Ցեղասպանության 106-րդ տարելիցին նվիրված միջոցառումներ են անցկացվել Շիրակի մարզում

Հայոց ցեղասպանության 106-րդ տարելիցին նվիրված հիշատակի միջոցառումները Շիրակի մարզում ավանդաբար մեկնարկել են Գյումրիի Սուրբ Յոթ Վերք եկեղեցում, որտեղ 1 ու կես մլն սրբադասված նահատակների ոգեկոչման սուրբ պատարագ է մատուցվել: Այնուհետև մարզային, քաղաքային իշխանությունների ներկայացուցիչները, Գյումրիում տեղակայված ռուսական ռազմաբազայի ու սահմանապահ ջոկատի հրամանատարությունը, ինչպես նաև դիվանագիտական կորպուսի ներկայացուցիչները ծաղիկներ են խոնարհել«Վերածնունդ» կոչվող հուշարձանին:

Հոգեհանգստի կարգ Շիրակի թեմի առաջնորդը կատարեց Գյումրիի Բագրատունյաց պուրակում Ցեղասպանության 100 ամյակին տեղադրված «Վերածնունդ» հուշարձանի մոտ:

«Վերածնունդ» հուշարձանի հեղինակը քանդակագործ Ֆրիդ Սողոյանն է: Ձեռքերում պահված խաչը քրիստոնեությունն է,երկու ձեռքերը սփյուռքն ու Հայաստանն են, որ համախմբվել են հավատքի շուրջ ու պահպանում են այն, որպես վերածնվող  կյանքի նոր սկիզբ:

Ջարդի, Հերհերի կամ Հզազի ձորում են  ամեն տարի Շիրակի ու Լոռու մարզերի բնակիչներն իրենց հարգանքի տուրք մատուցում:«Ջարդի ձոր»-ը Հայաստանի տարածքում միակ տեղն է, որտեղ թուրքերի կողմից իրականացվել են հայերի զանգվածային ջարդեր: Այս տարածքում 1918-1921 թվականներին կոտորածի են ենթարկվել Ալեքպոլի և Ղարաքիլիսայի գավառների 51 գյուղերի 12 հազար բնակիչներ: Այս գյուղերում բնակություն էին հաստատել նրանք,որոնք  1915-ից մազապուրծ հասել էին Արևելյան Հայաստան:

«Ալեքպոլի գավառ թուրքական օկուպացիոն բանակը երկու անգամ է մտել՝ 1918 թվականի մայիս-դեկտեմբեր ամիսներին և 1920 թվականի նոյեմբերից մինչև ապրիլի 21-ը: Երկու անգամ էլ տեղի են ունեցել կոտորածներ:Մեծ մասը բաժին է ընկել այս ճանապարհի վրա գտնվող գյուղական բնակավայրերին,որովհետև թուրքական բանակը այստեղով պիտի անցներ Ադրբեջանի տարածք: Պլան կար մշակած,որով պիտի լուծեին պանթուրքական քաղաքականությունը: Մեծ ջարդեր են եղել նաև Աշոցք բնակավայրում՝ Ցողամարգի մոտ:Մինչև հիմա ճշտված չէ, թե ինչքան մարդ է զոհ գնացել այդ կոտորածներին: Կոտորածները եղել են ոչ միայն Արևմտայն Հայաստանում, այլ նաև Արևելյանում, որտեղ զոհերի թիվը 60 հազարից ավելին է»,-Shantnews-ի հետ զրույցում ասել է Շիրակի երկրագիտական թանգարանի տնօրեն Արտաշես Բոյաջյանը:

Տարիներ առաջ Շիրակի երկրագիտական թանգարանը տեղանքում ուսումնասիրություններ կատարելու և ցեղասպանության թանգարան հիմնելու առաջարկ էր ներկայացրել: Առաջարկը գործնական փուլի չի հասել, բայց ուսումնասիրությունների անհրաժեշտությունը մասնագետները շարունակում են կարևորել: Այն հնարավորություն կտա Ջարդի ձորում կոտորածների ենթարկվածների իրական թիվը պարզել:

Մարմաշեն խոշորացված համայնքի պատանիները ջարդի ձոր էին եկել Արցախում զոհված համագյուղացիների լուսանկարներով վերանաշապիկները հագին: Հայոց պատմությունն ամբողջացնելու համար են ընտրել հարգանքի տուրք մատուցելու այս տարբերակը: Նոր սերունդը արժեվորում է անցյալը, գնահատում՝ հայրենիքի համար կյանքը տվածներին ու ձգտում դեպի հաղթանակներ:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։