Եվրոպայի առաջնության մեդալակիր գյումրեցի հրաձիգները պատրաստվում են Աշխարհի առաջնությանը

Երկու տարվա դադարից հետո հրաձիգները նորից միջազգային մրցահարթակ են դուրս եկել և Հայաստան վերադարձել 7 ոսկե ու 3 արծաթե մեդալներով։ Բոլոր մեդալները նվաճել են միայն վազող թիրախ մրցաձևում հանդես եկած հինգ մարզիկները։ Միջազգային առաջնությունների երկար ընդմիջումներից հետո արդյունքը գերազանց էր։ Մեդալակիրներից երեքը Գյումրիի հրաձգության մարզադպրոցի սաներն են։

Գյումրիի մարզադպրոցի սան Գոռ Խաչատրյանը Եվրոպայի գործող չեմպիոնն է, երիտասարդների հետ անհատական պայքարում նորից առաջինն է։ 15-ամյա մարզիկը նաև միքս մրցաձևում իր դիպուկությամբ լավագույն հրաձիգն է, նա մեծահասակների խմբում նվաճեց չեմպիոնի կոչումը։ Այդ տարիքային խմբում հանդես եկողների միջազգային մրցաշարերի մասնակցության փորձն ավելի շատ է, քան Գոռի տարիքն է։ Գոռն այս առաջնությանը երեք ոսկի է նվաճել։

«Մեծերի մեջ արդեն ոնց որ պատասխանատվությունը մեծ լինի, մեծերի հետ մի փոքր ավելի դժվար է, քան իմ տարիքայինների հետ։ Նրանց փորձն է շատ, ես ընդամենը 2 անգամ եմ մասնակցել Եվրոպայի առաջնությանը», – ShantNews.am-ի հետ զրույցում նշել է Եվրոպայի չեմպիոն Գոռ Խաչատրյանը։

Եվրոպայի առաջնությունում երկու արծաթե մեդալ է նվաճել Արուսյակ Գրիգորյանը՝ 10 մ վազող թիրախ, նորմալ վազք և մեծահասակների խառը վազք մրցաձևերում։ Իր մարզավիճակը թույլ տալիս էր ոսկին նվաճել, բայց վերջին պահին ինչ-որ բան խանգարել է։ Ամեն դեպքում միջազգային առաջնության ոսկին  Հայաստանի ներկայացուցիչը վաստակեց։

«Կիսաեզրափակիչում օտարերկրացու հետ էի մրցում և տրամադրված էի, որ պիտի հաղթեմ ու հաղթեցի, իսկ եզրափակիչում արդեն մեր հայրենակցի հետ էի և այնքան էլ տրամադրված չէի, երևի հենց դա էլ իմ բացթողումն էր»,- նշում է Եվրոպայի փոխչեմպիոն Արուսյակը Գրիգորյանը։

Մեծահասակների միքս մրցաձևում յուրաքանչյուր երկիր հանդես է գալիս երկու մասնակցով։ Հայաստանը ներկայացնող Հովհաննես Մարգարյան-Լիլիթ Մկրտչյան զույգը գրավել է երկրորդ հորիզոնականը՝ առաջ թողնելով միայն Գոռ Խաչատրյան-Գոհար Հարությունյան զույգին։ Անհատական պայքարում Հովհաննեսին խանգարել է մարզական զենքի օպտիկայի խնդիրը և լավագույն եռյակ ընդգրկվելուն գյումրեցի մարզիկին չի բավականացրել ընդամենը մեկ միավոր։

«Լավ էի պատրաստվել այս մրցմանը, ուղղակի մի փոքր զենքիս հետ կային խնդիրներ, որոնք մրցման տեղը փոխեցի, ու երևի դա էր պատճառը, որ ընդամենը միմիավորի պատճառով չկարողացա ավելի բարձր հորիզոնականներ գրավել», – ասում է Հովհաննես Մարգարյանը։

Առաջիկայում աշխարհի առաջնությունն է, բայց իր մարզական զենքով Եվրոպայի չեմպիոն Գոռ Խաչատրյանը մասնակցել չի կարողանա։ Նրա մարզական զենքը նախատեսված չէ վազող թիրախ մրցաձևի համար, ուղղակի այն ձևափոխել ու հարմարեցրել է, դրանով մարզվել ու հաղթող դարձել։ Հիմա էլ զենքը վաղեմության ժամկետի խնդիր ունի, այն օգտագործել չի թույլատրվում, համարվում է վտանգավոր։

«Յուրաքանչյուր աշխարհի և Եվրոպայի առաջնության ժամանակ ստուգում են բալոնի պիտանելիության ժամկետը, եթե ժամկետը անցած էղավ, մարզիկին չեն թողնի մասնակցել մրցումին։ Գոռի զենքի բալոնի ժամկետն արդեն սպառվել է, իսկ օգոստոսին աշխարհի առաջնությանը նրան արդեն չեն թողնի մասնակցել», – նշում է մարզիչ Էդվարդ Ղարիբյանը։

Հրաձգության կանոններով, յուրաքանչյուր մարզիկ առաջնություններին մասնակցում է անհատական զենքով, որով և մարզվում է, իսկ մարզադպրոցը սեփական զենք չունի։ Միջազգային առաջնություններում արդյունքներ գրանցած մարզիկների զենքերը ֆեդերացիան է ժամանակավոր տրամադրում։ Քաղաքապետարանի ենթակայության մարզադպրոցը նաև շենք չունի, տարածքը վարձակալում են, մարզագույքն էլ միջազգային ստանդարտներին չի համապատասխանում, բայց չունեցած գույքով ու նվազագույն հնարավորություններով գյումրեցի հրաձիգները Եվրոպայում առաջինն են։ Նրանցից լավ արդյունքներ են սպասում նաև օգոստոսին Ֆրանսիայում կայանալիք հրաձգության աշխարհի առաջնությունից։