Գյումրիում Ջուլիետա Ղուկասյանին ծեծելով մահվան հասցնելու գործով միջնորդություններ է ներկայացրել պաշտպանական կողմը

2018-ի դեկտեմբերի 2-ին Գյումրիի Սլաբոդկա թաղամասում Ջուլիետա Ղուկասյանին ծեծելով մահվան հասցնելու գործի քննությունը Շիրակի մարզի առաջին ատյանի դատարանում շարունակվում է։ Այսօր միջնորդություններ է ներկայացրել ամբաստանյալ Անդրեյ Ռազգիլդեևի պաշտպանը։ Միջնորդությունները վերաբերել են գործով առկա ապացույցների շարքում մի քանիսն անթույլատրելի ճանաչելուն։ Մինչ միջնորդությունների քննությանն անցնելը հրապարակվել է դիմումը, որը դատարանին  են ներկայացրել  տուժողի իրավահաջորդի ներկայացուցիչները, որոնք այսօր դատարան չէին եկել, փոխարենը՝ երկու օր առաջ դիմում են ներկայացրել դատավորին ու պարզաբանել, թե որն է իրենց բացակայության պատճառը։

Դատական նիստերին հրաժարվում են ներկայանալ, քանի որ, ըստ նրանց, դատավարությունն ընթանում է կողմերի իրավահավասարության  և մրցակցային դատավարության  հիմքերի խախտումներով։ Խոսքը, մասնավորապես, դատական նիստերին ամբաստանյալ Անդրեյ Ռազգիլդեևի հեռավար մասնակցության մասին է։ Ըստ այդմ՝ տուժողի իրավահաջորդի ներկայացուցիչները նշել են, որ հրաժարվում են մասնակցել դատական նիստերին։

Տուժողի իրավահաջորդի ներկայացուցիչների դիմումը հրապարակելուց հետո մի շարք միջնորդություններ ներկայացրեց ռուս զինծառայողի պաշտպանը։ Առաջին միջնորդությունը վերաբերում էր Ռազգիլդեևի հորաքրոջ հետ ունեցած հեռախոսազրույցի վերծանությունը անթույլատրելի ապացույց ճանաչելուն։ Պաշտպանը՝ մեղադրական կողմի մեկնաբանությամբ, նախ ներկայացրեց, թե ինչ է ասվում այդ հեռախոսազրույցում։ Ռազգիլդեևը հորաքրոջը խնդրել է լվանալ իր բաճկոնը։

Հեռախոսազրույցի վերծանությունը, ըստ պաշտպանական կողմի, անթույլատրելի ապացույց է, Նարինե Ռշտունին անթույլատրելի ապացույց է համարում նաև դեպքի մասին մահից առաջ Ջուլիետա Ղուկասյանի տված տեղեկությունները։ Նա հիվանդանոցում, ռենտգեն հետազոտության ժամանակ է պատմել, որ իրեն հետևել է սլավոնական արտաքինով երիտասարդ և ծեծի է ենթարկել։

Ըստ պաշտպանի, Ջուլիետա Ղուկասյանը տեղեկությունները հայտնել է առանց ընթերակաների, որը հարցազրույց անունն է ստացել, իսկ Քրեական դատավարության օրենսգրքում  հարցազրույց տերմին չկա։ Բացի դրանից, կազմված արձանագրությունը Ջուլիետա Ղուկասյանը չի ստորագրել, որովհետև ի վիճակի չի եղել։ Պետմեղադրողն էլ նշեց, որ ծանր մարմնական վնասվածքներով հիվանդանոց դիմած տուժածի դեպքում պարտավոր են եղել գործել արագ։

«Անհրաժեշտ է եղել արագ բուժօգնություն ցուցաբերել տուժածին և այդ պայմաններում ընթերականեր ապահովելը գրեթե անհնար  էր։ Նաև կարևոր է, թե որտեղ է ստացվել տվյալները տուժածից՝ բուժօգնության սենյակում, ռենտգեն կաբինետում։ Գտնում եմ, որ որևէ էական խախտում համարել չի կարելի, և միջնորդությունը ենթակա է մերժման»,-դատարանում ասել է  պետմեղադրող Արամ Եդիգարյանը։

Դատարանը երկու միջնորդությունների մասով կողմերի կարծիքները լսեց, բայց  դրանք բավարարելու կամ մերժելու որոշում չկայացրեց։ Միջնորդություններին դատարանը կանդրադառնա վերջնական ակտի կայացման ընթացքում։

Մերժելու որոշում կայացվեց 3 վկաներին նորից ծանուցելու և նրանց դատարանում հարցաքննելու մասին պաշտպանի միջնորդությունը։ Խոսքը Հանրապետությունից բացակայող 3 վկաների մասին է, որոնցից երկուսը Ռազգիլդեևի ծառայակիցներն են եղել և հիմա արդեն Գյումրիում տեղակայված ռազմաբազայում չեն ծառայում։