Երկրից մինչև Մարս. 21-րդ դարի գյուտարար-միլիարդատերը. Իլոն Մասկ

Երազանքները կյանքի կոչողը

Ընկերություն ստեղծելը տորթ թխելու նման մի բան է: Պետք է ունենաս բոլոր բաղադրիչները համապատասխան քանակությամբ: 

                                                                                                                                         Իլոն Մասկ 

Իլոն Մասկ. մարդ, որի երազանքներն ու նպատակները ուղղված են դեպի ապագան: Tesla, Space X, OpenAI, Neuralink, SolarCity, Zip2, X.com… Մասկի անունը կապված է թվարկված նորարարական  բոլոր ընկերությունների հետ և ոչ միայն:

Հարավաֆրիկյան-կանադական-ամերիկյան բիզնես մագնատ, ինժեներ, գյուտարար, ներդնող Իլոն Մասկն այնպիսի նորարարությունների հեղինակ է, որոնք հսկայական ազդեցություն են թողել տեխնոլոգիաների ոլորտում:

Իր առաջին միլիոնը Մասկը վաստակել է դեռ նախքան 30 տարեկան դառնալը: Այժմ Մասկի կարողությունը կազմում է ավելի քան 20 մլրդ ԱՄՆ դոլար: Չնայած Մասկի անունը նշվում է աշխարհի ամենահարուստ մարդկանց ցուցակում, սակայն նա հայտնի է ոչ թե իր հարստությամբ, այլ առաջին հերթին իր նորարարական գաղափարներով, և որն ամենակարևորն է՝ դրանք կյանքի կոչելով: Իլոն Մասկը ցանկանում է փոխել աշխարհը և մարդկությունը:

Երբ Իլոն Մասկը երեխա էր, ծնողները կարծում էին, թե նա խուլ է, քանի որ խոսում էին նրա հետ, իսկ նա հայացքը հառում էր դեպի անհայտ հեռուները և երազում: Իլոն Մասկի մայրը հաճախ է հիշում, որ որդին, ասես, մեկ այլ աշխարհ էր տեղափոխվում: Սակայն այժմ նա գիտի, որ նման պահերին Մասկին պետք է հանգիստ թողնել. գուցե, նա մտքում նոր հրթիռ է նախագծում:

Մասկի մանկությունն անցել է Հարավաֆրիկյան Հանրապետությունում: Ինչպես շատ երեխաներ, փոքր հասակում նրան հասակակիցները «նեղում» էին: 41 տարեկանում Մասկը ստիպված էր վիրահատել թեք միջնապատը՝ այդ կռիվների հետևանքը:

Որքան էլ Մասկը նման էր այլ երեխաներին, նա նաև տարբերվում էր: Ծրագրավորմամբ սկսել է հետաքրքրվել 9 տարեկանում, իսկ 12 տարեկան հասակում՝ 1984թ.-ին, Մասկը գրել և վաճառել է իր սեփական վիդեո խաղը:

Երիտասարդ հասակում Մասկը տեղափոխվում է ԱՄՆ՝ Փենսիլվանիայի համալսարանում սովորելու:

Zip2, X.com

Մինչև միլիոնատեր դառնալը Մասկը երկար ճանապարհ է անցել: Ուսանողական տարիներին նա համակարգիչների մասեր էր վաճառում, համակարգիչներ նորոգում: 1995թ. Մասկն ընդունվում է Սթենֆորդի համալսարանի ֆիզիկայի բաժնում ուսումը շարունակելու, սակայն հասկանալով, որ ինտերնետը հասարակությունը փոխելու բավականին մեծ ներուժ ունի՝ Մասկը հրաժարվում է ասպիրանտուրայից և եղբոր հետ հիմնում Zip2 ընկերությունը, որն ընդամենը 4 տարի անց վաճառում է 22 մլն դոլարով: Zip2-ի վաճառքից հետո Մասկը ստեղծում է X.com-ը, որը հետագայում միաձուլվում է իր մրցակից Confinity-ի հետ, և ընկերությունը վերանվանվում է PayPal. 

