Ալիևը համանախագահներին խոստացել է շարունակել բանակցությունները

ԵԱՀԿ Մինսկի խմբի համանախագահների հետ հանդիպման ժամանակ Ադրբեջանի նախագահ Իլհամ Ալիևը պայմանավորվել է Արցախյան հակամարտության կարգավորման շուրջ բանակցությունները շարունակել նախագահական ընտրություններից հետ։ Այս մասին հայտարարել է Ադրբեջանի ԱԳՆ խոսնակը։

Նրա խոսքով՝ քննարկումները եղել են Հայաստանի և Ադրբեջանի նախագահների՝ Կրակովում անցկացրած նախորդ հանդիպմանը եղած մտքերի շուրջ։  Իլհամ Ալիևը խոստացել է բանակցությունները շարունակել «Հայաստանում և Ադրբեջանում անցկացվելիք նախագահական ընտրություններից հետո»։

Տեղին է շեշտել, որ Ադրբեջանն առաջին անգամ չէ, որ հրաժարվում է կատարել խոստումները։ Ամենաթարմ օրինակներից են Ապրիլյան պատերազմից հետո 2016 թվականին Վիեննայում և Սանկտ Պետերբուրգում տեղի ունեցած հանդիպումների ժամանակ ձեռք բերված պայմանավորվածությունները, որոնք Ադրբեջանն այդպես էլ չկատարեց։

Խոսքը շփման գծում հետաքննող մեխանիզմների ներդրման, ինչպես նաև ԵԱՀԿ դիտորդական առաքելության (Կասպրշիկի խումբը) հնարավորությունների մեծացման որոշումներն էին, որոնցից Ադրբեջանի նախագահը հրաժարվեց Բաքու մեկնելուց հետո։

Այս պայմանավորվածությունների խախտումների մասին խոսելիս 2018-ի հունվարին ՀՀ ԱԳ նախարարը հայտարարեց, որ «դիտորդական առաքելության ակտիվացումը, դիտորդների քանակի ավելացումն ու դիտարկումների հաճախացումը կարող են նվազեցնել լարվածությունը», սակայն Ադրբեջանը շարունակաբար խախտում է այդ պայմանավորվածությունները։ Էդվարդ Նալբանդյանը հույս հայտնեց, որ նույն ճակատագրին չեն արժանանա Կրակովի պայմանավորվածությունները։

«Հույս ունենանք, որ այդ պայմանավորվածությունը կիրագործվի, և ադրբեջանական կողմը հետքայլ չի կատարի։ Ինչ վերաբերում է հետաքննական մեխանիզմի ստեղծմանը, դրա մասով ոչ միայն Վիեննայում է եղել պայմանավորվածություն, այլև վերջին 8 տարում է մշտապես փորձ արվել նման որոշման գալ։ Ադրբեջանը, սակայն, հրաժարվել է սրանից», — նշել է Նալբանդյանը։

Ինչ վերաբերում է Ադրբեջանի նախագահական ընտրություններին, ապա կարծիք կա, որ Իլհամ Ալիևը հենց այս պատճառով է ընտրությունները հոկտեմբերից տեղափոխել ապրիլ։ Սա ոչ միայն ընդդիմությանը ցայտնոտի մեջ գցելու համար էր, այլ նաև Հայաստանի նոր ձևավորվող իշխանությունների հետ հավասար պայմաններում բանակցությունները շարունակելու փորձ։

«Հայաստանում էլ ընտրական գործընթաց չէ, բայց Հայաստանը անցում է կատարում հանրապետության կառավարման բոլորովին նոր համակարգի։ Եվ այս իմաստով, միգուցե, Իլհամ Ալիևն էլ ցանկանում է հնարավորին շուտ ավարտել քաղաքական գործընթացն Ադրբեջանի ներսում, որպեսզի կարողանա հավասար պայմաններով շարունակել հայկական կողմի հետ բանակցությունները», — այսօր լրագրողների հետ հանդիպմանը նշեց վերլուծաբան Վարդան Ոսկանյանը։

Ոսկանյանի խոսքով, սակայն, ընտրությունները տեղափոխելու ևս մի քանի պատճառ ուներ Ադրբեջանի գործող նախագահը։ Դրանցից մեկը միջազգային հանրության ուշադրությունից ու Ռուսաստանի միջամտությունից խուսափելն էր։ Մեկ այլ նպատակ էր ընդդիմությանը պատրաստվելու ժամանակից զրկելը։ Այլ վերլուծաբանների նշած մեկ տասնյակից ավելի պատճառ էլ կարող եք տեսնել այստեղ։

Հիշեցնենք, որ Ադրբեջանի նախագահական հերթական ընտրությունները նախատեսվում էր անցկացնել այս տարվա հոկտեմբերին։ Սակայն գործող նախագահի որոշմամբ՝ դրանց փոխարեն այս տարվա ապրիլին կանցկացվեն արտահերթ ընտրություններ։ Սահմանադրության մի քանի փոփոխություններն Իլհամ Ալիևին թույլ կտան ապրիլին 4-րդ անգամ առաջադրվել նախագահի պաշտոնում։