Ստեղծել հարմար միջավայր հատուկ կարիքներ ունեցող անձանց համար․ «Ես կարող եմ» կարգախոսով աշխատանքի տոնավաճառ Գյումրիում

Ամեն տարի անցկացվող աշխատանքի տոնավաճառները հնարավորություններից կամ հարթակներից մեկն է, որտեղ աշխատանք փնտրող քաղաքացիներն ու գործ առաջարկող կազմակերպությունները հանդիպում են։ Թերևս ակտիվ մասնակցությունը որոշակի ցուցանիշ է գործազրկության։

«Հայկական կարիտաս»-ի նախաձեռնած միջոցառման կարևորությունը հատուկ կարիքներ ունեցող անձանց ներուժի բացահայտումն էր, թե ինչքանով է հնարավոր տեղաշարժման և այլ խնդիրներ ունեցող անձանց ներգրավել աշխատաշուկայում, նրանց համար ստեղծել աշխատանքի ներառական միջավայր։

Աշխատանքի այս տոնավաճառը նախորդներից տարբերվող էր, իսկ ընտրված կարգախոսը՝ «Ես կարող եմ», խոսում էր այն մասին, որ սա ևս մեկ հնարավորություն էր բացահայտել հատուկ կարիքներ ունեցող անձանց ներուժը և այն օգտագործել տնտեսության ոլորտներում։ Տոնավաճառին ներկայացած գործատուները շահագրգռված են հատուկ կարիքներով անձանց իրենց կազմակերպությունում աշխատանքի ընդունելու։ Այս պարագայում որոշակի առավելություններ է սահմանվում նաև գործատուի համար։

«Որ համեմատում եմ նախորդ տարիներին ունեցած մեր փորձառնությունը, հիմա բավական շատ տենդենց կա գործատուների կողմից հատուկ կարիքներ ունեցողներին վերցնել աշխատանքի»,- նշում է «Հայկական կարիտաս»-ի ծրագրի ղեկավար Սիրանույշ Մինասյանը։

Հատուկ կարիքներով անձանց համար կազմակերպված այս տոնավաճառը, ամեն դեպքում, բաց հնարավորություն էր ստեղծել նաև այն քաղաքացիների համար, որոնք աշխատանք են փնտրում։ Տոնավաճառը հատուկ կարիքներ ունեցող անձանց ուղղվածության էր, բայց առաջարկվող աշխատանքները հատուկ թիրախավորված չէին:

«Ծրագրի նպատակներից է հարթակ ստեղծել, որ հաշմանդամություն ունեցողը հանդիպի գործատուի հետ, և ներառականության գաղափարը հաշվի առնելով, մենք միայն չենք ընդգրկել հաշմանդամություն ունեցողներին։ Տոնավաճառին մասնակցում են նաև շատ ուսանողներ»,- նշել է Սիրանույշ Մինասյանը։

Տեղեկատվական տեխնոլոգիաների ոլորտից մինչև խոհարարներ, դերձակներ, բանվորներ, վարորդներ։ Սրանք այն հիմնական մասնագիտություններն են, որոնց համար գործատուները ներկայացրել էին աշխատանքի առաջարկներ։

Արման Խաչատրյանը 44-օրյա պատերազմի մասնակից է, բեկորային վիրավորում է ստացել, տեղաշարժվում է հենակների միջոցով: Իրավաբանի կրթությունը կիսատ է թողել զինծառայության անցնելու պատճառով։ Հիմա հարմար աշխատանք է փնտրում։

«Մի քանի տաղավար շրջեցի․․․ Ուզում եմ տեսնել՝ ինչ հարմար աշխատանք կա, որ զբաղվեմ, տանը չնստեմ»,- ասում է Արմանը։

Արթուր Գալստյանին Գյումրիում հավանաբար շատերն են ճանաչում։ Այն սկզբունքային անձանցից մեկն է, որը կարողացել է իր ներուժն ու հնարավորությունները օգտագործել։ Երկու տարի է՝ աշխատում է։ Իր համար էլ դժվար է եղել աշխատանք գտնելու ճանապարհը ու հենց հենաշարժողական խնդիրների պատճառով։

«Հայաստանում կարծրատիպային մտածելակերպ կա, որ գործ չկա, աշխատանքի չեն վերցնում, բայց չեն մտածում, որ նախ պետք է համապատասխան գիտելիք ունենալ, եթե դու առաջին քայլն անում ես այդ պահից սկսած, քո դեմ դռներ են բացվում, եթե իհարկե, դու բախում ես այդ դռները»,- ասում է Արթուր Գալստյանը։

Արթուրն անիմատորի աշխատանքին զուգահեռ նաև ներառական կրթության դասընթացներ է վարում և իր փորձն ու օրինակն է փոխանցում մյուսներին: Վստահ է, որ համապատասխան գիտելիք ունենալու պարագայում հատուկ կարիքներով անձանց համար էլ կստեղծվի աշխատանքային միջավայր։

Աշխատանքի տոնավաճառին 32 գործատու էր ներկայացել թափուր աշխատատեղերով, Գյումրիում 9000-ից ավելի գործազուրկներից 264-ը հատուկ կարիքներ ունեցող անձինք են: