Գյումրիի Ասլամազյան քույրերի պատկերասրահի աշխատակազմը դադարեցրել է գործադուլը

Մարիամ և Երանուհի Ասլամազյան քույրերի պատկերասրահի աշխատակիցները երկօրյա գործադուլից հետո անցել են բնականոն աշխատանքի։ Երեկվանից այցելուների են ընդունում, երկուշաբթին ոչ աշխատանքային է թանգարանների համար, այնուամենայնիվ, գործադուլը դադարեցրած են եղել կիրակի օրվանից։

Հիշեցնենք, գործադուլի պատճառ էր հանդիսացել  պատկերասրահի  տնօրենի ԺՊ Միքայել Վարդպարոնյանին աշխատանքից ազատելու քաղաքապետարանի որոշումը, և պահանջում էին նրան վերականգնել իր պաշտոնում։ Աշխատանքի են անցել, բայց իրենց պահանջից չեն հրաժարվում, ասում են՝ ընդամենը  զիջումների են գնացել։

Պատկերասրահի աշխատակազմը սպասում է նախկին տնօրենի ժամանակավոր պաշտոնակատար Միքայել Վարդպարոնյանի իրավական ճանապարհով  հարցի լուծմանը, իսկ մինչ այդ արդեն  պատկերասրահում  նոր տնօրենի պաշտոնակատար է նշանակվել, նրա հետ աշխատանքային ընդհանուր եզրեր գտել են։

«Հիմնականում աշխատակազմն է հայտարարի եկել ինձ հետ, ես ներկայացա իրենց, և իրենք ինձ ասացին՝ քանի որ մեր նախկին տնօրենը վերցրել է  հարցի լուծման իրավական ճանապարհը, թանգարանը չի կարող այդ ընթացքում փակ մնալ, և մենք հիմա փորձում ենք միասին աշխատել»,- Shantnews-ի հետ զրույցում նշել է պատկերասրահի  տնօրենի նոր պաշտոնակատար Կարեն Բարսեղյանը։

Նկարիչ Կարեն Բարսեղյանը նշում է՝ նախկին տնօրենի  հետ մտերիմ ընկերներ են, տարիներ առաջ աշխատել է նույն թանգարանում և վստահ է, որ այս գործընթացի պատճառով  իրենց հարաբերությունները չեն սրվի, միևնույն ժամանակ չի թաքցնում, որ պատկերասրահը ղեկավարելու հավակնություններ ունեցել է։

«Միգուցե ունեցել եմ, որովհետև ես էստեղ նաև ժամանակին, երեք տարի աշխատել եմ, աշխատակից եմ եղել թանգարանում, բայց որ էս պահին  առաջարկ կստանամ, մտքովս չէր էլ անցնում»,- ասել է Կարեն Բարսեղյանը։

Քաղաքապետարանը ընդամենը 4 օր առաջ պատկերասրահի աշխատակազմին էր ներկայացրել մեկ այլ անձի՝ որպես տնօրենի պաշտոնակատար։ Հետո պարզել էին , որ արդեն հրամանագրված  Գագիկ Մանուկյանը պատկերասրահը ղեկավարելու իրավունք չունի։

«Մենք գիտեցել ենք՝ ինքը գիտամանկավարժական աշխատանք է կատարում, բայց հետո պարզվել է, որ նաև ամբիոնի վարիչ է և դա վարչական աշխատանք է որպես դիտվել։ Գագիկ Մանուկյանը նաև դիմում է ներկայացրել մեզ, որ երկրորդ աշխատանքից  հրաժարվելու դիմում է ներկայացրել իր վերադասին, բայց քանի որ վերադասից մենք որոշում չենք ունեցել Մանուկյանի ամբիոնի վարիչի պաշտոնից ազատման վերաբերյալ, մենք մեր որոշումը անվավեր ենք ճանաչել»,- Shantnews-ին պարզաբանել է Գյումրիի քաղաքապետարանի աշխատակազմի քարտուղարի ԺՊ Կարեն Բադալյանը։

Որպես նոր  պաշտոնակատար՝ Կարեն Բարսեղյանը կմնա  այնքան, քանի դեռ Միքայել Վարդպարոնյանը իր իրավունքները կվիճարկի դատարանում, և այնուհետ լինելու է պատկերասրահի թափուր պաշտոնի համար մրցույթ։ Ամեն դեպքում, քաղաքապետարանի պաշտոնյան չի ընդունում այն պնդումները, թե  տնօրենը ազատման դիմում գրել է պարտադրանքով, և որ դրանում դեր է ունեցել այն, որ կոնֆլիկտի կողմ հանդիսացող աշխատակցուհին քաղաքապետի ընկերոջ դուստրն է։

Քաղաքապետարանի ենթակայության պատկերասրահը կշարունակի  աշխատել  ժամանակավոր  պաշտոնակատարով։ Միքայել Վարդպարոնյանը այդ կարգավիճակով ղեկավարեց երկու տարի, և այդ ընթացքում  տնօրենի մրցույթ այդպես էլ չհայտարարվեց։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։