Շիրակի մարզում վարչատարածքային բաժանման փոփոխություն տեղի կունենա

Շիրակի մարզում խոշորացումից հետո կձևավորվի 5 համայնք՝ Աշոցք, Ամասիա, Ախուրյան, Արթիկ և Անի։ Վարչատարածքային բաժանման մասին օրենքի համաձայն, վերականգնվում են նախկին շրջանները։ Խոշորացվող համայնքների կազմում ընդգրկվում են այն բնակավայրերը, որոնք խորհրդային տարիներին եղել են համանուն նախկին շրջանի կազմում։ Ըստ այդմ՝ Շիրակի մարզում բնակավայրի կարգավիճակ են ստացել վաղուց չբնակեցված գյուղերը, նաև մեկ գյուղի վարչատարածքային բաժանման փոփոխություն է տեղի ունեցել։ Խոսքը Հողմիկ գյուղի մասին է, որը մինչև 2016 թվականը Ամասիայի տարածաշրջանի մաս էր կազմում, խոշորացման առաջին փուլից հետո ընդգրկվեց Աշոցքի տարածաշրջանի Սարապատ համայնքի կազմում։ Հիմա կրկնակի խոշորացումից հետո Հողմիկը կրկին վերադարձվում է Ամասիային։

Ամասիայի տարածաշրջանում գյուղը մնացել է մինչև 2016 թվականը, երբ համայնքների խոշորացման առաջին փուլը մեկնարկեց ու հողմիկցիները որոշեցին Սարապատ համայնքի մաս կազմել, որը զուտ աշխարհագրորեն իրենց ավելի մոտ էր։

«5 տարի առաջ, երբ ձևավորվեց Սարապատ համայնքը, ես իմ կարծիքն եմ հայտնել, որ աշխարհագրորեն ավելի հարմար է, որ Հողմիկը միանա Սարապատին։ Հարցը դրվել է քննարկման, գյուղում համաձայնություն են տվել։ Եթե հիմա Սարապատ համայնքը չլուծարվեր, ես էլի նույն կարծիքին կմնայի։ Մենք Աշոցքին էլ, Ամասիային էլ սահմանակից ենք… Միայն թե Ամասիա հասնելու ենք խորհրդային տարիներից մնացած վատ ճանապարհով»,- SHANTNEWS-ին ասել է Հողմիկ գյուղի վարչական ղեկավար Աշոտ Կյուրեղյանը։

Հիմա Հողմիկը նորից վերադարձվում է Ամասիային։ Կրկնակի խոշորացման արդյունքում Ամասիայի տարածաշրջանի 26 գյուղերը միավորվում են մեկ՝ Ամասիա համայնքի կազմում։ Խոշորացման այս փուլով վերականգնվում են նախկին շրջաններն իրենց բնակավայրերով, իսկ Հողմիկը Ամասիայի տարածաշրջանի մաս է կազմել։

«Ի սկզբանե Շիրակի մարզում համայնքների խոշորացման հետ կապված քննարկվել է մի քանի տարբերակ՝ փնջային տարբերակներ, բայց ի վերջո կառավարության որոշմամբ և վարչատարածքային բաժանման մասին օրենքով ընդունվեց նախկին շրջանային համակարգը։ Այսինքն` ինչ շրջաններ, որ ունեցել ենք մարզում,այդ մոդելն ընդունվեց։ Քանի որ նորից միավորումը շրջանային մոդելով է գնում, բնականաբար, Հողմիկը ընդգրկվել է Ամասիա խոշորացվող համայնքի կազմում»,- SHANTNEWS-ին ասել է Շիրակի մարզպետարանի ՏԻՄ և հանրապետական գործադիր մարմինների հարցերով վարչության պետ Արամ Անտոնյանը։

Վարչատարածքային բաժանումով բնակավայրի կարգավիճակ են ստացել նաև չբնակեցված գյուղերն Ամասիայում և Ախուրյանում։ Ամասիա խոշորացվող համայնքի կազմում 26 բնակավայր է, դրանցից 19-ն է բնակեցված։ Դատարկ գյուղերը նախկինում էլ հարևան համայնքի վարչական միավոր են համարվել։

Չբնակեցված գյուղերի հաշվարկը բնակավայրերի ընդհանուր թվի մեջ կարևոր է խոշորացվող համայնքներում կուսակցությունների առաջադրումների համար։ Բոլոր բնակավայրերի առնվազն 50 տոկոսի ներկայացվածություն պետք է ապահովեն։

«Երևի նաև օրենսդրության բացի հարց է՝ իմ կարծիքով։ Ճիշտ է, բնակավայր նախկինում անվանվել են, բայց քանի որ բնակիչ չկա, տրամաբանական չէ վարչական ղեկավարի պահանջ ներկայացնել, առավել ևս նաև առաջադրումների ժամանակ անպայման այդտեղից ինչ-որ մեկին ընդգրկելու պահանջը»,- ասել է Արամ Անտոնյանը։

Թերի  բնակեցված կամ ամբողջությամբ դատարկ 6 գյուղ Ամասիայի տարածաշրջանում կա, ևս երկուսը՝ Ախուրյանում։ Դատարկ գյուղերը խոշորների հետ հավասար բնակավայրի կարգավիճակում են, միայն մեկ տարբերությամբ, որ այդ գյուղերը վարչական ղեկավարներ չեն ունենալու։