Գյումրիում 3 հեկտար տարածքում կհիմնվի հայ-ռուսական բարեկամության այգի

Գյումրիում կանաչապատման աշխատանքներ են ընթանում։ Նոր ծառատեսակներով, թփերով ու ծաղիկներով ձևավորում են ոչ միայն կենտրոնական հատվածներն ու հրապարակները։ Կանաչապատման աշխատանքներում այս տարի կոմունալ ծառայությունը ընդգրկել է գրեթե բոլոր թաղամասերը։ Նախատեսված է նաև կանաչապատ տարածքների ընդլայնում։

Մուշ 2 թաղամասին հարող տարածքը նախկինում Մարմաշեն գյուղի վարելահողերն էին։ Երկրաշարժից հետո քաղաքից դուրս քաղաք կառուցելու ծրագրի համար ընտրվեցին այս հողատարածքները, բայց 2 տարում Գյումրին կառուցելու ծրագիրը մնաց անավարտ, իսկ սևահողերը վերածվեցին շինաղբով ծածկված տարածքների, որոնք այս պահին կառուցապատման համար հետաքրքրություն չեն ներկայացնում։ 30 տարի անօգտագործելի մնացած հողն այժմ մշակվում է, հիմնվելու է հայ-ռուսական բարեկամության այգի:

«Էստեղ նախկինում եղել են ծառեր, հիմա ընդլայնում ենք, շատացնում ենք։ Ընդհանուր 2-3 հեկտար տարածք է, մոտավորապես 600 ծառ ենք հիմա այստեղ ավելացնում»,- նշել է Գյումրիի քաղաքապետարանի կոմունալ ծառայության տնօրեն Վարդգես Սամսոնյանը։

Հարթեցումն ու բարեկարգումը միաժամանակ են անում։ Նոր ծառապատ տարածքը ճեմուղիներ է ունենալու։ Նոր հիմնվող այգում դեռ ոռոգման համակարգ չկա, առայժմ ջրում են ջրցան մեքենաներով:

Գյումրիում կանաչապատ տարածքները պակաս են գրեթե 5 անգամ։ Այդ պակասն այս տարի որոշակի ծավալով  լրացվելու է։ Նախատեսված է տնկել 3000-ից ավելի նոր ծառատեսակ, 20 հազար ծաղիկ ու թուփ։

Կենտրոնական փողոցներում  մի քանի օրից կտնկվեն նոր ծաղկածառեր, որոնք հարմարեցված են տեղի բնակլիմայական պայմաններին։ Նոր տնկիներ նորից են բերել ու փորձում են աճեցնել, բայց  հաճախ չի ստացվում։ Կոմունալ ծառայության պատասխանատուին զայրացնում է որոշ մարդկանց պահվածքը, կանաչապատ գոտիներից հանում-տանում եմ  դեռ հողին չհարմարված ծաղկատեսակների  տնկիները․

«Մուշ թաղամասում մենք վարդ տեսակի ծառեր էինք տնկել, նայում ենք՝ արդեն 20-30 հատ հեռացրել են, չկա։ Խնդրել ենք, հայտարարել, որ հարգելի քաղաքացիներ, եթե ձեզ անհրաժեշտ է ծառ-ծաղիկ, եկեք խնդրեք, կտրամադրենք, քան թե եղածը վերցնեք կամ գողանաք։ Դա ճիշտ չէ, վերջը էս քաղաքի ծառն էլ, ծաղիկն էլ մեր բոլորինն է»։

Հսկողություն սահմանել բոլոր տարածքներում չեն կարող, կենտրոնական հատվածներում ինչ-որ չափով կարգավորել են, այս հարցում օգնում են տեսախցիկները, ինչը թաղամասերում դեռ չի ստացվում։ Մյուս խնդիրն էլ տնկիների կպչողականություն ապահովելն է։ Այն արդյունավետ կարող է լինել միայն կանաչ գոտիներում ոռոգման համակարգ անցկացնելու դեպքում։ Որոշ տարածքներում այդպիսի աշխատանքներ արդեն կատարվել են։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։