Գյուղապահովագրության ծրագրում ներառված մշակաբույսերի ցանկն ու ռիսկերը ընդլայնվել են․ Շիրակի մարզում ավելացել են ապահովագրվող ցանքատարածքները

Նախորդ տարի գյուղապահովագրության ծրագրում ներառվեց նաև Շիրակի մարզը։ Գյուղացիական տասնյակ տնտեսություններ, որոնք տուժել էին անցած տարվա կարկտահարությունից և մասամբ ցրտահարությունից, փոխհատուցվել են։ Այս տարի մարզի գյուղական համայնքներն ընդլայնել են ապահովագրվող  ցանքերը։

2020 թվականին մարզի 28 համայնքներում կարկտահարվել է մոտ 5000 հեկտար ցանքատարածություն, իսկ ընդհանուր վնասը գնահատվել է 3 միլիարդ դրամ: Վնասը  գույքագրվել էր, բայց փոխհատուցում ստացան միայն այն հողատերերը, որոնք նախորդ տարի ապահովագրել էին իրենց ցանքատարածությունները։

Ապահովագրվող գումարի 50 տոկոսը վճարում է գյուղացին, իսկ  մյուս մասը սուբսիդավորում է պետությունը: Գյուղապահովագրությամբ մարզում զբաղվում է երեք կազմակերպություն։ Պայմանագրային պարտավորությունները բոլորի մոտ գրեթե նույնն են, պետությունը ցանքատեսակներից ու ռիսկերից յուրաքանչյուրի համար ներկայացնում է հստակ պահանջներ, սահմանված նվազագույն ու առավելագույն  գնահատման արժեքները խախտել ընկերությունները չեն կարող:

«Պետության կողմից ծրագրով սահմանված է, թե ինչ գումարների մասին է խոսքը: Օրինակ՝ հացահատիկն ապահովագրելու  համար նախատեսված է մինչև 200-250 հազար դրամի չափով փոխհատուցում, իսկ կարտոֆիլի համար շուրջ 70-80 հազար դրամ է հասնում գումարը մեկ հեկտարի դիմաց, իսկ փոխհատուցումը հնարավոր է մինչև 3-4 միլիոն  լինի»,-SHANTNEWS.am-ի հետ զրույցում ասել է Շիրակի մարզպետարանի գյուղատնտեսության բաժնի պետ Անդրանիկ Նալբանդյանը:

Ապահովագրական ընկերությունները գյուղապահովագրության ոլորտը դիտարկում են ռիսկային, մասնավորապես Շիրակի մարզում աշխատում են վնասով, թեև, նախորդ տարվա համեմատ, ապահովագրող ցանքերը շատացել են:

«Շիրակի մարզն՝ ըստ ռիսկային սանդղակի գոտիների, գտնվում է 3-5-րդ  բարձր ռիսկային գոտում, նախորդ տարի մենք երեք անգամ ավելի փոխհատուցում ենք տրամադրել՝ մոտ 10 միլիոն դրամի չափով: Ե՛վ տրված հատուցումները, և՛ իրականացված աշխատանքները բերեցին նրան, որ այս տարի թվերն ավելացել են, մեր ֆերմերներն ու գյուղացիներն ավելի շատ սկսեցին վստահել ու ապահովագրել իրենց ցանքատարածությունները»,- նշել է  ապահովագրական ընկերության Գյումրիի մասնաճյուղի գործակալական խմբի ղեկավար Արման Թորոսյանը:

Կարկտահարված կամ ցրտահարված ցանքատարածքների ու այգիների վնասը գնահատում են անկախ փորձագետները, երբեմն գնահատման գործընթացը կատարվում է կարկտահարությունից օրեր անց կամ բերքահավաքի ժամանակ: Գյուղացիներից ու ֆերմերներից այս տարի ապահովագրական ընկերությունները, հողի սեփականության վկայականից բացի, պարտադիր պահանջել են կադաստրային բաժնից տրամադրված արբանյակային տեղորոշման գծանկարները:

Ընկերությունները պարզել են, որ մշակվող որոշ հողատարածքներ քարտեզագրված չեն, հողօգտագործողները չունեն սեփականության վկայագրեր, շատերը հողակտորները  օգտագործում են վարձակալական հիմունքներով։ Նման դեպքերում ապահովագրական ընկերությունները գյուղացիներից  պահանջում են  վարձակալության պայմանագիր, իսկ  գյուղապետարանից՝ հողօգտագործման իրավունքը հաստատող տեղեկանք:

Ընդհանուր առմամբ, մեկ տարվա ընթացքում հանրապետությունում ապահովագրվել է շուրջ 2500 հեկտար այգի ու ցանքատարածք, կնքված պայմանագրերի թիվը հասել է 1550-ի։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։