Հաշվառվել և քարտեզագրվել են Գյումրիի տնակային տարածքները․ 89 տնակային ավանում կա 2769 տնակ

88-ի երկրաշարժի հետևանքով Գյումրիում ձևավորված տնակային ավանների թիվը նվազել է՝ 96-ից դառնալով 89։ Տնակային տարածքներ կան, որտեղ 2 կամ 3 ժամանակավոր կացարան է մնացել, ամենամեծը շարունակում է մնալ Գյումրիի ավտոկայան թաղամասը՝ հասցեավորումը 104 տնակային ավան, որտեղ դեռ 154 տնակ կա։

Քարտեզագրումը ցույց է տալիս, թե տնակն ինչ նշանակության հողատարածքում է տեղադրված։ Քարտեզում դրանք նշված են շրջանակներով՝ ըստ համարների, որոնք ցույց են տալիս նաև տնակի ճշգրիտ կոորդինատները։

Գյումրիի քաղաքապետարանի անշարժ գույքի կառավարման բաժնի պետի տեղակալ Մկրտիչ Դավթյանը ShantNews.am-ի հետ զրույցում ներկայացրել է քարտեզագրման  անհրաժեշտությունը։

«Ընդունենք բնակիչը տնակն ապամոնտաժել է, դիմել է մեզ, որ մենք տրամադրենք քանդման ակտ, արդեն իսկ մենք էս քարտեզագրման կոորդինատներով, ճիշտ տեղադիրով կգտնենք կոորդինատները և կտանք քանդման ակտը, որպեսզի բնակիչը չխաբի տնակի տեղի մասով, կամ ասի 50 մետր էն կողմ է եղել, կամ 100 մետր էս կողմ է եղել իր տնակը»,- նշում է անշարժ գույքի կառավարման բաժնի պետի տեղակալը։

2019-ի փաստագրման սկզբում քաղաքն ունեցել է 2827 տնակ, այսօր այդ թիվը նվազել է՝ կազմելով 2769։ Տնակները պակասել են բնակապահովման տարբեր ծրագրերից օգտվելու արդյունքում։ Առանց տնակի քանդման ակտի բնակարանի սեփականաշնորհում չի արվում։ Տնակների բնակիչների մի մասն էլ բնակարան ստացածներն են, որոնք շարունակում են մնալ տնակում։

«Փոխհատուցում ստացել են, սակայն իրենց տնակը չեն քանդել և վաճառել են բնակարանը, էլի հայտնվել են տնակում, նաև կան այնպիսի բնակիչներ, որոնք փոխհատուցում չեն ստացել, սակայն վաճառել են իրենց սեփական բնակարանը, գնել են տնակ և  էլի հայտնվել են տնակում»,- ասում է Գյումրիի քաղաքապետարանի անշարժ գույքի կառավարման բաժնի գործակալ Հասմիկ Տոնոյանը։

Տուն չեն կորցրել, բայց ունեցածը վաճառել են և տեղափոխվել տնակ։ Գյումրիում տնակատեր դառնալու մեկ այլ տարածված երևույթը գյուղից քաղաք տեղափոխված ընտանիքներին է առնչվում։ Տնակային տնտեսություններում այդպիսի պատմությունները բազմաթիվ են, քիչ չեն նաև վարձով տրվող տնակները։

Ընտանիքների  մի մասն էլ  ստացած բնակարանի սենյակների թվի անհամապատասխանության պատճառով է շարունակում մնալ տնակում։ Գյումրիում 411 ընտանիք, որոնք ժամանակավոր կացարաններում են ապրում, ունեն  անօթևանի կարգավիճակ։ Բնակարանի փոխահատուցում չեն ստացել տարբեր պատճառներով, մի մասն էլ չի հասցրել ժամանակին հաշվառվել անօթևանների հերթացուցակում։ Նրանց բնակապահովման խնդիրը ևս ուսումնասիրությունների շղթայում է։

Խնդրահարույց թեմա են նաև փակ դռներով տնակները, որոնց թիվը 565-ն է։ Տնակը չբնակեցված է համարվում, եթե այնտեղ վերջին տասը տարում որևէ մեկը չի ապրել։ Դրանք ապամոնտաժելու իրավունք քաղաքապետարանը չունի, համարվում են անձի սեփականություն, տնակներում տերերը նաև անձնական գույք ունեն, հետևաբար, առանց տնակի տիրոջ տնակի քանդումը իրավական խնդիրներ կառաջացնի։ Այս պահին էլ տնակների ապամոնտաժման օրենսդրական ակտ չկա դեռ։

Գյումրին տնակներից ազատելու, ինչպես նաև բնակարանային հարցի լուծման տարբերակ է արդեն քարապատված տնակների սեփականաշնորհումը։ Իսկ ժամանակավոր կացարանների մեծ մասը տեղադրված են հանրային նշանակության տարածքներում կամ կանաչ գոտիներում։ Խնդրի կարգավորման տարբերակ կարող է լինել գլխավոր հատակագծի փոփոխությունը։

«Այն տարածքներն են ուսումնասիրվում հիմնականում գլխավոր ճարտարապետի կողմից, որոնք տնակներով խիտ բնակեցված են, այսինքն՝ ինքը կանաչ գոտի է, բայց տնակների քանակը շատ-շատ է։ Փորձում են հիմա փոխել էդ հատվածը, այսինքն դարձնել բնակության, թույլ տալ մարդկանց սեփականաշնորհման, մեկ այլ հատվածում ավելացնել արդեն կանաչ գոտի»,- պարազաբանում է  Գյումրիի քաղաքապետարանի անշարժ գույքի կառավարման բաժնի պետը։

Քարտեզագրումը և տնակների անձնագրերի կազմումը հիմնավոր տվյալներ են քաղաքաշինության կոմիտեում հետագա վերլուծությունների համար։ Տնակներում բնակվող ընտանիքների կարգավիճակների ուսումնասիրությունից հետո հերթը կհասնի բնակապահովման առաջարկների քննարկմանը։