Գյումրիում ներքաղաքային տրանսպորտի սպասարկման մրցույթները չեն կայանում․ նոր միկրոավտոբուսների շահագործման մեկնարկի ժամկետներն անորոշ են

Գյումրիի քաղաքապետարանը երեք ամսում ներհամայնքային երթուղիների սպասարկման երրորդ մրցույթն է հայտարարել, երեք անգամ էլ որևէ կազմակերպություն հայտ չի ներկայացրել։ Մրցույթը վերաբերում է թիվ 1 և 40 ավտոբուսային, թիվ 18 միկրոավտոբուսային երթուղիների սպասարկմանը։ Ներքաղաքային մյուս երթուղիների մրցույթները տեղի են ունեցել երկու տարի առաջ՝ 2020 թվականի հուլիսին։ Իսկ բոլոր երթուղիները սպասարկող ընկերությունը մեկն է, որն էլ այս տարվա նոր մրցույթներին չի մասնակցում՝ պատճառաբանելով, թե շահույթ չի ապահովվում։

2020 թվականից ուղևորափոխադրումները միայն միկրոավտոբուսներով են, բայց 2013 թվականից է, որ միայն մեկ կազմակերպություն է ամբողջ քաղաքը սպասարկում։ Կարգն է այդպիսին՝ առանց մրցույթի չի նշանակվում սպասարկում, պարզապես հետաքրքրվողներ չկան։

«Արդեն երկու տարի է՝ մենք մրցույթ ենք հայտարարում, բայց չեն գալիս կազմակերպությունները, փաթեթներ չեն ներկայացնում։ Միկրոավտոբուսային երթուղիներից հրաժարվողներ չունենք, իսկ ավտոբուսային և՛ 1-ին, և՛ 40 երթուղիներից հրաժարվել են և չեն սպասարկվում, չկան»,- ShantNews.am-ի հետ զրույցում նշել է Գյումրիի քաղաքապետարանի տրանսպորտի բաժնի առաջատար մասնագետը։

Միակ սպասարկող ընկերությունը ներկա վիճակում 6 ամիսը մեկ պայմանագիր է կնքում Գյումրիի քաղաքապետարանի հետ երթուղին շահագործելու համար՝ մինչև մրցույթը կայանա։ Երթուղիների սպասարկումը կատարում են 75-80 մեքենաներով, 30 մեքենա շահագործումից դուրս է բերվել, դրանց 15 տարին լրացել է։ Ըստ կազմակերպության՝ մեքենաների թիվը համալրել չեն շտապում, ավելի ճիշտ, քաղաքապետարանում նոր փակ բաժնետիրական ընկերության ստեղծումը ենթադրում է սպասարկման նոր ձևի անցում։

«Քանի որ քաղաքապետարանը, իմացանք, ՓԲԸ է բացում, ամեն ամիս կարող է հրաժարվեն մեր կազմակերպության սպասարկումից, դրա համար էլ այս պահին ռիսկային է ինչ-որ քայլ կատարել, համալրել մեքենաները»,- ասում է «Նյու սիթի տրանս» ընկերության ներկայացուցիչ Օհաննա Գրիգորյանը։

Նոր ընկերությունը քաղաքապետարանը ստեղծում է մեկ տարի առաջ սուբվենցիայով բերված 66 միկրոավտոբուսներով ուղևորափոխադրումներ կազմակերպելու համար։ Բայց պարզվում է՝ քաղաքին նվազագույնը 85-90 մեքենա է հարկավոր։ Բայց ունեցածով երթուղիների սպասարկման ժամկետները դարձյալ հայտնի չեն։

«Չեմ կարող ասել՝ երբ, որովհետև հիմա մենք գնում ենք ՓԲԸ-ի աշխատակազմի կազմավորմանը, դեռ կազմակերպվելու է վարորդների պահը, մյուս բոլոր աշխատողների հավաքագրումը, հիմա էլ վերակառուցվում է տրանսպորտային պարկը, և երբ այդ ամենը պատրաստ եղավ, էդ ժամանակ էլ կսկսենք շահագործել»,- նշել է Արամ Սարուխանյանը։

Մի քանի անհայտներով անգամ վարորդների աշխատանքի ընդունելության հայտարարություն է հրապարակել քաղաքապետարանը, արդեն 150 դիմում ունեն, իսկ ընտրությունը, պարզվեց, որ հարցազրույցով է լինելու։

«Վարորդները հատուկ հարցաթերթիկ են լրացնելու, հաշվի ենք առնելու բոլոր պայմանները, այդ թվում՝ իրենց վարվելակերպը․ վարորդին չի թույլատրվում հեռախոսով խոսել, չծխել, քաղաքացիների, ուղևորների հետ վեճի չմտնել, միշտ կոկիկ լինել․․․», – մանրամասնել է տրանսպորտի բաժնի ներկայացուցիչը։

Արգելվում է այն, ինչ մշտապես կիրառության մեջ է Գյումրիի բոլոր երթուղային միկրոավտոբուսներում։ Ավագանու նիստով որոշվել է «Գյումրու ավտոբուս» փակ բաժնետիրական ընկերություն ստեղծել, աշխատակիցներ հավաքագրել, պարկ կառուցել և այլն։ Սա ևս չհստակեցված ժամկետներով գործընթաց է, որով պայմանավորված՝ «Սև բերդի» բաց տարածքում դեռ մնալու են նոր միկրոավտոբուսները, որոնց շարժիչները 15 օրը մեկ գործի են դրվում։