Նորաձևության աշխարհի փայլի ետևում հաճախ թաքնվում է փայլից շատ ու շատ հեռու, անգամ ողբերգական իրականություն: Հայտնի դիզայներների ու մոդելների հարստությունն ու հանրաճանաչությունը հաճախ նախանձի ու կոնֆլիկտների առիթ են դառնում, անգամ հանգեցնում հանցագործությունների: Յուրաքանչյուր այդպիսի դեպքից հետո նորաձևության ամսագրերը որոշ ժամանակով վերածվում էին քրեական քրոնիկոնի:
Ջաննի Վերսաչեի սպանությունը
Վերսաչեի առանձնատունը Մայամիում
Այդ ողբերգական դեպքի մասին գրվել են գրքեր, նկարահանվել են ֆիլմեր, անգամ «Ամերիկյան հանցագործություների պատմություն» սերիալի երկրորդ եթերաշրջանը նվիրված էր դրան: 1997 թվականի հուլիսի 15-ին Versace բրենդի հիմնադիր Ջաննի Վերսաչեն Մայամիում տուն էր վերադառնում: Սովորաբար թարմ թերթեր գնելու համար նա օգնականին էր ուղարկում: Այդ օրը որոշեց ինքնուրույն գնել, ու այդ որոշումը նրա կյանքն արժեցավ: Տան մուտքի մոտ երկու կրակոց հնչեց. ուղիղ ծոծրակին:
Արագ դեպքի վայր հասած շտապօգնության բրիգադը լեգենդար դիզայներին հասցրեց հիվանդանոց, սական նրա կյանքը փրկել չհաջողվեց: Ոստիկանությունը 8 օր շարունակ փնտրում էր մարդասպանին: Հետո հայտնաբերվեց սերիական մարդասպան Էնդրյու Քյունենենի դին՝ նույն ատրճանակից ինքնասպան եղած: Ի դեպ, նա դրանով սպանել էր էլի մի քանի անմեղ մարդկանց: Սպանության շարժառիթները մնացին չբացահայտված մինչև այժմ:
