Շիրակի մարզում դեկտեմբերի 5-ի ՏԻՄ ընտրությունների տեղամասային կենտրոններն ու հանձնաժողովների կազմը հայտնի են

Դեկտեմբերի 5-ին Շիրակի մարզի ՏԻՄ ընտրություններում Աշոցքում կբացվի 26, Ամասիայում՝ 19, Ախուրյանում՝ 38 և Արթիկում 34 ընտրատեղամաս։ Տարածքային ընտրական հանձնաժողովները տեղամասային կենտրոնները համարակալել են և ձևավորել հանձնաժողովները։ Խոշորացվող համայնքներում տեղամասերի թիվը չի համապատասխանում բնակավայրերի թվին։ Պատճառը վարչատարածքային բաժանումն է, համաձայն որի՝ Ամասիայում և Ախուրյանում բնակավայրի կարգավիճակ են ստացել լքված գյուղերը, որտեղ բնակիչներ չկան, հետևաբար, տեղամասեր չեն ձևավորվելու։

Տարածաշրջանների գյուղերը խոշորացվող համայնքների կազմում բնակավայրի կարգավիճակ են ստանում։ Բնակավայրի կարգավիճակ ունեն նաև բոլոր այն գյուղերը, որոնք տարիներ առաջ են լքվել։ Բնակիչներ չկան, մնացել են միայն դրանց անունները։ Ամասիայում այդպիսի 7 գյուղ կա։

Տարածաշրջանների գյուղերը խոշորացվող համայնքների կազմում բնակավայրի կարգավիճակ են ստանում։ Բնակավայրի կարգավիճակ ունեն նաև բոլոր այն գյուղերը, որոնք տարիներ առաջ են լքվել։ Բնակիչներ չկան, մնացել են միայն դրանց անունները։ Ամասիայում այդպիսի 7 գյուղ կա։

«Ամասիա խոշորացվող համայնքը ընդգրկելու է 26 բնակավայր, բայց ունենալու ենք միայն 19 տեղամասային կենտրոն։ 7 գյուղեր քարտեզի վրա են մնացել, միշտ ունեցել են բնակավայրի կարգավիճակ, բայց այդտեղ բնակիչներ չկան, գրանցված մարդիկ չկան։ Այդ գյուղերում, բնականաբար, տեղամասային կենտրոններ չեն բացվի»,- SHANTNEWS-ին ասել է թիվ 30 տարածքային ընտրական հանձնաժողովի նախագահ Արթուր Խաչատրյանը։

Նաև Ախուրյան խոշորացվող համայնքի երկու բնակավայրերում տեղամասային կենտրոններ չեն ձևավորվի։ Հացիկ կայարանի և Ախուրյան կայարանի մի քանի բնակիչները քվեարկելու են հարևան գյուղերում։ Թիվ 32 տարածքային ընտրական հանձնաժողովը մեկից ավելի տեղամասային կենտրոններ ձևավորել է խոշորացվող համայնքի ամենամեծ բնակավայրերում։

Հստակեցվում ու ճշգրտվում է ընտրողների թիվը։ Ընտրացուցակներից հանվել են այն ընտրողների անունները, որոնց անձնագրի վավերականության ժամկետը 6 ամսից ավելի է՝ լրացել է։ Արդյունքում ընտրողների թիվն էականորեն փոխվել է։

Թիվ 32 տարածքային հանձնաժողովի նախագահը ներկայացնում է գրանցված երեք քաղաքական ուժերի թեկնածուների թիվը։ 4-րդի՝ «Իկիլիկյան » կուսակցությունների դաշինքնի գրանցումն այս պահին անվավեր է ճանաչվել։ Հանձնաժողովը դաշինքին գրանցել էր, օրեր անց գրանցումն անվավեր ճանաչող որոշում կայացրել։ Հանձնաժողովի նախագահը խոստովանում է՝ իրենք են վրիպում թույլ տվել, հետո որոշել են սխալն ուղղել։

«Ախուրյան համայնքը ընդգրկում է 35 բնակավայր, այսինքն՝ կուսակցություններն ու դաշինքներն ավագանու ցուցակներում պետք է ներգրավված ունենան թեկնածուներ առնվազն 18 բնակավայրերից։ Մեր հանձնաժողովի անդամը փաստաթղթերը նայելիս հաշվել էր 18 բնակավայր։ Հետո նույն հանձնաժողովականը նկատել է, որ «Իկիլիկյան» կուսակցությունների դաշինքը 14 բնակավայրի ներկայացվածություն է ապահովել։ Հրավիրել ենք արտահերթ նիստ, որոշում ենք կայացրել գրանցումն անվավեր ճանաչելու մասին։ Վրիպում է եղել մեր հանձնաժողովի անդամի կողմից»,- SHANTNEWS-ին ասել է թիվ 32 տարածքային ընտրական հանձնաժողովի նախագահ Ներսես Մարգարյանը։

«Իկիլիկյան» կուսակցությունների դաշինքը գրանցման հարցը երկու անգամ է դատարանում վիճարկել։ Դատական առաջին վճիռը հօգուտ «Իկիլիկյան» դաշինքի է եղել, երկրորդը՝ հակառակը։ Հիմա գործը կրկին դատարանում է։ Հերթական վճիռը վաղն է կայացվելու, ըստ այդմ՝ պարզ կդառնա, թե Ախուրյանում քանի ուժ է պայքարելու ավագանու կազմում մանդատ ստանալու համար։