Անցանկալի պաշտոնյաների ցուցակ չունեմ․ աշխատանքից ազատել եմ միայն հայեցողական պաշտոն զբաղեցնողներին․ Գյումրիի քաղաքապետի պաշտոնակատար

Գյումրիի քաղաքապետի նոր պաշտոնակատար Ալբերտ Մարգարյանի որոշումներով աշխատանքից ազատվել են քաղաքապետարանի 5 աշխատակիցներ։ Բոլորը զբաղեցրել են հայեցողական պաշտոններ։ Քաղաքապետի աշխատասենյակի դռանը փակցված ցուցանակն արդեն հանված էր, իսկ ընդունարանի  աշխատակցուհին նոր էր։ Նախկին քաղաքապետի անունով  ցուցանակն էլ դարձել էր գործավարուհուն  աշխատանքից ազատելու պատճառ։

«Առաջին օրը հանվեց ցուցանակը, երկրորդ օրը ես եկա աշխատանքի, ու ցուցանակը տեղում էր։ Իմ օգնականը խնդրեց գործավարին, որպեսզի ցուցանակը նորից հանի՝ բացատրելով, որ չի կարելի՝ այդ ցուցանակի դռան հետևում նստած է այլ մարդ, Սամվել Բալասանյանը նստած չէ։ Նորից հանեցին ցուցանակը, երրորդ օրը, այսինքն՝ երեկ, ես նորից  առավոտյան եկա աշխատանքի, տեսնեմ ցուցանակը նորից տեղում է, այսինքն՝ երեք անգամ ցուցանակը հանվեց-տեղադրվեց, հանվեց-տեղադրվեց, դրա համար ես գործավարին ազատել եմ աշխատանքից»,- SHANTNEWS.am-ի թղթակցի հետ զրույցում ասել է  Գյումրիի քաղաքապետի պաշտոնակատար Ալբերտ Մարգարյանը։

Աշխատանքից ազատվածների թվում է ֆինանսատնտեսագիտական բաժնի երկարամյա պետ Լենա Ջիլավյանը։ Վերջին երկու ամիսներին նա զբաղեցնում էր քաղաքապետի ֆինանսական գծով խորհրդականի պաշտոնը։ Ջիլավյանը համայնքային ծառայողի պաշտոնից նշանակվել է հայեցողական պաշտոնի, ինչն էլ քաղաքապետի պաշտոնակատարին իրավունք է  տվել նրան աշխատանքից ազատելու։

«Ազատվելուց հետո տիկին Ջիլավյանը ինձ խնդրել է, որ  իրեն  տրամադրեմ սենյակ, որպեսզի  իր փաստաթղթերը ինքը տեղադրի։ Բանալին տվել ենք իրեն, որպեսզի իր մոտ մնա, հետագայում ինքը կամաց-կամաց այդ փաստաթղթերը հանձնի իրավահաջորդներին։ Պարզապես տիկին Ջիլավյանի վերաբերյալ շատ արձագանք եղավ, որովհետև սխալ տեղեկատվություն էր տարածվել, որ, իբր, տիկին Ջիլավյանը  ֆինանսական բաժնի պետ է, համայնքային ծառայող, որին ես ազատելու իրավունք իրոք չունեի, բայց նա եղել է խորհրդական, և խորհրդականին ազատելու բոլոր հիմքերը ես օրենսդրությամբ սահմանված կարգով ունեցել եմ»,- նշել է Ալբերտ Մարգարյանը։

Քաղաքապետի  պաշտոնակատարը  աշխատանքից ազատել է նաև քաղաքապետի օգնականին, անցագրային բաժնի աշխատակցուհուն և նախկին քաղաքապետի վարորդին։

Քաղաքապետարանում ոչ բոլոր հայեցողական պաշտոններ զբաղեցնողներն են աշխատանքից ազատված։ Շարունակում են պաշտոնավարել նախկին քաղաքապետի մամուլի քարտուղարը, օգնականն ու ևս մեկ խորհրդական։ Խոսակցություններն այն մասին, որ Ալբերտ Մարգարյանը  անցանկալի պաշտոնյաների ցուցակ ունի, որոնցից պետք է ազատվի, անհիմն է համարում։

«Ճիշտն ասած՝ այդ ցուցակը ես էլ եմ փնտրում, բայց չեմ գտնում, ո՛չ իմ գրպաններում է, ոչ էլ՝  դարակներում։ Չկա նման ցուցակ, չի էլ կարող լինել նման ցուցակ»,- նշել  է քաղաքապետի պաշտոնակատարը։

Քաղաքապետարանում վերջին երեք օրերի ընթացքում կատարված կադրային ու անցագրային փոփոխությունները նաև քաղաքապետի պաշտոնակատարի և քաղաքապետի տեղակալ Ռուբեն Սանոյանի միջև վեճի առիթ են տվել։ Ալբերտ Մարգարյանը այս մասին  կարճ ու կոնկրետ նշեց՝ Ռուբեն Սանոյանի հետ խոսել ու հասկացել ենք իրար։

Ալբերտ Մարգարյանը մարզպետարանի քաղաքաշինության վարչությունն էր ղեկավարում 1996 թվականից, աշխատել է Շիրակի բոլոր 12 մարզպետների հետ։ Նոյեմբերին կենսաթոշակային տարիքը լրանում է։ Չի թաքցնում՝ ցանկանում է մնալ ու աշխատել քաղաքապետարանում։

«Ես չեմ կարող քաղաքապետարանում աշխատել համայնքային ծառայող, որովհետև նույն տարիքային սահմանափակումն այս դեպքում էլ է գործում։ Որևէ այլ պաշտոնի կմնամ, թե չեմ մնա, դա արդեն որոշելու է նոր եկող համայնքի ղեկավարը։ Իհարկե, կուզենամ մնալ ու աշխատել, չեմ ուզում տուն գնալ, տանը նստել»,- նշել է նա։

Հոկտեմբերի 17-ին Գյումրիում տեղի կունենան  ՏԻՄ ընտրություններ։ Ավագանու 33 անդամ է ընտրվելու, որոնք էլ իրենց հերթին ընտրելու են քաղաքապետ։ Ավագանու որոշմամբ՝ նոր քաղաքապետ ընտրվելու պահից քաղաքապետի պաշտոնակատարի լիազորությունները կդադարեցվեն։