«Գյումրի» բժշկական կենտրոնում վերաբացվել է «Քովիդ» բուժման կենտրոնը

«Գյումրի» բժշկական կենտրոնը դարձյալ գրություններով և ցուցանակներով բաժանվել է միջին, ռիսկային ու բարձր ռիսկային գոտիների։ Արդեն երկու օր է՝ կենտրոնում վերաբացվել է  «Քովիդ»բաժանմունքը։ Հոսպիտալացվել են մարզի և այլ  տարածաշրջաններից ուղեգրված հիվանդները։

«Բացի մեր տրիաժ բաժանմունքից, որտեղից երեկ ընդունել էինք 12 հիվանդների, մնացած հիվանդները ուղեգրվել են հանրապետական տրիաժ բաժանմունքից, տարբեր մարզերից՝ Լոռի, Տավուշ։ Հիվանդները այս պահի դրությամբ բաժանմունքում 46-ն են»,- նշել է «Գյումրի» ԲԿ փոխտնօրեն Արմեն Խաչատրյանը։

«Քովիդ» բաժանմունք հոսպիտալացումից առաջ նախ հիվանդներին մեկուսացնում են տրիաժ բաժանմունքում, թեստավորման պատասխանից է կախված, թե  հիվանդները բուժումը որտեղ են անցնելու՝ «Քովիդ», թե թերապևտիկ բաժանմունքում։

«Քանի որ հիվանդների հոսքը շատացել է, նմուշառումները կատարում ենք երկու փուլով։ Երեկ նմուշառված 22 հիվանդներից 16-ի մոտ հաստատվել է կորոնավիրուս։ Համեմատաբար հասցնում ենք թերապևտիկ բաժանմունքում մահճակալներ ապահովել, բայց լինում են դեպքեր, երբ ազատ մահճակալներ չենք ունենում։ Ստիպված  ստացիոնար բուժման ենք ընդունում միայն դեսատուրացված, թթվածնային սարքի կարիք ունեցող հիվանդներին»,- նշել է «Գյումրի» ԲԿ  բժիշկ-ռևմատոլոգ Անահիտ Անտիկյանը։

Հիվանդները կենտրոն ընդունվում են բարձր ջերմություն, մարմնի թուլություն ախտանշաններով, մեծ մասի մոտ ախտորոշվում է թոքաբորբ ու վերին շնչառական ուղիների ախտահարումներ, չոր հազ։

«Գյումրի» բժշկական կենտրոնի բաժանմունքների մահճակալները երկու շաբաթ է՝ ծանրաբեռնված են, իսկ  ինֆեկցիոն հիվանդանոցը, որպես «Քովիդ» բուժման կենտրոն, դեռ չի վերապրոֆիլավորվել։ Ինֆեկցիոն  բաժանմունքը այս պահին սպասարկում է ինֆեկցիոն դեպքերը։

«Էսօրվա դրությամբ մենք ունենք ինֆեկցիոն թվով 9 հիվանդներ, ունենք աղիքային ինֆեկցիաներ, սննդային տոքսիկոինֆեկցիաներ և ջրծաղիկ։ Չգիտեմ՝ այս տարի ինչպիսին կլինեն կորոնավիրուսային թվերը, և անհրաժեշտություն կլինի՞ կրկին վերապրոֆիլավորվելու, բայց մենք, որպես «Քովիդ» բաժանմունք, պատրաստ ենք հիվանդներին ընդունելու»,- նշել է «Գյումրի» ԲԿ Ինֆեկցիոն բաժանմունքի վարիչ Կարինե Տոնոյանը։

Անհրաժեշտության դեպքում  նախկին տուբերկուլյոզային մասնաշենքը հարմարեցված է և 100 մահճակալով պատրաստ է «Քովիդ» բուժում իրականացնելու։ Մինչ այս  ինֆեկցիոնի մանկական և մեծահասակների բաժանմունքներում բուժում են ստացել գրիպի տարբեր շտամներով քաղաքացիներ։

Ընդունված  բոլոր հիվանդները այստեղ պարտադիր թեստավորվում եմ։ Ինֆեկցիոն  հիվանդանոց ընդունված  երեխաների մոտ  «Քովիդ» դրական  երկու դեպք է  հաստատվել, որոնք տեղափոխվել են մայրաքաղաքի կլինիկաներ։

Վերաբացվելու դեպքում ինֆեկցիոն հիվանդանոցում կհոսպիտալացվեն միայն միջին  ծանրության հիվանդները, վերակենդանացման բաժանմունք չունենալու պատճառով  ծանր ընթացքով դեպքերը կրկին  կտեղափոխվեն «Գյումրի» բժշկական կենտրոն։