Երեխա ունեցող ընտանիքների բնակարանի ձեռքբերման պետական աջակցության ծրագրի շահառուների թիվն այս տարի ավելացել է

2020 թվականից գործող ծրագրով երիտասարդ ընտանիքներին բնակարանի ձեռքբերման դեպքում պետությունը սուբսիդավորում է բնակարանի ընդհանուր արժեքի մոտ 50%-ը, իսկ ընտանիքում ծնված երեխայի համար հատկացնում է միանվագ աջակցություն: Երկու ծրագրերով, նախորդ տարվա համեմատ, դիմելիության թիվն ավելացել է, որն, ըստ էության, ծնելիության աճի ցուցանիշ է։

ՀՀ աշխատանքի և սոցիալական հարցերի նախարարը, խոսելով մշակվող նոր ծրագրերից, շեշտում է՝ դրանք կնպաստեն ընտանիքներում ավելի շատ երեխաներ ծնվելուն: Այս տարի շարունակվող ծրագրերից մեկն է երիտասարդ ընտանիքներին բնակարանի գնման պետական աջակցության տրամադրումը։ Տարբեր բաղադրիչներով պետությունը տրամադրում է գնված բնակարանի ընդհանուր արժեքի մի մասը:

«Ժողովրդագրական բաղադրիչ ունեցող մեր այս ծրագիրը շատ լայն ընդունելության արժանացավ։ Այն ունի երեք բաղադրիչ․ եթե քաղաքացին ցանկանում է բնակարան ձեռք բերել կամ կառուցել սեփական տունը, հիփոթեքային վարկին աջակցելու միանվագ դրամանական աջակցություն է ցուցաբերվում, կամ տարեկան այդ  վարկի  գումարը փոխհատուցելու համար աջակցություն է տրվում»,- նշում է  աշխատանքի և սոցիալական հարցերի նախարար Նարեկ Մկրտչյանը։

Վլադիմիր Հարությունյանի ընտանիքը այդ ծրագրի շահառուներից է: Տարիներ առաջ Ռուսաստանի Դաշնությունից վերադառնալուց հետո ամուսնացել էր Ուկրաինայից հայրենիք վերադարձած Անիի հետ: 60 քմ ընդհանուր մակերեսով բնակարանը գնել են ցածր տոկոսադրույքով տրամադրված հիփոթեքային վարկով:

«Տրամադրված վարկը յոթուկես տոկոսով էր, որից 4 տոկոսը  սուբսիդավորում է պետությունը։ 20 տարով ենք վերցրել։ Ամեն ամիս մենք վճարումներ ենք կատարում։ Եթե պետք է լիներ ամսական 80 հազար դրամ, պետական սուբսիդավորումից հետո այժմ վճարում ենք 40 հազար դրամը»,- նշում է ծրագրի շահառու Վլադիմիր Հարությունյանը։

Մոտ 13 միլիոն դրամ գնահատված բնակարանի արժեքի գրեթե կեսը 20 տարիների ընթացքում կսուբսիդավորի պետությունը: Ծրագրի շահառու դառնալու համար պարտադիր պահանջներ են ներկայացվում ամուսիններին, իսկ ընտանիքում երեխա ծնվելու դեպքում տրամադրվում է միանվագ աջակցություն:

«Մայր գումարից 500 հազար դրամ առաջին երեխայի ծնվելուց մեզ սուբսիդավորում տվեցին, այսինքն՝ մեզ երկու տարի ժամանակ տվեցին, որ մենք միայն տոկոսները փակենք»,- ասում է Վլադիմիր Հարությունյանի կինը՝ Անի Բարսեղյանը։

2020-ից մինչև 2021 թվականի դեկտեմբեր ամիսը ծրագրից օգտվել է 2300 ընտանիք, իսկ այս տարվա առաջին եռամսյակի ընթացքում սուբսիդավորում է տրամադրվել 446 ընտանիքի: Կատարված փոփոխությամբ՝ ծնողների պետական կամ մասնավոր ոլորտում աշխատելն այժմ պարտադիր պահանջ չէ, բավարար է  ընտանիքում երեխա և որևէ եկամուտ ունենալու փաստը:

Սահմանամերձ բնակավայրերում ապրող ընտանիքների համար մշակվում են  սուբսիդավորման դրույքաչափերի ավելացման ու ներկայացվող պահանջների մեղմացման  տարբերակներ, որոնք կկիրառվեն առաջիկայում:

Այս տարվա հունվարից ներդրված մեկ այլ ծրագրով էլ, բացի միանվագ ծննդօգնության գումարից, ընտանիքում ծնված երրորդ և ավելի երեխայի դեպքում, մինչև փոքրիկի վեց տարեկան լրանալը ամեն ամիս ընտանիքը կստանա 50 հազար դրամ։ Ներդրված ծրագրի արդյունքում  երրորդ և ավելի երեխա ունենալ ցանկացող  մայրիկների թվի աճ է նկատվում:

«Հավանաբար ծրագիրը գործում է, և իրոք, կանանց  կոնսուլտացիաների հաճախումների ժամանակ եռածին, քառածին ու բազմածին հղիների թիվը բավականին ավելացել է»,- նշում է Գյումրիի Մոր և մանկան ավստրիական հիվանդանոցի մանկաբարձական բաժանմունքի վարիչ Ալլա Հովհաննիսյանը։

Ծրագրի շահառու ծնողները ստանում են նաև երեխայի ծննդյան միանվագ գումարն ու այլ դրամական աջակցությունները, եթե դրանք առկա են: Ծրագրում պարտադիր ընդգրկվում են բոլոր այն ընտանիքները, որտեղ կծնվեն երրորդ և ավելի երեխաներ՝ անկախ նրանց սոցիալական կարգավիճակից: Հնարավոր է՝ միայն ամսական 50 հազար դրամ գումար ստանալու փաստը ազդեցություն ունենա «Փարոս» համակարգում ընդգրկված ընտանիքների ընդհանուր միավորի վրա, բայց ոչ նպաստ ստանալու։