ԱԺ տարածաշրջանային և եվրասիական ինտեգրման հարցերի մշտական հանձնաժողովի նախագահ Արմեն Գևորգյանի և Հայաստանում Ղազախստանի դեսպան Բոլատ Իմանբաևի՝ ապրիլի 4-ին տեղի ունեցած հանդիպման ժամանակ քննարկվել են ԵԱՏՄ համագործակցությանը վերաբերող հարցեր:
Արմեն Գևորգյանի խոսքերով՝ ԵԱՏՄ համագործակցության առումով այժմ բարդ ժամանակաշրջան է՝ կապված ռուս-ուկրաինական իրադարձությունների և դրա հետևանքով Ռուսաստանի նկատմամբ կիրառվող պատժամիջոցների հետ: «Քանի որ ԵԱՏՄ երկրների տնտեսությունը փոխկապակցված է, ապա չենք կարող մեզ վրա չզգալ այդ պատժամիջոցների հետևանքները: Ի սկզբանե մենք շատ մտահոգված էինք, որ այդ իրավիճակն ազդեցություն կունենա մեր երկրի պարենային անվտանգության վրա, քանի որ հացահատիկը հիմնականում ներկրվում է Ռուսաստանից»,- ասել է հանձնաժողովի նախագահը: Նրա խոսքերով՝ տարբեր քննարկումներ ցույց են տալիս, որ կարծես բարենպաստ լուծումներ գտնվել են՝ հաշվի առնելով ԵԱՏՄ երկրների հետաքրքրությունները՝ մեղմացնելու այդ պատժամիջոցների ազդեցությունները:
ԵԱՏՄ շրջանակում խնդիրների լուծման համար զրուցակիցները կարևորել են ջանքերի համատեղումը:
Նշվել է, որ երկու երկրների հարաբերությունները դինամիկ զարգանում են, թեև կա ներուժ՝ տարբեր ոլորտներում ընդլայնելու և խորացնելու փոխշահավետ համագործակցությունը:
Զրուցակիցները քննարկել են նաև միջխորհրդարանական կապերին, տարածաշրջանային խնդիրներին և մարտահրավերներին վերաբերող հարցեր:
Հանձնաժողովի նախագահը դեսպանին է փոխանցել հայ հանրության անհանգստությունը՝ կապված Ստամբուլյան հայտարարագրում տեղ գտած որոշ գնահատականների հետ, որոնք վերաբերում են հայ-ադրբեջանական չկարգավորված հարցերին: Արմեն Գևորգյանը նշել է, որ դրանում ոչ միայն շնորհավորանքներ են՝ կապված «հաղթանակի» հետ, այլև ելակետային պահեր՝ վերաբերող, այսպես կոչված, Զանգեզուրի միջանցքին:
Արմեն Գևորգյանն այս կապակցությամբ ընդգծել է նաև «Հայաստան» խմբակցության անհանգստությունը՝ նշելով, որ քանի դեռ հարցը լուծված չէ, կարևոր է, որ ՀԱՊԿ անդամ գործընկերները պահպանեն առնվազն կառուցողական չեզոքություն:
Տնտեսական համագործակցության շրջանակում նշվել է՝ Հայաստանի և Ղազախստանի միջև առևտրաշրջանառությունը նախորդ տարի 26 տոկոսով ավելացել է: Այս համատեքստում կարևորվել է նաև լոգիստիկ խնդիրների կարգավորումն այլընտրանքային ուղիներով:
Հանդիպման ավարտին դեսպան Իմանբաևն անդրադարձել է Ղազախստանում սպասվող բարեփոխումներին և սահմանադրական փոփոխություններին, կարևորել այդ համատեքստում Հայաստանի փորձը: Արմեն Գևորգյանն ընդգծել է՝ կարևոր է, որ երկրում իրականացվող բարեփոխումների արդյունքում հասարակությունը չբաժանվի տարբեր՝ հակադիր կողմերի:
