցրեցինք շինարարությունը »,- նշում է Հայաստանի պոլիտեխնիկական համալսարանի Գյումրիի մասնաճյուղի ընդունելության հանձնաժողովի պատասխանատու Հարություն Պեպելյանը։

Վերջին տասնամյակում Գյումրիի բուհերում սովորական գործընթաց է դարձել ընդունելության քննություններից առաջ այնպիսի մասնագիտությունների նախապատվությունը տալ, որոնք թելադրում է աշխատաշուկան։ Թեև բաժիններ փակելու կամ նորերը բացելու պարագայում էլ, նախորդ տարիների համեմատությամբ, դիմորդների հայտերի քանակի առումով էական փոփոխություն չեն տեսնում։

Ընդունելության քննությունների առաջին փուլին այս տարի էլ դիմորդները կմասնակցեն մեկ՝ բուհ, մեկ՝ մասնագիտություն սկզբունքով, իսկ երկրորդ փուլում արդեն բուհի և մասնագիտության ընտրության շրջանակը ընդլայնվում է։

«Այն դիմորդները, որոնք ունեն դրական գնահատական և մրցույթից դուրս են մնացել, նրանք կարող են երկրորդ փուլով դիմել և ընտրել արդեն 6 մասնագիտություն՝ 6 տարբեր բուհերում»,- նշում է ՇՊՀ ընդունելության հանձնաժողովի պատասխանատու Գևորգ Ասատրյանը։

2023 թվականից դիմորդները նաև հնարավորություն կունենան երկու անգամ մասնակցել միասնական քննությունների, առաջինը տեղի կունենա հունվարին, երկրորդը՝ ավանդաբար հունիս-հուլիսին։ Փոփոխության արդյունքում՝ դիմորդների ինչ քանակ հնարավոր է լրացնել, Գյումրիի բուհերում էական տեղաշարժ չեն ակնկալում։ Ամեն տարի նույն պատկերն են արձանագրում, բարձր առաջադիմությամբ շրջանավարտները դիմում են երևանյան, վերջին տարիներին նաև արտերկրի բուհեր։