Ընտանիքում բռնության ենթարկված անձանց մասին օրենքի քննարկում. ԱԺ-ն շարունակում է աշխատանքը

ԱԺ-ն շարունակում է արտահերթ նստաշրջանը: Նիստի մեկնարկին ԱԺ նախագահ Արա Բաբլոյանը տեղեկացրեց, որ այսօր երկրորդ ընթերցմամբ կքննարկվեն երեկ առաջին ընթերցմամբ քվեարկված հարցերը:

Խորհրդարանի նախագահը նաև շնորհավորեց ԱԺ «Ծառուկյան» խմբակցության անդամ Վարդևան Գրիգորյանին՝ նշելով, որ այսօր պատգամավորի ծննդյան օրն է:Այնուհետև խորհրդարանականները շարունակեցին իրենց աշխատանքը: Ի թիվս այլ օրենսդրական նախաձեռնությունների, քննարկվեց նաև ՀՀ քաղաքացիական դատավարության օրենսգրքում լրացումներ կատարելու մասին օրենքի նախագիծը երկրորդ ընթերցմամբ և ամբողջությամբ ընդունելու հարցը:

Հիմնական զեկուցող ՀՀ արդարադատության նախարարի առաջին տեղակալ Արթուր Հովհաննիսյանը տեղեկացրեց, որ առաջին ընթերցումից հետո որոշակի փոփոխությունների է ենթարկվել նախագիծը:

 «Մի քանի տերմիններ հստակեցվել են և համապատասխանեցվել ընտանիքում բռնության կանխարգելման մասին օրենքի տերմինաբանությանը: Երկրորդը՝ հաշվի առնելով այն հանգամանքը, որ դատարան կարող է դիմել ոչ միայն բռնության ենթարկված կամ ենթադրյալ բռնության ենթարկված անձը, այլ նաև աջակցության կենտրոնը անձի համաձայնությամբ, մենք առաջարկում ենք, որ դատարան հայցադիմում ներկայացնելիս այդ հայցադիմումին կցվի նաև բռնության ենթարկված անձի համաձայնությունը, որը փաստորեն օրենքի պահանջ է: Հակառակ պարագայում աջակցության կենտրոնը ուղղակի իրավասու չէ դիմել դատարան»:

Մտքերի փոխանակման ժամանակ  ԱԺ «Ծառուկյան» խմբակցության անդամ Նաիրա Զոհրաբյանը կառավարության ուշադրությանը հրավիրեց աջակցության կենտրոնների վրա, որոնք, ըստ պատգամավորների, պետք է ստեղծվեն դեկտեմբերից, բայց կարծում է, որ այս փուլում պետք է արդեն ունենային հստակ պայմանավորվածություններ:

«Ինձ համար խնդրահարույց է մի քիչ, որ աջակցության կենտրոնները կարող են դիմել դատարան և դրա համար պարտադիր է նաև բռնության ենթարկվածի դիմումը: Մենք ձեզ հետ միասին շատ լավ գիտենք, որ շատ դեպքերում ընտանիքներում բռնության ենթարկված կինը, եթե անգամ շատ մեծ ցանկություն ունի դիմել իրավապահ համակարգին, կրկնակի ճնշման է ենթարկվում այդ դիմումը չներկայացնելու համար: Մենք կարծում ենք, որ այստեղ սահմանափակելու ենք այս խնդրի իրավական կարգավորումը և քանի որ ընտանիքում բռնությունը լուրջ խնդիր է, որքան էլ արտառոց կարծիքներ հնչեն, թե մեր ընտանիքի ավանդույթներն են»,- ասաց Զոհրաբյանը:

Պատգամավորը մի քանի վիճակագրական տվյալներ ներկայացրեց՝ նշելով, որ 2018 թվականի հինգ ամիսներում քննվել է ընտանեկան բռնության 289 դեպք: Սրանք արձանագրված դեպքերն են, որոնցից 35-ով հարուցվել է քրեական գործ:

«Այս ընթացքում գրանցվել է ամուսնու կողմից կնոջ նկատմամբ բռնության 174 դեպք, կնոջ կողմից ամուսնու նկատմամբ՝ 9 դեպք,: Ի դեպ ասեմ, որ Հայաստանում բռնության է ենթարկվում կանանց մեկ քառորդը, իսկ տղասմարդկանց` մեկ տոկոսը: Գրանցվել է ծնողի կողմից զավակի նկատմամբ՝ 26, երեխաների կողմից ծնողի նկատմամբ՝ 31 դեպք: Սա արձանագրված դեպքերն են վերջին մի քանի ամիսների ընթացքում»,- նշեց պատգամավորը և կոչ արեց, որ այս խնդրով ոչ թե ընդունեն օրենքը և անցնեն առաջ, այլ ակտիվ մեխանիզմներ սկսեն կիրարկել՝ աջակցության կենտրոնները գոնե դեկտեմբերից գործարկելու համար:

Այնուհետև ամբիոնին մոտեցավ հիմնական զեկուցողը: Արդարադատության նախարարի առաջին տեղակալ Արթուր Հովհաննիսյանը հավաստիացրեց, որ իրենք կապի մեջ են աշխատանքի և սոցիալական հարցերի նախարարության հետ, որն այս ոլորտի իրավասու մարմինն է, և համապատասխան քայլեր ձեռնարկում են, որպեսզի այս մարմինները մինչև դեկտեմբեր ստեղծվեն և գործեն:

«Ինչ վերաբերում է աջակցության կենտրոնի կողմից անձի համաձայնություն ունենալուն` այսօր օրենքում հստակ պահանջ կա, որ հենց ենթադրյալ բռնության ենթարկված անձը ինքը պետք է համաձայն լինի, որ աջակցության կենտրոնը դիմի դատարան, որովհետև դատարանը կարող է այնպիսի որոշում կայացնել, ինչպիսին է օրինակ, բռնություն կատարող անձին որոշակի մետր հեռավորության վրա չթողնելը, երեխաների տեսակցության սահմանափակումը: Իրավունքների սահմանափակում կա, որ բռնություն կատարող անձը գոնե ցանկանա, որ դատարանը սահամանփակումներ մտցնի»,- եզրափակեց Արթուր Հովհաննիսյանը: