Գյումրիի հիվանդանոցներում ավելացել են վիրուսային հիվանդություններով երեխաների հոսպիտալացումները

Սեզոնին բնորոշ վիրուսային սրացումներ են նկատվում, որոնց նկատմամբ առավել խոցելի են մանկահասակ երեխաները։ Վերջին մեկ շաբաթում հոսպիտալացումների թիվն է ավելացել է։ Մանկաբույժներն ու վարակաբանները կապում են եղանակային փոփոխությունների հետ և համարում տարվա այս շրջանին բնորոշ վիճակ։ Գանգատներն ու արտահայտված ախտանշանները գրեթե նման են նախորդ վիրուսային հիվանդություններին, բայց վիրուսի անունն ու տեսակն է փոխված։

Գյումրիի Մոր ու մանկան ավստրիական հիվանդանոց վերջին 10 օրում ստացիոնար բուժման տեղափոխված երեխաների քանակն ավելացել է։ Հոսպիտալացվածներից մեծ մասի մոտ օբստրուկտիվ բրոնխիտին բնորոշ ախտանշաններ են նկատվում, իսկ երբեմն առաջանում են պարբերական փսխումներ։

«Վիրուսային ծագման են 2-ն էլ, օբստրուկտիվ բրոնխիտով երեխաները հիմնականում գալիս են խզզոցով, թթվածին կախյալ վիճակում, իսկ մյուս գանգատներով դիմելիությունը փսխումներով է, ունենում են բարձր ջերմություն, որն էլի վիրուսային է, այս պահին շրջանառվում է ադենովիրուսը»,- նշում է Գյումրիի Մոր ու մանկան ավստրիական հիվանդանոցի մանկական բաժանմունքի պատասխանատու Հասմիկ Խաչատրյանը։

Սեզոնային համարվող վիրուսի այս տեսակը թեև հիվանդի վիճակը շատ չի ծանրացնում, բայց ագրեսիվ ընթացք ունի և, ըստ մասնագետների, բուժումն ուշացնելու դեպքում հնարավոր է բարդություններ առաջանան։ Երեխայի մոտ առանց հիվանդության նախանշանների, օրինակ՝ առանց ջերմության ու սրտխառնոցի կարող են հաճախ կրկնվող փսխումներ լինեն, որից կարճ ժամանակ անց առաջ են գալիս թուլություն և քնկոտություն։

«Դա բացատրվում է նրանով, որ ջրազրկում է շատ արագ առաջանում, որովհետև փսխումներն անզուսպ բնույթի են, երեխաները շատ արագ ջրազրկվում են, բայց ինչքան արագ ջրազրկվում են, նույնքան արագ էլ 1-2 օրվա ընթացքում վերականգնվում են»,- նշում է մանկաբույժը։

Փետրվար-մարտ ամիսներին վիրուսային հիվանդությունների համեմատաբար հանգիստ շրջանն է եղել, մանկական հիվանդանոցում հոսպիտալացվածների թիվն էլ էականորեն կրճատվել է, իսկ հիմա 30 մահճակալներն էլ զբաղված են, դուրս գրվող երեխաներին արագ փոխարինում են նոր հիվանդները։ Հետազոտված բոլոր երեխաների մոտ սեզոնին բնորոշ նույն վիրուսային վարակն է հայտնաբերվում։ Օդակաթիլային ճանապարհով փոխանցվող վիրուսը վարակում է նաև մեծահասակներին։

«Գյումրի» ԲԿ ինֆեկցիոն բաժանմունքում նույն ախտանիշներով մեծահասակներ են հոսպիտալացվել,  ընտանիքներում մեկը մյուսից վարակվել է, թեև, ի տարբերություն երեխաների, բուժումն ավելի արագ ազդեցություն է ունեցել և դուրս են գրվել։ Երեխաների մոտ, ըստ վարակաբանի, վիրուսային վարակն այլ ընթացքով է արտահայտվում։ Բարձր ջերմության ֆոնին սկսվում է նաև մաշկի ցանավորում։

«Ցանավորումը վիրուսային բնույթի է լինում։ Հայտնաբերվածը պարվավիրուսային ինֆեկցիա է՝ ուղեկցվող ստամոքսաաղիքային խանգարումներով, սա նշանակում է, որ առկա է սուր աղիքային վիրուսային վարակ»,- նշում է «Գյումրի» ԲԿ ինֆեկցիոն բաժանմունքի վարիչ Կարինե Տոնոյանը։

Վիրուսային վարակների պարբերական սրացումները տարեկան մի քանի անգամ են լինում, որը, սակայն, մասնագետները բռնկում չեն համարում։ Այս պահին նաև հանգիստ վիճակ է Քովիդ հիվանդացության առումով։ Իսկ վերջին մեկ ամսում կասկածելի դեպքերի թեստավորումից հետո Քովիդ-դրական պատասխաններ չեն ստացվել: