Փաստաբանը պահանջում է արդարացնել Սամվել Բաբայանին. գործը Վերաքննիչ դատարանում է

Հայաստանի Վերաքննիչ քրեական դատարանում Մանուշակ Պետրոսյանի, Մխիթար Պապոյանի և Սևակ Համբարձումյանի նախագահությամբ այսօր շարունակվել է Սամվել Բաբայանի, Սանասար Գաբրիելյանի և Արմեն Պողոսյանի գործով վերաքննիչ բողոքի քննությունը:

Հիշեցնենք, որ Բաբայանը մեղադրվում է Հայաստան «Իգլա» տեսակի զենիթահրթիռային համալիր բերելու և «փողերի լվացման» մեջ: Սանասար Գաբրիելյանն ու Արմեն Պողոսյանը մեղադրվում են միայն «Իգլայի» դրվագով:

Նշենք նաև, որ Բաբայանը դատպարտվել է  6 տարվա ազատազրկման, Սանասար Գաբրիելյանն ու Արմեն Պողոսյանը՝ 3  տարվա: Նախորդ  դատական նիստին Բաբայանի շահերի պաշտպան Ավետիս Քալաշյանը ներկայացրել էր վերաքննիչ բողոքը «Իգլայի» վերաբերյալ, իսկ այսօր շարունակել է ներկայացնել փողերի լվացման մեղադրանքով վերաքննիչ բողոքը:

Փաստաբան Արտաշես Քալաշյանը պնդում է, որ Բաբայանի՝ «Իգլայի» հետ առնչությունը կայացել է միայն նրանում, որ նա պարզապես կարծիք է հայտնել զենքի վերաբերյալ:

«Կարծիքը լսելուց հետո, որ զենքից մասեր են պակասում, Սանասար Գաբրիելյանը, որը, ինչպես ինքն է նշել, ցանկացել է զենքը բանակին նվիրաբերել, ինքնակամ հրաժարվել է զենքը գնելուց»,-հիշեցրեց պաշտպանը:

Նրա համոզմամբ՝ Բաբայանի հեռախոսային գաղտնալսումները ևս չեն հիմնավորում նրա մեղադրանքը.

«Գործով մյուս մեղադրյալների հեռախոսային խոսակցությունները հիմնավորում են միայն այն, որ այդ անձինք միջոցներ են ձեռնարկել զենքը գտնելու ուղղությամբ, իսկ Սամվել Բաբայանի մասով տվյալներ առկա չեն»:

Քալաշյանը պնդեց՝ Բաբայանի մեղքը հիմնավորված չէ և պետք է իրականացնել արդարացման դատական ակտ: 

Փաստաբանն արդարացման դատական ակտ է պահանջում նաև «փողերի լվացման» գործով:

«Ինտերպոլի տրամադրած տվյալների համաձայն՝ նշված թղթադրամները հանված են պաշտպանիչ ներկանյութեր պարունակող բանկոմատից: Այդ թղթադրամները եղել են Եվրոպոլի պահոցում, և ստուգումների արդյունքում որևէ համընկնում չի գրանցվել: Սամվել Բաբայանը հենց սկզբից հայտնել է, որ իր ծանոթ Վասիլին Մոսկվայում իրեն պարտք է եղել: Նա առաջարկել է 5 հազար եվրո վերադարձնել պարտքից, սակայն ասել է, որ դրանք ներկոտված են:

Վասիլին մի քանի թղթադրամ է ուղարկել, որը Բաբայանի ծանոթ Կարենի միջոցով ուղարկել է բանկ՝ պարզելու, թե դա իսկական թղթադրա՞մ է, թե՞ ոչ: Երբ պարզվել է, որ թղթադրամները իրական են, նա Վասիլիին ասել է, որ ուղարկի գումարը: Ներկոտած թղթադրամները փոխանակելու դեպքում բանկերը կարող էին մինչև 10 տոկոս պահում անել, այդ պատճառով էլ նա դիմել է մարդու, ով քիմիական միջոցներով կարող էր մաքրել թղթադրամները: Բաբայանը տվել է Վասիլիի, Տիգրան Մնացականյանի անունները, որոնք այդպես էլ չեն հարցաքննվել:

Թղթադրամների ներկոտված լինելու երեք վարկած կա, ըստ Ինտերպոլի, որից միայն մեկն է ներկայացրել պետական մեղադրողը»,- նշեց Ավետիս Քալաշյանը:

Նշենք, որ այս գործով 3 տարվա ազատազրկման դատապարտված Սանասար Գաբրիելյանը ևս դիմել է Վերաքննիչ դատարան: Նա պահանջում է բեկանել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճիռը և իրեն ճանաչել անմեղ: