Շինտեխնիկայի և աշխատուժի պակասի պատճառով Գյումրիի Բուլվարային թաղամասում փողոցի հիմնանորոգումը ժամանակավոր դադարեցվել է

Մոտ երկու շաբաթ է՝ դադարեցված է Բուլվարային թաղամասի Դուդկո փողոցի շինարարությունը։ Շինհրապարակից տեխնիկան տարվել է, հիմնական աշխատանքները մնացել են անավարտ։ Ընդամենը 500 մետր երկարության փողոցի նորոգումն ընդգրկված է ՎԶԵԲ-ի փողոցաշինական ծրագրում, հիմնանորոգման ավարտը նախատեսված է նոյեմբերին։

Ապրիլին է սկսվել Դուդկո փողոցի շինարարությունը, 700 մետր երկարության փողոցի 490 մետրն է, ըստ հաստատված նախագծի, ծրագրում ընդգրկված։ Թաղամասի շենքերի բնակիչների բողոքներից հետո էլ  փողոցն ամբողջությամբ չներառվեց ծրագրում։ 5 ամսում շինարարները մայթ են կառուցել, եզրաքարեր շարել ու խճապատել փողոցի մի մասը։

Փողոցի շինարարության ընթացքի անմիջական, այսպես ասած, «հսկիչները» թաղամասի ապրողներն են։ Տեսել են, որ համարյա ամեն օր մեկ-երկու շինարարով են գործն արել, ոչ միայն աշխատուժն է քիչ է եղել, նաև տեխնիկա չեն ունեցել։

«Շատ աշխատուժ չի էլ եղել, երկու-երեք հոգի, ոչ ավելի, երկու բանվոր ու մեկ պրարաբ են աշխատել։ Սաղ քաղաքը էդ կազմակերպությանն են տվել, որ պտի ասֆալտապատե, իրանք էլ չեն հասցնե»,- ասում են թաղամասի բնակիչները։

Քաղաքի փողոցների նորոգումը հիմնականում մեկ շինկազմակերպության ձեռքին լինելու բնակիչների ասածները պատվիրատուն էլ հաստատեց։ Դուդկո փողոցի ու ևս 14 փողոցների կապիտալ շինարարությունն իրականացնում է «Մերձմոսկովյան» շին ընկերությունը։ Քաղաքապետարանի բնակկոմունալ բաժնի պետը դրանում խնդիրներ չի տեսնում, թեկուզ այն, որ կես կիլոմետր երկարության  փողոցում աշխատեն ընդամենը երկու բանվոր։

«Ինչ պետք է շատ  բանվոր  տանեն հավաքեն, ում համար, եթե բորդյուր են շարում, երկու հոգի է պետք կամ երեք հոգի, երկուսը՝ վարպետ, մեկը՝ բանվոր, ինչ պետք է շատ մարդ հավաքեն, կազմակերպությունը  էդ պարապ մարդուն փող պտի վճարի, որ բերեց էնտեղ կանգնեցրեց, եթե էդպես բոլորին վճարեց, ինչ կլինի»,- ասում է Գյումրիի քաղաքապետարանի բնակկոմունալ և շրջակա միջավայրի պահպանության բաժնի պետ Կնյազ Մանասյանը։

Բանվորական ուժի և շինտեխնիկայի խնայողությունները, կոմունալ բաժնի պետը վստահեցնում է՝ փողոցների շինարարության ժամկետների վրա չեն ազդի։ Կնյազ Մանասյանի պնդմամբ՝  Դուդկո փողոցում մեծ գործեր չեն մնացել, հետո էլ շինարարը անվերադարձ չի հեռացել, մի քանի օրից նույն շինընկերության աշխատողները կվերադառնան շինհրապարակ։

«Տեխնիկայի խնդիր կա, էդ կազմակերպությունը բավականին հզոր կազմակերպություն է, բայց նաև ունի Գյումրի քաղաքի տարածքում 15 օբյեկտ, բոլոր օբյեկտներում մեքենա-մեխանիզմները անհրաժեշտ են, հիմնարկությունը չի կարող միաժամանակ բոլոր տեղերում ունենա 15 հատ նույն տեխնիկայից, էսօր էս փողոցում են աշխատում, վաղը մեկ այլ փողոցում կտեղափոխեն ու կաշխատեն։ Երբ որ մի քանի փողոց  կհասցնեն արդեն ասֆալտապատման մակարդակին, միանգամից կասֆալտապատեն»,- ասել է Կնյազ Մանասյանը։

Բավարար շինտեխնիկա և աշխատուժ չունենալով, ամեն դեպքում, միայն Գյումրիում 15 փողոցի շինմրցույթում հաղթել է, 15-ում էլ հասցնում է աշխատել։ Պարոն Մանասյանը նաև հստակեցնում է, որ մրցույթների  գործող կարգում  որևէ սահմանափակում  կամ պարտադիր պայման չկա, պարզվում է՝ գլխավորը  ժամկետներում  ավարտելու պահանջն է, որն էլ  հաղթող կազմակերպությունը կարողանում է  գլուխ բերել՝ ենթակապալառու ընկերություններ ներգրավելով։

2020 թվականից ՎԶԵԲ-ի փողոցաշինական նույն ծրագրով տասնյակից ավելի փողոցներում շինարարությունը  անավարտ է մնում, մի մասը նախատեսվում է մինչև օգոստոսի 31-ը շահագործման  հանձնել։ Բնակկոմունալ բաժնի պետը ամեն դեպքում վստահեցնում է, որ Դուդկո փողոցը անավարտների ցանկը չի համալրի։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։