Tesla

Մասկի ամենահայտնի նորարարություններից մեկը, թերևս, Tesla ընկերության առաջարկած էլեկտրական ավտոմեքենան է, որը մեծ պահանջարկ է վայելում իր բնապահպանական առավելությունների շնորհիվ: Tesla-ի Model 3 ավտոմեքենան վաճառվում է՝ սկսած 35 հազ դոլարից:

Space X

Դժվար է Իլոն Մասկի անունը տարանջատել Space X-ից: 2002թ. հիմնադրված ընկերությունը նպատակ ունի գաղութացնել Մարսը: Իսկ 2018թ. փետրվարի 6-ին Space X-ը արձակեց Falcon Heavy հրթիռը, որը մինչ օրս եղած հրթիռներից ամենահզորն է և ունի ամենամեծ բեռնունակությունը: Հրթիռի առաջին թռիչքը մեծ հաջողությամբ է պսակվել: Իլոն Մասկը տիեզերք է ուղարկել Tesla Roadster կարմիր կաբրիոլետը, որն ուղարկվել է Արեգակից մինչև Մարս ձգվող էլիպսային ուղեծիր:

Hyperloop

Իլոն Մասկի մտահղացումներից ևս մեկն է Hyperloop-ը, որը մասամբ վակուումային խողովակի միջով սրընթաց ճանապարհորդություն է: Երբ փոխադրման այս համակարգն իրականություն դառնա, մարդիկ հնարավորություն կունենան ճանապարհորդության ժամանակը նվազեցնել՝ մի քանի ժամից մի քանի րոպեի: Դա 4 անգամ ավելի արագ կլինի, քան կոմերցիոն թռիչքը: 

Solar City

SolarCity-ն վերականգնվող էներգիայի արտադրության ոլորտում ամենախոշոր ընկերություններից մեկն է: Այն արտադրում և տեղադրում է արեգակնային էներգիայի պանելներ ողջ ԱՄՆ-ում: 2016թ. ընկերությունը միաձուլվել է Tesla-ի հետ:

Որոնումներ՝ հիմնվելով գտնվելու վայրի վրա

Մենք բոլորս գիտենք, թե ինչպես են Google-ը և տեխնիկական ոլորտի այլ հսկաներ որոնումներ իրականացնում՝ հիմնվելով մարդկանց գտնվելու վայրի վրա: Սակայն այս ամենի գաղափարը ծնվել է հենց Իլոն Մասկի մտքում դեռևս 1998թ.-ին:

Մասկը նաև ստեղծել է Musk Foundation-ը. հիմնադրամն աջակցում է նոր գաղափարներով լի երիտասարդներին և դրամաշնորհներ է տրամադրում այնպիսի ծրագրերի համար, որոնք զբաղվում են վերականգնվող էներգիային, տիեզերքին, մանկական հիվանդություններին առնչվող ուսումնասիրություններով: 

Կանայք

Բուռն գործարար կյանքով ապրող Իլոն Մասկի անձնական կյանքն էլ պակաս բուռն չի եղել: Նա առաջին կնոջ՝ Ջասթին Ուիլսոնի հետ ծանոթացել է Օնտարիոյում ուսանելու տարիներին: Նրանք ամուսնացել են 2000թ.-ին, սակայն 2008թ.-ին ամուսնալուծվել են:

Երկրորդ կնոջ՝ դերասանուհի Թալուլա Ռայլիի հետ նա ամուսնացել է 2010թ: Զույգը 2012-ին ամուսնալուծվել է, սակայն 2013-ին՝ կրկին ամուսնացել: Նրանք վերջնականապես բաժանվել են 2016թ.-ին:

Այնուհետև Մասկը սկսել է հանդիպել դերասանուհի Էմբեր Հըրդի հետ, որից բաժանվել է մեկ տարի անց:

Երեխաները

Մասկն առաջին կնոջից ունի 5 որդի՝ զույգ և եռյակ: 

2010թ. տված հարցազրույցներից մեկում Իլոն Մասկը որդիներին անվանել է «իր կյանքի սերը»:

                                                                                                                    Պատրաստեց Սյուզաննա Չրաղյանը