Գյումրեցի ծանրամարտիկները պատրաստվում են Եվրոպայի առաջնությանը

Հայաստանի ծանրամարտի առաջնությունում գյումրեցի մարզիկների արդյունքներն ընդհանուր հաշվարկում լավագույնն են, չորս ծանրորդ Հայաստանի հավաքականի կազմում հանդես կգա մայիսին անցկացվելիք Եվրոպայի առաջնությունում։ Չորս ծանրամարտիկները Հայաստանի չեմպիոն են դարձել՝ տարբեր քաշային կարգերում։ Գերծանր քաշային, աշխարհի փոխչեմպիոն Վարազդատ Լալայանը երկամարտի իր ցուցանիշներով գերազանցել է օլիմպիական խաղերի փոխչեմպիոններին։

«Աշխարհի առաջնությունից հետո ինքը մի կարճ ժամանակահատված հանգստացավ, մի տասը մարզումից հետո գնաց ուսումնամարզական հավաքի ու մասնակցեց Հայաստանի առաջնությանը։ Իր բարձրացրած կիլոգրամները շատ բարձր արդյունք էին այդքան քիչ մարզվելուց հետո»,- ShantNews.am-ի հետ զրույցում նշել է նրա անձնական մարզիչ Կարեն Կարապետյանը:

Վարազդատն այժմ էլ ուսումնամարզական հավաքների է, Հայաստանի առաջնությունից հետո միանգամից անցել է մարզումների, Եվրոպայի առաջնությանն է պատրաստվում։ Մինչ մարզումներին միանալը ShantNews.am-ի թղթակիցը հանդիպել է չեմպիոն Հակոբ Մկրտչյանին, որը Հայաստանի առաջնությանը հանդես է եկել նոր քաշային կարգում՝ 96-ից անցում կատարելով 89 կգ քաշային կարգի, որով հանդես է գալու ծանրամարտի Եվրոպայի առաջնությանը։

«Մի 10 կգ քաշ եմ գցել, բայց արդեն մինչև Եվրոպա հաստատ էդ ամիսները կբավականացնեն, որ հասցնեմ այն արդյունքին, հաստատ մեդալով կվերադառնամ»,- ասել է Հակոբ Մկրտչյանը։

Ընդհանուր առմամբ, Հայաստանի առաջնությանը ծանրորդները բարձր քաշերի չեն մոտենում, հիմնական ուժերը պահելով միջազգային առաջնությունների։ Այդպես է նաև կանանց ծանրամարտում։ Ծանրամարտի Հայաստանի կանանց հավաքականի գլխավոր մարզիչ Արտաշես Ներսիսյանը ShantNews.am-ի հետ զրույցում նշել է, որ Հայաստանի առաջնության մասնակիցների 30 տոկոսը գյումրեցի մարզուհիներն են եղել, որոնք լավ ցուցանիշներ են գրանցել․

«Ունեցանք 10 մեդալ, որից 2-ը ոսկի, 5-ը՝ արծաթ, մնացածը՝ բրոնզ։ Այս տարի նորություններ ունեցանք․ 45 կգ քաշային կարգում հանդես եկավ Նատալիան, ինքը չնայած տարիքով փոքր է, բայց իրավունք ուներ մասնակցելու մեծահասակների առաջնությանը, և դարձավ հաղթող։ Հաղթեց նաև Գրիգորյան Ալեքսանդրան»։

17-ամյա Ալեքսանդրա Գրիգորյանը Հայաստանի առաջնության չեմպիոններից է։ Նա նույնպես փոխել է քաշը և հանդես է գալիս 55 կգ կարգում։ Իսկ նախորդ՝ 49 կգ քաշային կարգում հասցրել է դառնալ Եվրոպայի փոխչեմպիոն։ Ալեքսանդրայի արդյունքներից անձնական մարզիչ Քրիստինե Պետրոսյանը դժգոհ չէ։

Վեց տարվա դադարից հետո կանանց հավաքական է վերադարձել աշխարհի և օլիմպիական խաղերի բրոնզե մեդալակիր Հռիփսիմե Խուրշուդյանը։ Հայաստանի առաջնությունում մարզուհին չեմպիոն է դարձել, իսկ հաղթանակը հեշտ չի տրվել։ Կանանց հավաքականի գլխավոր մարզիչը նշում է՝ Հռիփսիմեն դեռ լիարժեք մարզավիճակում չէ, ինտենսիվ մարզումները շարունակում է։

«Եթե նա կարողանա համապատասխան կիլոգրամներ բարձրացնի, ուրեմն անպայման կմասնակցի, եթե պիտի մեդալ չբերի, ինքս թույլ չեմ տա, որպեսզի մասնակցի Եվրոպայի առաջնությանը»,- ShantNews.am-ի հետ զրույցում նշել է Արտաշես Ներսիսյանը։

Հռիփսիմե Խուրշուդյանը և առաջնությունում առաջին հորիզոնական գրաված մյուս ծանրորդուհիները Հայաստանի հավաքականի կազմում կմասնակցեն երիտասարդների, ապա մեծահասակների Եվրոպայի առաջնություններին։ Ծանրամարտի Եվրոպայի առաջնությունն այս տարի կընդունի Ալբանիան մայիսին։