Նոր միկրոավտոբուսներով Գյումրիի նոր երթուղային ցանցի գործարկումը դարձյալ ուշանում է

Քաղաքապետարանի տրանսպորտի բաժնում դեռ նոր երթուղիների ուղեգիծն են մշակում, այնինչ 2018 թվականից խոսվում ու քննարկվում է երթուղային ցանցը նորացնելու հարցը։ Նոր ցանց ունենալը  քաղաքային իշխանությունները կապում էին քաղաքում լայնածավալ փողոցաշինական ծրագրի ավարտի հետ, հետո ավտոպարկն էր պետք է թարմացնել։ Այժմ փողոցների մեծ մասը ասֆալտապատ է, իսկ ավտոպարկը 80 տոկոսով համալրվել  է։ Ընդամենը անցած տարի հաջողվեց սուբվենցիոն ծրագրով մասնակի լուծել խնդիրը։ Քաղաքը ձեռք է բերել նոր սերնդի, այսինքն 2021 թվականի արտադրության միկրոավտոբուսներ։

«Ընդհանուր 63 մեքենաներ են, երեք խմբաքանակ արդեն Գյումրիում է, դրանք գրանցվել են համայնքի անվան տակ, մնացածը կբերվեն օգոստոսի 25-ին, որից հետո կանցնենք նոր երթուղային ցանցի ձևավորմանը։ Առայժմ ամեն բան նախնական է, քննարկումների փուլում։ Ըստ այդմ՝ մենք նախատեսում ենք որոշ երթուղիների միավորում»,- SHANTNEWS.am-ի հետ զրույցում ասել է քաղաքապետարանի տրանսպորտի բաժնի պետ Արտյոմ Սարգսյանը։

63 նոր տրանսպորտային միջոցով ինչպիսի՞ երթուղային ցանց է գործելու, ի՞նչ է փոխվելու դեռ հայտնի չէ, տրանսպորտի բաժնի պետն ու էլի մասնագետներ երթուղային ցանցի մշակման աշխատանքները նոր են  սկսելու: Քանի դեռ նոր ստացած մեքենաները չեն շահագործվում, դրանք ի պահ են տրված ոստիկանության համապատասխան ստորաբաժանմանը, ապահով վայրն էլ Սև բերդի տարածքն է։

«Քննարկվում է, թե ինչ եղանակով կշարունակենք մեքենաների շահագործումը, կլինի քաղաքպետարանը՝ մեկ օպերատորի տեսքով, թե ընկերություն, կորոշենք։ Ինչ մնում է վարորդների ընտրությանը, ապա մեզ դիմած վարորդների հայտերից կընտրենք, ովքեր անհրաժեշտ են ու կկնքենք եռամսյա պայմանագիր, ով կարողացավ արդարացնել իրեն ու կարգապահ լինել, կմնա ու կշարունակի աշխատել»,-նշել է քաղաքապետարանի տրանսպորտի բաժնի պետ Արտյոմ Սարգսյանը։

Վարորդների աշխատանքային պայմանների, նոր երթուղու ձևավորման ու այլ հարցերի կարգավորումը նախատեսում են ավարտել մինչև հոկտեմբերի 1-ը, որից հետո դեռ ավագանու նիստում է քննարկումներ անցնելու։ Աշխատանքների այս ընթացքն ու նախնական  ժամկետները հաշվի առնելով՝ տրանսպորտի բաժնի պետը նշում է, որ նոր մեքենաները երթուղիներ, հավանաբար, դուրս կգան ոչ շուտ, քան դեկտեմբեր ամսին։

Գյումրիում  8 երթուղիներ սպասարկում են 90 միկրոավտոբուսովներով։ Միկրոավտոբուսների շահագործման թույլտվության ժամկետները մինչև 10-ը տարին է, այնինչ  գծում եղած մեքենաների մեծ մասը վաղուց է հատել թույլատրելի ժամկետը։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։