Պարտքերի մարման պահանջ՝ խմելու ջրի դիմաց․ այս պայմանով Լուսաղբյուր գյուղը ջրամատակարարման նոր ցանցով խմելու ջուր է ստանում

Պարտքերի մարման պահանջ՝ խմելու ջուր ունենալու դիմաց․․․ Այս պայմանով են միայն Լուսաղբյուր գյուղի տնտեսությունները ջրամատակարարման նոր կառուցված ցանցով խմելու ջուր ստանալու։ Այժմ բաժանորդ են նրանք, ովքեր համայնքային բյուջեի նկատմամբ ունեցած հարկ ու տուրքի նախկին պարտքերը փակել են։ Բնակիչները համայնքի ղեկավարների պայմանին համաձայնել են, միայն թե 40 տարի անց խմելու ջուր ունենան տներում։ Գյուղի 300 տնտեսությունների մեծ մասը դեռ խմելու ջրին է սպասում։ Կա տնտեսություն, որ  մինչև 500 հազարի հասնող պարտքեր ունի։ Ջրամատակարարման ցանցի բաժանորդ դառնալու համար պարտավորվել  են մաս-մաս վճարել:

Գյուղի անունն իսկ հուշում է, որը Լուսաղբյուր են կոչել հարուստ ջրային ռեսուրսների համար։ Միայն թե «լույս» աղբյուրները այս վերջին տարիներին սկսել են ցամաքել: Վաչե Բարսեղյանը լավ է հիշում, թե իր պապը, հետո հայրը ինչպես են տան բակում ջրհորներ փորել ու ջուր հանել։ Կենտրոնացված ջրամատակարարման ցանց ունենալ համայնքը վաղուց էր պահանջում։ Մեկ տարի առաջ գյուղի համար խմելու ջրագիծ անցկացնելու ծրագիրը վերջապես հաստատվեց։

Լուսաղբյուրի մոտ 300 տնտեսությունից առայժմ 50-ն է, որ ջրամատակարարման նոր ցանցից օգտվում է, մյուսներին ևս հերթը կհասնի, պարտքերը մաս-մաս փակում են։ Օգտագործած ջրի դիմաց վճարման կարգը ևս տարբեր է, ավելի հստակ` ընտրվել է արդյունավետ տարբերակ գյուղի ու բնակչի համար։

 «Ջրի դիմաց վճար չկա, կա էլեկտրական հոսանքի վարձ։ Մոտավորապես 1 խմ-ի դիմաց 80-100 դրամ է որոշվել։ Ջուրը խորքային հորից պոմպակայանով մղում է ՕՋԷԿ, որտեղից մենք տեսնում ենք, թե ինչքան խորանարդ մղեցինք, ինչքան էներգիա ծախսվեց»,- SHANTNEWS.am-ի հետ զրույցում ասել է Անի խոշորացված համայնքի զարգացման ծրագրերի համակարգող Կարեն Գրիգորյանը։

Անի խոշորացված համայնքի մի քանի գյուղերում ևս առաջնահերթ լուծման խնդիր է մնում խմելու ջրի ապահովումը։ Սարակապ, Հայկաձոր, Քարաբերդ, Շիրակավան գյուղերում խմելու ջրի հետ ունեն նաև ոռոգման ջրի լուրջ դեֆիցիտ: Շիրակավանն արդեն սուբվենցիոն հայտ է ներկայացրել ոռոգման ջրի նոր ցանց անցկացնելու համար, մյուս գյուղերում  ծրագրերով դիմելու համար ֆինանսավորման աղբյուրներ են փնտրում:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։