Կան հարցեր, որոնց քննարկումն ավելի արդյունավետ է կոնկրետ հարցով զբաղվող պաշտոնյաների միջև. Արարատ Միրզոյան

ՀՀ առաջին փոխվարչապետ Արարատ Միրզոյանը, տեսաուղերձում ներկայացնելով ԱՄՆ կատարած այցի մանրամասները, անդրադարձել է նաև պատվիրակության կազմին: Նա նշել է, որ պատվիրակության կազմը նախ և առաջ պայմանավորված էր այն հանդիպումներով և այն միջոցառումներին մասնակցությամբ, որոնք ծրագրված էին իրականացնել ԱՄՆ-ում: Միրզոյանի խոսքերով՝ այցի առաջնային նպատակը Կայուն զարգացման հարցերով բարձրաստիճան քաղաքական ֆորումին մասնակցությունն էր և Հայաստանի ազգային կամավոր զեկույցի ներկայացումը, որն ինքը պիտի աներ:

Առաջին փոխվարչապետի խոսքերով՝  նույն միջոցառման շրջանակներում նախատեսված էին նաև երկու հարակից միջոցառումներ, որոնք Հայաստանը հանձն էր առել իրականացնել, այստեղ նաև անհրաժեշտ էին ԱԻՆ ներկայացուցչի, տրանսպորտի, կապի և տեղեկատվական տեխնոլոգիաների փոխնախարարի, Սփյուռքի փոխնախարարի ներկայությունը, պատվիրակության կազմում էր նաև ԱԳ նախարարը,  ԱԳՆ ՄԱԿ-ի հարցերով բաժնի ներկայացուցիչը, առաջին փոխվարչապետի՝ արտաքին հարցերով խորհրդականը, թարգմանիչը, Կայուն զարգացման հարցերով Հայաստանի նորարարական լաբորատորիայի ղեկավարը:

«Առաջնային նպատակը զեկույցի ներկայացումն էր, ինչը և արեցի, այնուհետև հարցուպատասխանը, երկու հարակից միջոցառումները, հանդիպումներ ունեցանք ՄԱԶԾ ղեկավարի, «Հայաստանի մանուկներ հիմնադրամ»-ի հիմնադիր և տնօրեն Գարո Արմենի հետ, ՀԲԸՄ կազմակերպած միջոցառմանը ներկա եղանք, հանդիպեցինք նյույորքյան համայնքի և ՀԲԸՄ ներկայացուցիչների հետ, ապա Վաշինգտոնում մի շարք երկկողմ հանդիպումներ եղան բավական ազդեցիկ սենատորների և կոնգրեսականների, պետքարտուղարի տեղակալ Վես Միտչելի, այլ պաշտոնատար անձանց հետ, և այդ հանդիպումների ընթացքում ներկայացրեցինք Հայաստանի նոր քաղաքական առաջնորդությունը, վերջին զարգացումները, հեղափոխությունը, այն արժեքները, որոնք դրված են հեղափոխության հիմքով և Հայաստանի նոր քաղաքական իրավիճակը»,- ասել է նա:

Միրզոյանը տեղեկացրել է, որ իրենք նաև լուրջ քննարկումներ են ունեցել ՀՀ և ԱՄՆ միջև հարաբերությունների խորացման վերաբերյալ, մասնավորապես՝ ԱՄՆ-ի կողմից Հայաստանին ցույց տրվող աջակցության վերաբերյալ, քննարկվել է առևտրային կապերի խորացումը, ուղղակի ներդրումների մեծացման հնարավորությունը և Հայաստանի համար շահավետ բազմաթիվ այլ հարցեր:

Առաջին փոխվարչապետը նաև ընդգծել է՝ կա այդպիսի պրակտիկա՝ աշխատանքային այցի ընթացքում ունենալ հանդիպումներ, որոնք պարտադիր չէ, որ արարողակարգային առումով պայմանական ասած «լուսանկարային» լինեն, այսինքն՝ դրանք երկու նախագահների, երկու վարչապետների, երկու հավասարազոր պաշտոնյաների հանդիպումներ են, որովհետև կան բազմաթիվ աշխատանքային հարցեր, որոնց քննարկումը ավելի արդյունավետ է ստացվում, երբ քննարկումը տեղի է ունենում կոնկրետ հարցով զբաղվող պաշտոնյաների միջև:

«Օրինակ՝ պետքարտուղարի՝ մեր տարածաշրջանի գործերով տեղակալ Վես Միտչելը բավական տեղեկացված ազդեցիկ պաշտոնյա էր, ում հետ արժեր քննարկել մեր տարածաշրջանին և ԱՄՆ-ին վերաբերող հարցերը»,- նշել է նա: