Սելավաջրերի կառավարման և բնապահպանական ծրագիր Արթիկում․ հեղեղատարները մաքրվել են նախկին քարհանքի թափոններից

Արթիկի Մողրովենց ու Բմբուլենց ձորեր կոչվող հեղեղատարների մաքրման ու պատնեշների կառուցման աշխատանքները մասնակի կատարված են։ Քաղաքի միջով անցնող հեղեղատարներն ամբողջությամբ լցված էին Արթիկի նախկին քարհանքի թափոններով, որոնք 2016 թվականին տեղի ունեցած ուժեղ ջրհեղեղի հետևանքով ջրի հետ հոսեցին դեպի քաղաք։ Պետական միջոցներով, բայց անավարտ ու մասնակի աշխատանքներ էին կատարվել, հետևանքները լիարժեք վերացված չէին: Մեկ տարի առաջ համայնքը ՄԱԿ-ի «Հարմարվողականության հիմնադրամ»-ի ֆինանսավորմամբ «Արթիկ քաղաքի փակված քարհանքի թափոնների և ջրհեղեղների կառավարում» պիլոտային դրամաշնորհային ծրագրով թափոնների մաքրման ու հեղեղատարներում պատնեշների կառուցման աշխատանքեր սկսեց: Ծրագիրը Արթիկում միաժամանակ բանապահպանական մի քանի խնդիր է լուծում:

Երկու հեղեղատարների միացման հատվածումժամանակին կամուրջ է եղել, որի տակով են հոսել սելավաջրերը: Քարհանքերի թափոնները կամրջի երկու կողմերը խցանել էին ու ջուրը գնալու տեղ չուներ: Շինարարը կամրջի խցանված հատվածները  մաքրել է։

Արթիկի երկու հեղեղատարներում քարհանքի հսկայական թափոնները հատուկ տեխնիկայի միջոցով մանրացվել ու հեռացվել են: Մաքրման աշխատանքներից հետո շինարարն անցել է հեղեղատարներում պաշտպանիչ պատնեշների կառուցմանը, որոնք ըստ նախագծի պետք է լինեին բետոնյա, բայց նախագծային փոփոխություններ են կատարվել։ Հեղեղատարների կրկնակի ուսումնասիրություն է կատարվել,  որոշվել է ոչ թե բետոնյա, այլ մետաղական ցանցերի մեջ Արթիկ տուֆի շարվածքներով գաբիոններ կառուցել:

Գաբիոնները պատնեշ են ծառայելու, այսինքն, երբ նորից քարաթափումներ լինեն, դրանք հեղեղատարներում չեն հայտնվի: Բացի դրանից, գաբիոնային պատնեշները նաև սելավաջրերի կառավարման գործառույթ ունեն, նպաստում են, որ ջուրը դանդաղ հոսքով Արթիկ հասնի: Բանապահպանական ծրագիրը մեկ այլ բաղադրիչ էլ ունի: Նույն տարածքում նախատեսված է անտառածածկույթ ստեղծել: Տարածքն ընտրել են, հողաշերտը հարթեցրել են ու հաշվարկներ կատարել, թե ինչքան տարածքում ու քանի ծառ  է տնկվելու:

«Արթիկ քաղաքում հիմնվելու է 30 հա անտառ-այգի և 10 հա հանգստի գոտի, որտեղ ավելի քան 24 հազար ծառաթփատեսակներ կտնկվեն։ Ես վստահ եմ, որ կունենանք գեղեցիկ հանգստի գոտի ու անտառ։ Նախագծային փոփոխությունները, որոնք կատարվում են, դրանք մենք խորհրդակցում ենք մեր մասնագետների հետ, հիմնական փոփոխությունները կախված է ինժեներական լուծումների հետ, որոնք շինարարության տեխնիկական հսկողների խորհրդով ավելի էֆեկտիվ լուծումներ են առաջարկում։ Ծրագիրը կարևոր է, քանի որ մենք տեսանք, թե 2016-ին Արթիկում ինչպիսի ջրհեղեղ եղավ, կարծում ենք, որ այն ինչ արվում է կկանխարգելի նման երևույթների կրկնվելը քաղաքում»,- SHANTNEWS.am-ի հետ զրույցում ասել է ՀՀ Շրջակա միջավայրի նախարարության բնապահպանական ԾԻԳ տնօրենի ժամանակավոր պաշտոնակատար Արմեն Եսոյանը։

Նույն ծրագրով Արթիկի տարածաշրջանի ևս 3 գյուղերում՝ Վարդաքարում, Հառիճում և Նահապետավանում է անտառային ծածկույթ հիմնվելու: Նոր անտառները բնակլիմայական պայմանների փոփոխության ու մասնավորապես գյուղերը քամիներից պաշտպանելու նպատակ ունեն: Վարդաքարում  ծառատունկն արդեն կատարված է, մյուս երկու գյուղերում և Արթիկում անտառային շերտի հիմնման աշխատանքները կսկսվեն հաջորդ տարի:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։