1988-1992 թվականներին Ադրբեջանից Հայաստան բռնագաղթած ընտանիքների բնակապահովման ԲԳՎ ծրագիրը կմեկնարկի նաև մարզերում

Այս տարի բնակարանների գնման վկայագրեր կտրամադրվեն 1988-1992 թվականներին Ադրբեջանից Հայաստան բռնագաղթած այն ընտանիքներին, որոնք մինչև հիմա չեն օգտվել պետական բնակապահովման որևէ ծրագրից։ Այն փախստականներին վերաբերող ԲԳՎ ծրագրի 4-րդ փուլն է, որը վերաբերում է նաև մարզերին։ Նախորդ 3 փուլերն իրականացվել են միայն Երևանում բնակվող փախստականների համար։ Շիրակի մարզում, 2013 թվականի փաստագրման տվյալներով, բնակարանի շահառու է համարվում 8 ընտանիք։ Վերահաշվարկից հետո հնարավոր է՝ այս թիվը փոփոխության ենթարկվի։

Դոնարա Ավագյանցն իր ընտանիքի հետ 1988 թվականին մեկ գիշերվա մեջ թաքուն երեխաների, քրոջ  ու ծնողների հետ դուրս է եկել Բաքվի բնակարանից ու մեծ դժվարություններով հասել Հայաստան, բնակություն հաստատել Լենինականում ապրող  քրոջ տանը։ Ու ամեն ինչ այստեղ սկսել են զրոյից։ Սակայն կարճ ժամանակ անց՝ դեկտեմբերի 7-ին փլվում է քրոջ բնակարանը, ու կրկին փախստական ընտանիքը մնում է անտուն։ Ժամանակավոր կացարանը երկրաշարժից հետո են տվել։

Երկհարկանի տնակում քրոջ հետ ապրում են արդեն ավելի քան 30 տարի։ Հին տնակի պատերը քայքայվել են, հատակը՝ քանդվել։ Երկրորդ հարկում ապրելն այլևս անհնար է, փտած աստիճաններով երկրորդ հարկ բարձրանալը վտանգավոր է։ Ստիպված երկու ընտանիքով առաջին հարկաբաժնում են տեղավորվել, որտեղ եղած պայմանները ևս նախանձելի չեն։

«Արդեն 30 տարի այստեղ ենք ապրում, ո՛չ տուն են տվել, ո՛չ բան, ամեն անգամ կսեն տուն կտանք ու չեն տա։ Մի անգամ տվեցին 1 սենյակ, բայց ես հրաժարվեցի, որովհետև ընտանիքս  մեծացել է, ես ինչպես տեղավորվեմ դրա մեջ»,- պատմում է Դոնարա Ավագյանցը։

2 քույրն էլ բնակարանի կարիք ունեն, ընտանիքը դարձել է բազմանդամ, բայց բնակպայմաններն ու տարածքը չեն փոխվել։ 30 տարի անց ասում են ՝ բնակապահովման պետական որևէ ծրագիր լինելու դեպքում, այս անգամ հաստատ չեն հրաժարվի, եթե, իհարկե, ընտանիքի անդամների թվին համապատասխան մակերես առաջարկվի։

1988-92 թթ․-ին Ադրբեջանից բռնի տեղահանված և Հայաստանում ժամանակավոր կացարաններում բնակվող ընտանիքների բնակարանային խնդրի կարգավորմանն ուղղված պետական նոր ծրագիր է իրականացվելու։ Խոսքը բնակարաների գնման վկայագրի 4-րդ փուլի մասին է։ Առաջին 3 փուլերն իրականացվել են Երևանում, այս մեկը վերաբերում է մարզերին։ Հայաստանի Միգրացիոն ծառայության հանրային կապերի պատասխանատու Նելլի Դավթյանի փոխանցմամբ՝ Շիրակի մարզի ունեցած տվյալները 2013 թվականի փաստագրման հիմքով են, ըստ որի՝ Շիրակի մարզում այս պահին ԲԳՎ-ի շահառու է համարվում 8 ընտանիք, թեև վերահաշվառման կարիք կա։

«Երբ որ մենք ծանուցենք մեր շահառուներին ծրագրի մեկնարկի մասին, արդեն կընդունենք դիմումները և պահանջվող փաստաթղթերը, միջգերատեսչական հանձնաժողովը յուրաքանչյուր 20 գործը ստանալուն պես նիստ կգումարի, որոշակի չափորոշիչներ են սահմանված, դիտարկվում է այդ չափորոշիչների համապատասխանելիությունը և արդյունքում կայացվում է որոշում ԲԳՎ տրամադրելու վերաբերյալ»,- ShantNews.am-ի հետ զրույցում նշել է ՀՀ Միգրացիոն ծառայության հանրային կապերի պատասխանատու Նելլի Դավթյանը։

Բնակարանային ապահովման ծրագրի այս փուլի շահառուներ են համարվելու բռնագաղթած այն ընտանիքները, որոնք ձեռք են բերել քաղաքացիություն, մշտական բնակվում են Հայաստանում, և կարևորվում է նաև այն, որ վերջին մեկ տարվա ընթացքում առնվազն 183 օր անընդմեջ անձը բնակություն հաստատած լինի Հանրապետության տարածքում, իր անունով չունենա սեփականություն, չունենա նաև օտարած սեփականություն վերջին 10 տարիների ընթացքում։ ԲԳՎ-ն իրացնելու համար շահառուն ունի մեկ տարի ժամանակ։ Գները կսահմանվեն տվյալ մարզում անշարժ գույքի շուկայի առկա կադաստրային արժեքներին համապատասխան։ Գումարը կտրամադրվի 2 փուլով։

«Առաջին կեսը նոտարական գրասենյակը փոխանցում է բնակարանը վաճառողի հաշվեհամարին, իսկ երկրորդ կեսը փոխանցում է, երբ փախստականը ազատած է լինում իր ժամանակավոր կացարանը։ 1-2 անձանց տրամադրվելու է միսենյականոց բնակարանի գումար, 3-4 անձից բաղկացած ընտանիքին՝ երկու սենյականոց, և այդպես շարունակ։ Ունենք նաև 3 և 4 սենյականոց բնակարանների հնարավորություն»,- նշում է ՀՀ Միգրացիոն ծառայության հանրային կապերի պատասխանատու Նելլի Դավթյանը։

Եթե շահառուի գտած բնակարանն ունենա ավելի ցածր արժեք, քան վկայագրինն է, մնացած գումարը իրավունք ունի շահառուն տնօրինելու։ Եվ կա հակառակ տարբերակը՝ ավելի բարձր գին ունեցող բնակարանի համար հավելավճարը տալիս է շահառուն։ 2022թ. ծրագրի իրականացման համար պետբյուջեից նախատեսված է 1,4 մլրդ դրամ։ Շահառուների թիվն ամբողջ հանրապետությունում 254 է։