Ծանրամարտի աշխարհի երիտասարդական առաջնության չեմպիոն, գյումրեցի Գարիկ Կարապետյանը Հայաստանը կներկայացնի նաև Եվրոպայի առաջնությունում

Հայաստանի ծանրամարտի երիտասարդական հավաքականը աշխարհի առաջնությանը մասնակցեց 7 մարզիկներով, նրանցից երեքը հայրենիք վերադարձան մեդալներով։ 17-ամյա գյումրեցի ծանրորդ Գարիկ Կարապետյանը, որն առաջին անգամ էր հանդես գալիս երիտասարդական հավաքականում, 96 կգ քաշային կարգում, երկամարտի 355 կգ ընդհանուր արդյունքով նվաճեց չեմպիոնական տիտղոսն ու կանգնեց պատվո հարթակի առաջին հորիզոնականում։

Ոգևորությունն ու հպարտությունը մի քանի անգամ կրկնապատիկ են դառնում, երբ շնորհավորանքներ է ստանում։ Նորից մարզումների է անցել, որի համար պայմանները հեռու են նույնիսկ  բավարար համարելուց։ Մարզադահլիճի հատակն ու պատերը քայքայված են, մարզագույքն էլ՝ հին։ Գարիկի չեմպիոնության ճանապարհն էլ այստեղով է անցել։ 17-ամյա մարզիկը անկեղծանում է՝ այս մարզաձևով հետաքրքրված չի եղել, եղել է ծանրամարտիկ հոր ազդեցությունը։

«Ծանրամարտով զբաղվում եմ 9 տարեկանից, չսիրելով եմ հաճախել, բայց հիմա արդեն կսիրեմ։ Պապայիս պատիվը, պապայիս հաղթանակները ստիպեցին, որ գամ ծանրամարտի»,- նշում  է աշխարհի չեմպիոնը։

Հայրը՝ Ալեքսան Կարապետյանը, որդու անձնական մարզիչն է։ Գարիկը երբ  փոքր էր, որոշել էր  տղային ըմբշամարտի տանել, բայց  մի քանի անգամ մարզումներին հետևելուց հետո համոզվել է, որ  այդ մարզաձևը Գարիկի համար չէ։

Գարիկը 15 տարեկանում  մասնակցել է  պատանիների Եվրոպայի առաջնությանը, հռչակվել չեմպիոն։ Իսկ 2019 թվականի աշխարհի պատանիների առաջնությանը դարձել է փոխչեմպիոն։ 2020 թվականին, համավարակի պատճառով, հետաձգվեց  Երիտասարդական խաղերի աշխարհի առաջնությունը։ Փակ մարզադպրոցների ու մարզադահլիճների պայմաններում Գարիկը չի ընդհատել մարզումները, մարզվել է իրենց ավտոտնակում։

Գարիկն իր հաղթանակը նվիրել է Արցախյան պատերազմում զոհված տղաներին։ Երբ հնչել է հայոց օրհներգը, պատվո հարթակին կանգնած հուզվել է։ Չեմպիոն դառնալու երազանքներով այս նույն մարզադահլիճում մարզվել է գյումրեցի հայտնի ծանրամարտիկների հետ։

«Տիգրան Մարտիրոսյանը, Արա Խաչատրյանը, Աղվան և Ռաֆիկ Մելիքյանները ինձ համար օրինակ են եղել, այս մարզադպրոցում շատ ուժեղ ծանրորդներ են եղել, բոլորից էլ մի բան սովորել եմ»,- ասում է Գարիկը։

Հպարտության օրինակ ծանրորդներից մեկն իր  հայրն է։ Ալեքսան Կարապետյանը Հայաստանը բազմիցս ներկայացրել է հեղինակավոր միջազգային  մրցաշարերում, ապա հանդես է եկել Ավստրալիայի դրոշի ներքո։ 2006 թվականին Մելբուռնում կայացած «Բարի կամքի խաղերին» 86 պետությունների կազմում դարձել է չեմպիոն։ Այդ օրը պատվո հարթակ է  բարձրացել  որդու հետ։ Գարիկն այդ ժամանակ երեք տարեկան էր։

«Գարիկիս գրկեցի ու կանգնեցի  պատվո հարթակին, և բոլորը զարմացել էին, առաջին անգամ այդպիսի դեպք եղավ, որ հայր ու տղա կանգնեն առաջին  տեղում։ Ինձ նայելով էլ նորզելանդացի մարզիկը իր 2-3 ամսական տղայի հետ բարձրացավ պատվո հարթակ։ Դա մի ուրիշ զգացողություն էր, որը մինչ օրս չեմ կարողանում մոռանալ»,- հիշում է  Գյումրիի Օլիմպիական հերթափոխի մարզական քոլեջի ծանրամարտի մարզիչ Ալեքսան Կարապետյանը։

12 տարի անց, նույն օրն ու նույն ամսին, Գարիկը կրկնել է չեմպիոն հայրիկի ցուցանիշը՝ դառնալով Եվրոպայի չեմպիոն։ Ավստրալիայից տարիներ առաջ են վերադարձել հայրենի քաղաք Գյումրի։ Մարզիչ հայրիկի նպատակը մեկն է, որ որդին  միջազգային ասպարեզում միայն ու միայն ներկայացնի Հայաստանը։

17-ամյա աշխարհի չեմպիոնը մասնակցելու է աշնանը Ֆինլանդիայում կայանալիք Եվրոպայի առաջնությանը, պատրաստվում է ռեկորդներ սահմանել։ Հետո ասպարեզ կբացվի դեպի Օլիմպիական խաղեր։ Հաջորդ օլիմպիադային մասնակցելու համար  պետք է ավելացնի անձնական քաշը և փորձի հանդես գալ 109 քաշային կարգում։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։