Կառավարության դռնփակ նիստերը ոչ թե ընդդեմ, այլ հանուն ժողովրդավարության են. Դավիթ Հարությունյան

Ինչպես հայտնի է, օրեր առաջ կառավարությունը տեղեկություն տարածեց նիստերի դռնփակ լինելու մասին:  «Շանթ» հեռուստաընկերության «Հեռանկարի» երեկվա թողարկման ժամանակ անդրադարձել է եղել նաև այդ հարցին: Արամ Աբրահամյանն Արդարադատության նախարար Դավիթ Հարությունյանին ասել է, որ դա բացատրվում է առաջադեմ երկրների օրինակով: Բայց,  եթե առաջադեմ այդ փորձը կար՝  ինչո՞ւ այն չէին կիրառում մեկ տարի առաջ, այլ կիրառում են հիմա, երբ ապրիլն է մոտենում:

«Ես համաձայն եմ ձեզ հետ, մենք սխալ ենք արել, որ չենք կիրառել մեկ տարի առաջ: Այնուամենայնիվ, սա չպետք է դիտել որպես առաջադեմ երկների փորձի տրանսֆորմացիա կամ տեղափոխում ՀՀ: Սա պայմանավորված է գործադիր իշխանության բուն էությամբ: Գործադիր իշխանությունը առանձնահատուկ է իր կոլեկտիվ պատասխանատվությամբ՝ ի տարբերություն, օրինակ, ԱԺ-ի», – ասել է Հարությունյանը:

ՀՀ Արդարադատության նախարարը խոսել է նաև այն մասին, թե ինչու են այլ երկներում գործադիրի նիստերը դռնփակ անցնում:

«Ոչ թե նրանք առաջադեմ կամ հետադիմական են, այլ համարվում է, որ դա է հնարավորություն ընձեռում անկաշկանդ քննարկման, իսկ գործադիր իշխանությունն ունի մեկ առանձնահատկություն ևս՝ որոշումները կայացնելուց հետո ենթակա են կատարման գործադիր իշանության բոլոր անդամների կողմից: Որոշումը կայացնելուց հետո բոլորն արդեն հանդես են գալիս որպես մեկ անձ: Անկաշկանդ, անկեղծ, ազատ քննարկումը հնարավոր է միայն փակ դռների հետևում, երբ քեզ վրա ուղղված են տեսախցիկներն, անկախ ամեն ինչից դու չես կարող անկաշկանդ քննարկում իրականացնել», – հավելել է Հարությունյանը:

ՀՀ արդարադատության նախարարը նաև  օրինակ է բերել՝ հիշեցնելով 4+4 քննարկումները.

«Բոլոր այն քննարկումները, որոնք հեռարաձակվում էին, միշտ ձախողվում էին և որևէ համաձայնության հնարավոր չէր հասնել: Ինչո՞ւ, որովհետև բոլորը քաղաքական դիրք էին ընդունում և սկսում էին հատուկ տեսախցիկների համար ելույթներ ունենալ: Հենց որ տեսախցիկներն անջատվում էին, մեզ հաջողվում էր գտնել փոխադարձ ընդունելի լուծումներ, և երկու կողմն էլ պատրաստ էին իրենց դիրքերը զիջելու, զերծ մնում քաղաքական հայտարարություններից և այլն», – հավելել է Դավիթ Հարությունյանը:

Ըստ Դավիթ Հարությունյանի՝ կառավարության դռնբաց նիստերի ժամանակ որևէ լուրջ բանավեճ չի ծավալվել: Այնպես որ, առաջադեմ երկները հենց ժողովրդավարությունից ելնելով են համարում, որ կառավարության նիստերը պետք  է լինեն դռնփակ: 

Ինչ վերաբերում է կառավարության որոշումների ընդունմանը, ապա դրանք ևս ընդունվելու են քվեարկությամբ: 

«Այն պահից, ինչ կառավարության նիստերը սկսեցին համարվել բաց, և հեռարձակվեցին, ես չեմ հիշում որևէ մի նիստ, երբ որևէ մի նախարար ասի՝ ես դեմ եմ այսինչ որոշմանը, և քվեարկության արդյունքը չլինի միաձայն: Բայց, գիտեք, որ ես նախկինում էլ եմ աշխատել նախարար, երբ կառավարության նիստերը դռնփակ էին, ես կարող եմ բազմաթիվ օրինակներ բերել, երբ կառավարության նիստում կային տարբեր դիրքորոշումներ, նախարաներից մեկը քվեարկել է կողմ, մյուսը՝ դեմ, և անգամ մենք ունեցել են որոշում, երբ ձայների տարբերությունն ընդամենը երկուսն էր», – հավելել է Հարությունյանը:

Ի դեպ, ըստ Արդարադատության նախարարի,  դարձյալ կառավարության նիստում լինելու են զեկուցվող և չզեկուցվող հարցեր: Բայց հանրությունը տեղյակ է լինելու՝ ինչ նախագծեր են քննարկվել, որոշումների նախագծերը դարձյալ ներկայացվելու են  հանրությանը:

Իսկ ի՞նչ կլինի այն ժամանակ, երբ իրենք նիստին մասնակցածները որոշ  մանրամասներ հայտնեն լրագրողներին:

«Դա կհամարվի նախարարական էթիկայի կոպիտ խախտում: Կարո՞ղ են նման խախտումներ տեղի ունենալ, իհարկե, կարող է, բայց օրենքում ուղղակի ամրագրվում է, որ որևէ նախարար կամ կառավարության որևէ անդամ իրավունք չունի քննարկման ընթացքի վերաբերյալ տեղեկություն հայտնել՝ առանց վարչապետի համաձայնության», – պարզաբանել է Դավիթ Հարությունյանը: