Գյումրեցի պատանիները դրոնը ձեռքի շարժումներով և ժեստերով կառավարելու ծրագրեր են ստեղծել

Գյումրեցի պատանիները դրոնների, այսպես կոչված, խելացի ծրագրեր են ստեղծել, որոնք հնարավորություն են տալիս դրանք կառավարել ժեստերի կամ ձեռքի շարժումների միջոցով: 14-17 տարեկան պատանիներն իրենց նորարարական գաղափարն իրագործել են արհեստական բանականության օգնությամբ։ BALATON AI կրթական կենտրոնի ուսանողներն այժմ աշխատում են իրենց նոր գաղափարներն ու ստեղծած ծրագրերը կատարելագործելու ուղղությամբ:

Անօդաչու թռչող սարքերն ու դրոնները ներկայում կիրառվում են տնտեսության տարբեր ոլորտներում՝ գյուղատնտեսությունից սկսած մինչև արդյունաբերություն, և  իհարկե, ռազմական համակարգում: Թռչող սարքերը հիմնականում աշխատում են հեռակառավարմամբ, իսկ գյումրեցի նորարարները որոշեցին գտնել դրոնը կառավարելու  այլ տարբերակ ու արհեստական բանականության միջոցով սկսեցին մշակել հատուկ ծրագրեր ու ալգորիթմեր:

«Հասկացանք, որ մենք ուզում ենք պրակտիկ բան տեսնենք և որոշեցինք, որ կարելի է  ստեղծել դրոն, որը կկառավարվի ժեստերով, մենք կկարողանանք կապ ստեղծել դրոնի ու այն ղեկավարողի միջև։ Ընթացքում եղավ ևս մեկ միտք՝ դեմքի ճանաչման ծրագրի միտքը և այդպես էլ սկսեցինք մեր աշխատանքը»,- պատմում է  նորարարական ծրագրերի  համահեղինակ Մոնիկա  Մելքոնյանը։

«Դրոնը պետք է ունենար, այսպես կոչված, տեր, ով պետք է կառավարեր սարքը։ Դրա համար բաժանվեցինք երկու թիմի, մի թիմը  աշխատում էր  դեմքի ճանաչման ծրագրի վրա, մյուս թիմը՝ ժեստերի ճանաչման ծրագրի։ Երկու թիմն էլ սկզբում տարբեր ալգորիթմեր ու տարբեր  կոդեր փորձելով  մի քանի ծրագրեր գրեցին․․․Սկզբում չէր ստացվում, վերջնարդյունքում՝ ամբողջ թիմով  գրեցինք այն ծրագրերը, որոնց համար էլ շուրջ երկու տարի  աշխատում էինք»,-նշում է  պատանի ծրագրավորող Նարեկ  Ֆռնջյանը։

Ծրագրերն ու կոդերը ստեղծելու համար արհեստական բանականությունից բացի, պատանիները Գյումրիի տեխնոլոգիական կենտրոնի մասնագետների օգնությամբ ուսումասիրեցին նաև բարձրագույն մաթեմատիկա և համակարգչային լեզուներ: Պատանի  ծրագրավորողները, համադրելով թիմի բոլոր անդամների մտավոր կարողությունները, առաջին անգամ դրոնը հնարավոր դարձավ օդում ղեկավարել ձեռքերի շարժումներով:

Առանցքի շուրջ պտտվելուց բացի, հատուկ ծրագրի միջոցով հնարավոր է դրոնը օդում  կառավարել նաև ժեստերի միջոցով: Դրոնը  տեղադրված տեսախցիկի միջոցով օդ է բարձրանում միայն կառավարող անձի դեմքը ճանաչելուց հետո, ապա  տեղաշարժվում է մատների  հատուկ մշակված շարժումների միջոցով:

Խելացի դրոնը ժեստերին հետևում է համակարգչի հետ կապի միջոցով, որտեղ նախապես մշակված ու տեղադրված են հատուկ իմպուլսներ, որոնք կետային ազդանշաններով   ընկալում են ղեկավարման հրամանը, որով էլ դրոնը շարժվում է օդում:

Պատանիների  ստեղծած ծրագիրը դեռ խաղային է, իրենց կուրսային աշխատանքն է: Այս տարբերակը նախատեսված է երեխաների համար թռչող սարքն ավելի  հետաքրքիր դարձնելու համար: Արդեն աշխատում են ծրագրերը ավելի կատարելագործելու ուղղությամբ, առաջիկայում կներկայացնեն նոր մոդելներ ու ավելի հեռուն թռչող դրոնների տարբերակներ:

«Դրոնի հետ աշխատանքի ընթացքում մենք հասկացանք, որ միայն ծրագրավորման գիտելիքները մեզ բավարար չէ ցանկալի արդյունքի հասնելու համար, սկսեցինք համագործակցել Գյումրիում գտնվող երկրաֆիզիկայի և ինժեեներային սեյսմաբանության ինստիտուտի  գիտնականների հետ։ Փորձի փոխանակման արդյունքում կկարողանանք ստեղծել ոչ միայն դրոնի համար նախատեսված ավելի արդյունավետ ծրագրեր, այլ նաև հենց դրոնն ամբողջությամբ»,-ասել է նախագծի համահեղինակներից Արամ Սարգսյանը։

«Մեր առաջիկա ծրագրի մեջ է մտնում նաև  քարտեզներ օգտագործելը՝ արբանյակային քարտեզներ, որոնց միջոցով հնարավոր կլինի մեր դրոնների հեռավորությունն արդեն  ավելի  երկարացնել, այսինքն՝ ինքը ոչ թե Wi-Fi-ով պիտի աշխատի, այլ  սարքի մեջ տեղադրվող քարտեզների օգնությամբ»,- նշել է BALATON AI կրթական կենտրոնի  հիմնադիր Սավա Սավոյանը։

Ապագա  ծրագրավորողները նպատակ ունեն իրենց մտավոր պոտենցիալը  ներդնել նաև ռազմական նշանակության դրոններ ու այլ սարքեր ստեղծելու գործում: Մինչ այս Գյումրիի երկրաֆիզիկայի և ինժեներային սեյմսբանության ինստիտուտի գիտնականների հետ համագործակցության արդյունքում կաշխատեն, օրինակ, երկրաշարժերը կանխազգող ծրագրեր ու սարքեր ստեղծելու  ուղղությամբ, ժեստերով կառավարվող դրոնից բացի, առաջիկայում կունենան նաև խելացի խաղալիքների հետաքրքիր ու զարգացնող նոր մոդելներ: