Գրիպի համավարակի վտանգը մեծացել է. ԱՀԿ

Վերջին 7 տարիներին Եվրոպայում սեզոնային գրիպի դեմ պատվաստման ցածր մակարդակը  ամենամյա համաճարակների դեպքում համավարակի վտանգը մեծացնում է: Նման կարծիք է հայտնել Առողջության համաշխարհային կազմակերպությունը, որն ուսումնասիրել է Եվրամիության 29 երկրի և Եվրոպական տարածաշրջանի ևս 21 երկրի տվյալներ:

«Գրիպի կանխարգելման համար առավել արդյունավետ միջոցը պատվաստումն է: Սակայն, ըստ հետազոտությունների՝ Եվրոպական տարածաշրջանի մի շարք երկրներում պատվաստման ընդգրկման մակարդակը նկատելիորեն նվազում է: Սա հատկապես վտանգավոր է տարեցների և քրոնիկական հիվանդություններով տառապող հիվանդների համար: Իսկ ապագայում հնարավոր է՝ ամբողջ բնակչության համար, քանի որ համավարակային պատվաստանյութերի արտադրումը սերտորեն կապված է սեզոնային պատվաստանյութերի օգտագործման հետ», – ասել է ԱՀԿ Եվրոպայի հարցերով տնօրեն Ժուժաննա Յակաբը:

SHANTNEWS-ի հետ զրույցում ՀՀ գլխավոր վարակաբան Արա Ասոյանը նշեց. «Հայաստանում գրիպի դեմ սեզոնային պատվաստումները չեն նվազել: Աշնանը պատվաստումները կատարվել են բավակաին լուրջ քանակով: Պատվաստումներն արվել են պետության կողմից անվճար՝ բոլոր ռիսկային խմբերում՝ այդ թվում հիվանդանոցների ընդունարանների, պոլիկլինիկաների, շտապօգնության աշխատակիցների, տարեցներն ու երեխաների շրջանում»:

ՀՀ ԱՆ Հակահամաճարակային տեսչության գլխավոր մասնագետ Լիանա Թորոսյանն էլ մեզ հետ զրույցում թվային տվյալներ ներկայացրեց.

«2014-15թթ.-ի գրիպի սեզոնին բերվել է 25 000 դոզա գրիպի դեմ պատվաստանյութ և ապահովել է 100% բաշխվածություն: 2015-16 թթ.-ին երկիր է ներկրվել 15 000 դոզա պատվաստանույութ, ապահովելով 98% ընդգրկվածություն: 2016-17 թթ.-ին նեկրվել է 20 000 դոզա և ապահովել 100% ընդգրկվածություն, իսկ 2017-18թթ.-ին Հայաստան ներկրված 110 000 դոզա պատվաստանյութից, այս պահի դրությամբ, արդեն իսկ բաշխվել է 79%-ը, բայց գործընթացը դեռևս շարունակվում է: Ընդհանրապես 95%  և ավելի ընդգրկվածության դեպքում, արդեն իսկ, կարող ենք ասել, որ առաքելությունը կատարված է»:

Հիշեցնենք, որ Եվրամիության անդամ բոլոր երկրները փաստաթուղթ են ստորագրել, որը նպատակ ուներ ուժեղացնել սեզոնային գրիպի դեմ պայքարը և ընդգրկել ռիսկի խմբերի մեջ մտնող մարդկանց 75%-ին: Նպատակը, սակայն, չի իրագործվել՝ հանգեցնելով տարեցների մահացության թվի աճին: