«Արհեստագործական ծրագրերով գործազրկությունը ընդամենը 6 տոկոս է կազմում». Ժաննա Անդրեասյան

Արհեստագործական, միջին մասնագիտական կրթության ոլորտում առաջնային է դիտվում տնտեսության գերակա ուղղություններով մասնագիտությունների ծավալի ավելացումը` շարունակաբար ներդնելով նոր մասնագիտություններ և կրճատելով այն մասնագիտությունների տեղերը, որոնք առավել իներցիոն բնույթ են կրում։

Այս մասին այսօր հրավիրված հաշվետու մամուլի ասուլիսում նշել է ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը:

Նրա տեղեկացմամբ` վերջին 3 տարիների ընթացքում ներդրվել է շուրջ 21 նոր մասնագիտություն, 2022 թվականին նախատեսվում է ներդնել ևս 2-ը: Էական նշանակություն ունի գործող չափորոշիչների վերանայումը, որի շրջանակում վերջին տարիներին ավելի քան 250 չափորոշիչ է վերանայվել։

Աշխատանքի վրա հիմնված և դուալ կրթություն

«Առանձնահատուկ տեղ է զբաղեցնում աշխատանքի վրա հիմնված ուսուցման և դուալ կրթության ծրագրերի իրականացումը։ Ներկայումս շուրջ 15 հաստատությունում ներդրված է 11 մասնագիտությամբ և որակավորմամբ դուալ ուսուցման համակարգ, նախատեսվում է 2022 թ. ևս 3 նոր հաստատությունում 2 կամ 3 նոր մասնագիտությամբ ներդնել նույն ծրագիրը։ Ավելի քան 700 ուսանող սովորում է դուալ ուսուցման ծրագրերով։ Ընդհանուր առմամբ՝ նախնական և միջին մասնագիտական կրթական ծրագրերով սովորում են ավելի քան 25000 ուսանողներ, որոնցից շուրջ 7000-ը՝ արհեստագործական ծրագրով, շուրջ 18000-ը՝ միջին մասնագիտական։ Ընդ որում, ինչպես փոխնախարարն է նշում, արհեստագործական ծրագրերով գործազրկությունը կազմում է ընդամենը վեց տոկոս, ինչը արդյունավետ ցուցանիշ է»,- նշել է փոխնախարարը:

Որակի և արդյունավետության բարձրացում

Որակի ապահովման ուղղությամբ կարևոր է միջին մասնագիտական պետական ուսումնական հաստատությունների հավատարմագրման գործընթացը (վերջին երեք տարիներին 14 հաստատություն է հավատարմագրվել է, 2022 թ.-ին նախատեսվում է ևս 5-ի հավատարմագրումը)։

Նպատակ է սահմանված ՄԿՈՒ շրջանավարտների՝ իրենց մասնագիտությամբ զբաղվածության ցուցանիշը հասցնել առնվազն 41%-ի։ Ավելի քան 70 կազմակերպությունների հետ կնքվել են համագործակցության հուշագրեր՝ համատեղ աշխատանքներ իրականացնելու նպատակով։ Հատուկ ուշադրության է արժանանում գյուղատնտեսական ոլորտի կրթությունը։ Շարունակվել են գյուղատնտեսական քոլեջների զարգացման ծրագրերը, մասնավորապես՝ հուշագիր է ստորագրվել ԿԳՄՍ նախարարության և Ֆրանսիայի հայկական հիմնադրամի միջև, որի արդյունքում՝ Տավուշի տարածաշրջանային քոլեջը կվերածվի ֆրանսիական մոդելով գյուղատնտեսական կրթահամալիրի։ Հետագայում նախատեսվում է նույն մոդելը դիտարկել նաև Սյունիքի գյուղատնտեսական քոլեջների համար:

Սոցիալական գործընկերություն

Սոցիալական գործընկերության շրջանակում տարբեր ծրագրեր են իրականացվել

«Մարդը՝ կարիքի մեջ» կազմակերպության հետ:

«Կազա» հիմնադրամի հետ, մասնավորապես՝ արևային էներգիայի ոլորտում նոր մասնագիտությունների ներդրման նպատակով հուշագիր է ստորագրվել: Կարևոր համագործակցություն է մեկնարկել «Ազնավուր» հիմնադրամի հետ արվեստի ոլորտում կրթության բարեփոխման շուրջ, որը կիրականանա Երևանի մշակույթի և արվեստի քոլեջի անվանափոխության և զարգացման միջոցով։ Բազմաթիվ են համագործակցության ծրագրերը զբոսաշրջության, խոհարարության ոլորտում, այդ թվում՝ մարզային տարբեր հաստատություններում։ Արդյունավետության բարձրացման նպատակով կատարվել են փոփոխություններ իրավական մի շարք ակտերում:

2022 թվականին առաջնահերթության կարգով կնորոգվի և կվերակառուցվի ՄԿՈՒ 8-10 հաստատություն

Փոխնախարարի խոսքերով` կարևորվում է ՄԿՈՒ հաստատությունների շենքային պայմանների բարելավումը: 2020 թվականին ՄԿՈՒ երկու հաստատության վերակառուցման և վերանորոգման համար հատկացվել է 235 մլն ՀՀ դրամ, 2021-ին՝ 271 մլն ՀՀ դրամ. այս միջոցների շրջանակում վերակառուցման աշխատանքներն ավարտվել են Վանաձորի արվեստի պետական քոլեջում: 2022 թվականին նախատեսված է արդեն շուրջ 1,17 մլրդ ՀՀ դրամ, որով կավարտվեն Վանաձորի գյուղատնտեսական քոլեջի վերակառուցման աշխատանքները, կսկսվեն ևս մեկ գյուղատնտեսական քոլեջի վերակառուցման աշխատանքներ, 2 հաստատության համար կկազմվեն նախագծանախահաշվային փաստաթղթեր։ 2022 թ. բյուջեով նախատեսված է առաջնահերթության կարգով ևս 8-10 հաստատության հիմնանորոգման և վերակառուցման համար շուրջ 4 մլրդ ՀՀ դրամի հատկացում: 2022թ. բյուջեում նախատեսվել է ամբողջությամբ վերակառուցվող Վանաձորի գյուղատնտեսական քոլեջի՝ գույքով և մասնագիտական սարքավորումներով հագեցում։ Միաժամանակ իրականացվում են նաև քոլեջների և ուսումնարանների ջեռուցման համակարգերի ընթացիկ հրատապ վերանորոգման աշխատանքները: