339 մեդալ, սկանդալներ, համավարակ. ինչո՞վ է նշանավորվել Տոկիո-2020-ը

Օգոստոսի 8-ին ավարտվեցին Տոկիո-2020 ամառային օլիմպիական խաղերը: Համավարակի պատճառով մարզիկները և երկրպագուները ստիպված էին մեկ տարի սպասել Օլիմպիադային, իսկ հանդիսատեսը ստիպված էր համակերպվել բազմաթիվ սահմանափակումների հետ: Ամառային Օլիմպիադայի բացման արարողության նման, փակման արարողությունն էլ անցել է գրեթե առանց հանդիսատեսի:

Չնայած կորոնավիրուսով պայմանավորված սահմանափակումներին՝ մարզադահլիճի մոտ հավաքվել էին մարդիկ: Reuters գործակալության փոխանցմամբ՝ նրանց մի մասը ցուցարարներ էին, որոնք իշխանություներին կոչ էին անում, հաշվի առնելով համավարակը, հրաժարվել Պարալիմպիական խաղերի անցկացումից, որոնք մեկնարկում են օգոստոսի 24-ին: Հավաքվածների մյուս մասն էլ ցանկանում էր անձամբ ներկա գտնվել եզրափակիչ հրավառությանը:

Միջազգային Օլիմպիական կոմիտեի նախագահ Թոմաս Բախը Տոկիո-2020-ն անվանել է հույսի խորհրդանիշ:

«Վստահ եմ, որ խաղերի մասնակիցներից ոչ ոք երբեք չի մոռանա այս Օլիմպիադան: Խաղերը եզակի էին և հույսի խորհրդանիշ էին ամբողջ մոլորակի մարդկանց համար: Մարզիկները շատ երախտապարտ են, որ նման պայմաններում խաղերն ընդհանրապես հնարավոր եղավ անցկացնել: Այս Օլիմպիադան իսկապես հաջողված էր, որովհետև մարզիկները դրան հաղորդեցին օլիմպիական ոգի», – ասել է ՄՕԿ նախագահը:

Ընդհանուր առմամբ, Տոկիո-2020-ի ընթացքում հանձնվել է 339 մեդալ: Մարզիկները մրցում էին 33 սպորտաձևերում: Ոսկե, արծաթե և բրոնզե մեդալների մեկ երրորդը վաստակել է Միացյալ Նահանգները:

CBS Sports-ը հաղորդում է, որ 1996 թվականից ի վեր Միացյալ նահանգները նվաճված մեդալների թվով եղել է առաջատար բոլոր ամառային Օլիմպիական խաղերում, բացի 2008 թվականին Պեկինում անցկացված խաղերից, որտեղ առաջատարը հյուրընկալող կողմն էր՝ Չինաստանը:

Տոկիո-2020-ում Միացյալ Նահանգներին հաջորդում են Չինաստանը, Ճապոնիան, Մեծ Բրիտանիան և Ռուսաստանը:

Բացի սպորտային հուզիչ պահերից, հաղթանակներից և պարտություններից, այս Օլիմպիական խաղերի ընթացքում քիչ չէին նաև սկանդալները և քաղաքական դրաման: Ամենաաղմկոտը, թերևս, բելառուսցի թեթևաթլետուհի Քրիստինա Տիմանովսկայայի հետ կապված միջադեպն էր: Բելառուսի սպորտային ոլորտի պաշտոնյաների սոցցանցերում քննադատելուց հետո Տիմանովսկայային ստիպել էին վերադառնալ հայրենիք: Վազորդուհին դիմել էր ոստիկանություն և օգնություն խնդրել Միջազգային օլիմպիական կոմիտեից: Այժմ Տիմանովսկայան գտնվում է Լեհաստանում, որը նրան հումանիտար վիզա է տրամադրել:

Մեկ այլ սկանդալ էլ ծագել էր խաղերի սկզբում, երբ հրաժարական տվեց ամառային Օլիմպիադայի բացման արարողության ռեժիսորը՝ Հոլոքոստի մասին 1998 թ.-ին արված կատակների համար:

Տոկիո-2020-ը նաև չդարձավ խթան տնտեսության համար, ինչպես նախապես ակնկալում էր Ճապոնիան: Փոխարենը, Reuters-ի փոխանցմամբ, ընդունող կողմը կատարեց 15 միլիարդ դոլարի ծախս և չունեցավ զբոսաշրջիկների հոսք, որպեսզի փակի այդ ծախսերը: Այնուամենայնիվ, սահմանափակումների շնորհիվ Ճապոնիային հաջողվեց խուսափել Օլիմպիական ավանում կորոնավիրուսի մեծ բռնկումից:

Իսկ հաջորդ ամառային Օլիմպիական խաղերը կանցկացվեն Ֆրանսիայի մայրաքաղաքում: Միջազգային Օլիմպիական կոմիտեի նախագահ Թոհաս Բախն Օլիմպիական դրոշը հանձնել է Փարիզի քաղաքապետ Ան Իդալգոյին:

Այս իրադարձությունը մեծ ուրախությամբ են տոնել Ֆրանսիայում: Ինքնաթիռները Փարիզի երկնքում նկարել են երկրի դրոշը, իսկ Էյֆելյան աշտարակի հրապարակում համերգ է անցկացվել արտիստների և հայտնի մարզիկների մասնակցությամբ:

33-րդ Օլիմպիական խաղերը տեղի կունենան 2024 թվականի հուլիսի 26-ից օգոստոսի 11-ը: