Վանաձոր-Ալավերդի ճանապարհի հիմնանորոգման աշխատանքները շարունակվում են

Շարունակվում են Վանաձոր-Ալավերդի միջպետական (Մ-6) ճանապարհի հիմնանորոգման և վերակառուցման աշխատանքները: Տրանսպորտի, կապի և տեղեկատվական տեխնոլոգիաների նախարարությունից հայտնում են, որ աշխատանքների տեմպերն արագացնելու նպատակով ճանապարհը բաժանվել է 3 տեղամասերի, որոնցում տարբեր կազմակերպություններ աշխատում են միաժամանակ։

Առաջին տեղամասում ընթանում են ճանապարհի լայնացման, հենապատերի կառուցման, անվտանգության տարրերի տեղադրման աշխատանքներ։ Մի շարք հատվածներում ասֆալտբետոնե պատվածքի ներքին շերտն արդեն տեղադրվել է։ Վանաձոր քաղաքը սնուցող 1020մմ տրամագծով  խմելու ջրագծի տեղափոխման աշխատանքները ևս մոտենում են ավարտին: 

Ճանապարհի առավել վտանգավոր ոլորապտույտներից մեկում ավարտվել է հենապատի կառուցումը։ Այստեղ կատարվել է ճանապարհահատվածի հորիզոնական ծրագծի  փոփոխություն, որի արդյունքում մեղմվել է ճանապարհի երկայնական թեքությունը: Հողային պաստառի կայունությունն ապահովելու նպատակով կառուցվել է երկաթբետոնե ստորին հենապատ։ Արդյունքում մեծացել է տեսանելիության աստիճանը՝ առավել անվտանգ դարձնելով կտրուկ շրջադարձը։ Նման հենապատեր են կառուցվում նաև այն տեղերում, որտեղ գետը վարարելու դեպքում ճանապարհը ողողելու վտանգ կարող է առաջացնել։ Հարակից հատվածով անցնող երկաթգծի հողային պաստառի հնարավոր փլուզումները կանխելու նպատակով էլ այս տեղամասում կառուցվել են միաձույլ բետոնե և խամքար բետոնե հենապատեր։ Հողային պաստառի վերակառուցման նպատակով իրականացվել են հողային աշխատանքներ, հենապատերի վերանորոգման և կառուցման, ջրահեռացման համակարգի վերականգնման, մայթերի կառուցման, գաբիոնային շարվածքով հենապատերի կառուցման,  գոյություն ունեցող ջրագծերի տեղափոխման և վերակառուցման, և ասֆալտապատման աշխատանքներ: Ճանապարհի ամբողջ երկարությամբ կատարվել է ուսումնասիրություն և վտանգ ներկայացնող  բոլոր տեղամասերում տեղադրվել են բետոնե պարապետներ և արգելապատնեշներ։ Շարունակվում են նաև թունելների և կամուրջների վերակառուցման աշխատանքները:  106մ երկարությամբ  թունելում արդեն ավարտվել է մուտքի երեսապատումն ու մայթերի կառուցումը։ Ընթացքի մեջ են ներքին հարդարման աշխատանքները։

Հաջորդ տեղամասում, որը 280մ երկարությամբ թունելում է, մուտքի անվտանգությունն ապահովելու նպատակով  կատարվում է գալերիայի կառուցում։ Սա նշանակում է, որ թունելի հիմնական երկարությունը կավելացվի ևս 25մ-ով, ինչը կկանխի հնարավոր քարաթափումների վտանգը։ 

Երրորդ տեղամասը ևս թունել է՝ 181մ երկարությամբ: Թունելի մուտքի գալերիայի կառուցումն արդեն ավարտվել է։ Այստեղ ևս 25մ-ով թունելը երկարացվել է։ Ավարտված է նաև հիմքի և իրանների կառուցման աշխատանքները։

Ճանապարհի վերանորոգման ընթացքին ծանոթանալու նպատակով տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը այցելել է երեք տեղամասեր: Նախարարին ներկայացվել են 5 թռիչքանի կամրջի վերակառուցման առանձնահատկությունները, Շնողի հիդրոէլեկտրակայանի ջրառի գլխամասի կառուցման պատճառով ճանապարհի հատակագծի փոփոխության մանրամասները։