Միջին մասնագիտական ուսումնական հաստատությունները այլընտրանք են բուհերից դուրս մնացած դիմորդների համար

Բուհական ընդունելության քննությունները չհաղթահարած դիմորդները հայտ են ներկայացնում  միջին մասնագիտական ու արհեստագործական կրթական հաստատությունների ուսանող դառնալու համար: Անցած տարվանից ընդունելության հայտերը լրացնում են օնլայն կարգով: Կրթական հաստատություններ են հասնում այն դիմորդները, որոնց օնլայն հայտը լրացնելու համար օգնություն է պահանջվում: Իսկ դիմում-հայտերի քանակն ու բաշխվածությունը՝ ըստ մասնագիտությունների, հասանելի են համապատասխան կայքէջում:

Այսինքն՝ էլեկտրոնային հարթակում գրանցումները դեռ նախնական են: Արհեստագործական մասնագիտությունների ցանկում կան այնպիսիք, որոնք հաստատ թափուր չեն մնա: Սա նախորդ տարիների վիճակագրությունն է ցույց տալիս: Լավ արհեստավորները շուկայում պահանջված են:

Թիվ 1 արհեստագործական ուսումնարանում դիմում-հայտերի թիվն ավելացել է բուհական ընդունելության առաջին փուլի արդյունքների ամփոփումից հետո: Նրանք, ովքեր անբավարար գնահատական են ստացել ու բուհ չեն ընդունվել, դիմում են միջին մասնագիտական ու արհեստագործական կրթական հաստատություններ:

«Մեր թվային տվյալները հաստատում են, որ ունեցել ենք արդեն իսկ բուհից դուրս մնացած ուսանողներ, որոնք դիմել են մեզ: Ճիշտ է, համապատասխան մասնագիտություններ չունենք, բայց մոտավորապես հարակից մասնագիտություններ են ընտրել: Ունենք 15 դիմորդ, նրանք են, ովքեր բուհից դուրս են մնացել: Մեզ մոտ գալիս են այն դիմորդները, որոնք ուզում են արհեստ սովորել»,- Shantnews-ին ասել է Գյումրիի թիվ 1 արհեստագործական ուսումնարանի տնօրեն Անժելա Կարապետյանը:

Բուհերում 15 հազար տեղ թափուր է մնացել, այսինքն՝ շատ մասնագիտությունների գծով հայտեր ընդհանրապես չեն եղել, նաև անբավարար ստացած ուսանողների թիվն է մեծ, իսկ բուհերում մրցութային երկրորդ փուլը միայն նրանց համար է, ովքեր դրական գնահատականներ են ստացել: Հետևաբար, քոլեջներն ու ուսումնարանները մնում են այլընտրանքային, թեև բուհեր չընդունված դիմորդների համար առկա ուսուցման հնարավորություն ստեղծված է ոչ բոլոր քոլեջներում: Օրինակը Շիրակի պետական համալսարանի քոլեջն է:

«Ընդունելություն ենք կազմակերպում 5 բաժիններում: Միայն երկու բաժնում կարող են 12-ամյա կրթությամբ դիմորդները ընդունվել հեռակա ուսուցման համակարգում: Առկայի դեպքում մրցույթին չեն կարող մասնակցել: Բավական լավ ցուցանիշ ունենք դիմում-հայտերի ընդունելության: Օրինակ՝ շուկայաբանություն բաժնում, եթե ևս 5 դիմում ընդունենք, արդեն մրցակցություն կձևավորվի»,- Shantnews-ին ասել է ՇՊՀ քոլեջի ընդունող հանձնաժողովի պատասխանատու քարտուղար Վաչագան Մակարյանը:

Շիրակի պետական համալսարանի քոլեջը մեծ մասամբ ընդունելություն կազմակերպում է հիմնական կրթության հիմքով, այսինքն՝ այստեղ մրցակցությունը ավագ դպրոցների հետ է: Մրցակցություն նաև քոլեջների ու ուսումնարանների միջև կա: Համանուն բաժիններ մի քանի միջին մասնագիտական ու արհեստագործական կրթական հաստատություններում կան: Անցած տարվանից վճարովի տեղերն ավելացել են, ըստ այդմ, բոլոր քոլեջներում և ուսումնարաններում հատկացված տեղերը միշտ ավելին են, քան դիմորդները: Հատուկենտ բաժիններում է, որ մրցույթ է ձևավորվում: Իսկ մրցույթը ավարտական վկայականների միջին գնահատականներով է: Դիմում հայտերն ընդունում են մինչև օգոստոսի 15-ը:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։