Շիրակի մարզի 29 գյուղական բնակավայրերում կիրականացվի համայնքների զարգացման և հզորացման դրամաշնորհային ծրագիր

Գյուղական կոլորիտային միջավայր էր այսօր ստեղծվել  Գյումրիի կենտրոնում։ Խոտի հակերից պատրաստված նստարաններն ու բազմոցները ձևավորված  էին  շիրակյան ալպիական  դաշտավայրից ու  սարերից հավաքված գույնզգույն ծաղիկներով ու  բույսերով։ Այսպիսի  միջավայրում էլ  տրվեց «Տեղական դերակատարների զորեղացում հանուն զարգացման Շիրակի մարզում» ծրագրի մեկնարկը, որն  Եվրամիության ու Ավստրիական զարգացման գործակալության  նախաձեռնությամբ է  իրականացվում։ Նախատեսվում է  իրականացնել համայնքների հզորացման ու զարգացման հեռանկարային ծրագրեր։

«Գյուղերում ապրող մարդիկ կարիք ունեն դիմակայության և ինքնաֆինանսավորման, նաև բարեկեցության ապահովման խնդիր ունեն, դրա համար էլ հենց այդ ուղղությամբ ենք կատարելու մեր ներդրումները։ Ծրագիրը ներառական բնույթ ունի և  ներառելու է հասարակության տարբեր շերտերի։ Մեր համագործակցությունը Շիրակի մարզի հետ սկսվել է դեռևս երկրաշարժի տարիներից, դրանից հետո էլ մենք մշտադիտարկումներ են անցկացրել  տարածաշրջանում»,- նշում է Ավստրիական զարգացման գործակալության գրասենյակի ղեկավար Ալեքսանդր Քարները։

Ծրագիրն իրականացվելու է մարզի 29 բնակավայրերում, որում ներառված են  երեք խոշորացված համայնքներ ու ևս 4 գյուղեր։ Շահառու բնակավայրերը՝ ըստ ներդրված ինդեքսների գնահատման, խմբավորվել են թույլ, միջին և բարձր զարգացած խմբերի։ Կիրառվել են նաև գնահատման մի քանի այլ  չափորոշիչներ։

«Չափանիշները ենթադրում են, որ էդ տարածքներում  լինի 10-15 հազար բնակչություն։ Էդ չափանիշը ենթադրում է, որ քաղաքային համայնք չլինի, քանի որ սա գյուղերի զարգացման ծրագիր է։Համայնքը պետք է ունենա որոշակի մշակութային ուղղվածություն, պատմություն։ Այս ամենը հաշվի առնելով էլ մենք ընտրեցինք Ամասիա և Աշոցք խոշորացված համայնքները, որոնք ներառում են 21 բնակավայրեր, ինչպես նաև Անի խոշորացված համայնքից 4 բնակավայր ու Լեռնակերտ, Հառիճ, Պեմզաշեն ու Նահապետավան գյուղերը»,- նշում է LEAD4 Shirak  ծրագրի ղեկավարի տեղակալ Հուսիկ Սարգսյանը։

Համայնքներում ստեղծվող  աշխատանքային ակտիվ խմբերում ներառված բնակիչներն ու համայնքների ղեկավարները կստանան  զարգացման ծրագրեր կազմելու և ներկայացնելու գիտելիքներ ու հմտություններ։ Ավստրիական զարգացման գործակալությունը տրամադրել է շուրջ չորսուկես միլիոն եվրո դրամաշնորհ, գյուղերում կստեղծվի 50 աշխատատեղ, և նորարարական գաղափարները կայուն եկամտաբերության  ապահովման միջոց կդառնան։

« Մենք ինչ ունենք՝ Շիրակի դաշտավայր, որը ավանդական հատիկային և կարտոֆիլագործության ամենալավ ալտերնատիվներից մեկն է, սա շատ մեծ պոտենցիալ է իհարկե, բայց ինչ երաշխիք, որ հատկապես միայն այդ երկու կուլտուրաներն են, որ կարելի է Շիրակի  դաշտավայրում աճեցնել, և չի կարելի մի նոր բան, մի նոր մշակաբույս ներդնել, որը կրկնակի ու եռակի եկամտաբեր, ավելի արդյունավետ կլինի գյուղացիների համար։ Մենք գոնե պիտի փորձենք։ Այս ծրագիրը մեր համայնքներին տալիս է այդ հնարավորությունը»,- նշում է ՀՀ տարածքային կառավարման և ենթակառուցվածքների նախարարի տեղակալի պաշտոնակատար Վաչե Տերտերյանը։

Այս ծրագրում առանցքային են բնապահպանական բաղադրիչը և կանանց ներգրավվածության ապահովումը։ Մինչև տարեվերջ շահառու համայնքներում կավարտվեն մոնիթորինգային աշխատանքները, իսկ 2022 թվականից, ըստ ներկայացված ծրագրերի, կհայտարարվեն դրամաշնորհների մրցույթները, որոնց շրջանակներում յուրաքանչյուր ծրագրի համար կտրամադրվի 2000-ից մինչև 20 հազար եվրո գումար։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։