Գյումրիում բացվել է ինքնատիպ գրքերի ցուցադրություն

Այսօր Հայաստանի գեղարվեստի պետական ակադեմիայի Գյումրիի մասնաճյուղում կազմակերպվել էր գրքերի յուրօրինակ ցուցադրություն, որտեղ, ձեռակերտ գրքերից բացի, ներկայացված էին տարբեր տեխնոլոգիաներով և մոտեցումներով պատրաստված, կրկնօրինակված գրքեր։

Ժամանակակից թվային տեխնոլոգիաների ու համացանցի ներխուժումը մեր իրականություն ինչ-որ չափով փոխեց վերաբերմունքը գրքի հանդեպ, ինչ-որ չափով ընթերցանությունը մղվեց երկրորդ պլան, անգամ գրախանութներում հայտնվեցին լազերային պատկերազարդումներով ժամանակակից գրքեր, բայց միևնույն է՝ գրքի թղթային տարբերակը մնաց անհամեմատելի կրթական արժեք։

«Մի պահ կար, որ մեր հասարակությունը հեռացել էր գիրք կարդալուց, անընդհատ մեզ համեմատում էին, որ սովետական ժամանակաշրջանում ավելի շատ էին հայերը գիրք կարդում, բայց ես հիմա տեսնում եմ, որ հիմիկվա երիտասարդությունը էլի գիրք է կարդում, գրադարաններում հաճախ կարելի է նրանց տեսնել»,- ասում է  ՀԳՊԱ Գյումրիի մասնաճյուղի տնօրեն Վահագն Ղուկասյանը։

Արվեստագետներն ու նկարիչները գրքի նյութեղեն ու բովանդակային արժեքին մեկ այլ բնութագիր են ավելացրել։ Դեռ միջնադարում մանրանկարիչները անկրկնելի զարդանախշերով էին պատկերազարդում հայկական  մագաղաթե գրքերը, որոնք առ այսօր համարվում են ձեռակերտ գրքերի յուրօրինակ հուշարձաններ։ Այդ ժամանակներում  պատրաստում էին նաև փոքր չափսերի գրքեր, որոնց կրկնօրինակները ստեղծել էին երիտասարդները՝ կիրառելով նոր տեխնոլոգիաներ ու միջոցներ։

«Էջերը ես կոֆեի օգնությամբ եմ արել, այսինքն՝ այդպես եմ ներկել, օգտագործել եմ գրիչ։ Դժվարությունը փոքրիկ գրքի մեջ մանր տառերով  գրելն էր ու նկարազարդելը, կիրառել եմ փոքրիկ վրձին»,- իր գրքի պատրաստման  տեխնոլոգիան է ներկայացրել ՀԳՊԱ-ի Գյումրիի մասնաճյուղի ուսանողուհի Հայկուհի Մելքոնյանը։

Լուցկու տուփերից պատրաստված գրքի մանրակերտից բացի, նախասրահում ցուցադրվում էին նաև այլ տեխնոլոգիաներով ստեղծված գրքեր, որոնք առանձնանում էին իրենց արտաքին տեսքով, նաև բովանդակությամբ։

«Հեղինակը շոլկոգրաֆիայի տեխնոլոգիայով է պատկերել Աստվածաշնչից վերցված հատվածները, հնարավոր է տեքստը կարդալ միայն հայելու միջոցով, ոնց որ Լեոնարդո դա Վինչին էր գրել այնպես, որ կարդում էին մենակ հայելու միջոցով»,- ասում է ՀԳՊԱ-ի Գյումրիի մասնաճյուղի դասախոս Գոհար Սմոյանը։

Հայրենական մեծ պատերազմի տարիներին ռազմաճակատից գրված ու խնամքով պահված նամակները, ուսանողուհիներից մեկի մտահղացմամբ, դարձել էին գիրք։ Կամավոր ռազմաճակատ մեկնած ու չվերադարձած զինվորի նամակներն ու թերթերը ազգականների շնորհիվ պահպանվել ու հասել էին նրան։

«Ներկայացված են բոլոր այն նամակները, որոնք ինքը գրել է 1940-1942 թվականներին։ Նամակներից բացի, այստեղ ներկայացված են իր բանաստեղծությունները։ Շատ հետաքրքիր է, որ այն, ինչ իր հետ կատարվել է այդ ընթացքում, ներկայացրել է այս նամակների միջոցով»,- պատմում է ՀԳՊԱ-ի Գյումրիի մասնաճյուղի ուսանողուհի  Էմմա Հարությունյանը։

Հայերենով, ռուսերենով և գերմաներենով նամակներից բացի, գրքում է հավաքել արժեքավոր նամականիշներն ու հետաքրքիր փաստերը Հայրենական մեծ պատերազմի մասին։ Գրքերի ու ձեռքի աշխատանքների ցուցադրությունը կշրջի Հայաստանի այլ մարզերում։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։