Առափիի սողանքային գոտու վիճակի գնահատում ուսումնավարժանքի նախապատրաստման շրջանակներում․ Շիրակի մարզային փրկարարական վարչությունը ներկայացրել է միջոցառումների պլան

Այսօր՝ ապրիլի 21-ին, ԱԻՆ Շիրակի մարզային փրկարարական վարչությունը պաշտպանական ուսումնավարժանքի նախապատրաստական միջոցառումների քննարկում է անցկացրել։ Ուշադրության կենտրոնում մարզի սողանքային վտանգավոր գոտին էր՝ Առափի գյուղը։ Ուսումնավարժանքի պլանը կամ պայմանական գործողությունները, ինչպես մյուս արտակարգ իրավիճակների դեպքում է, հայտնի են, բայց իրականում ի՞նչ վիճակում է գտնվում Առափիի սողանքային գոտին մինչ ուսումնավարժանքի պլանի քննարկումը, SHANTNEWS-ի հետ զրույցում համայնքի ղեկավարը և ՃԿԿ պետն են ներկայացրել։

«Առափիի սողանքային գոտին համեմատաբար հանգիստ է։ Ընդհանրապես սողանքային երևույթները նկատվում են, երբ տեղումներ են լինում, ստորգետնյա ջրերի մակարդակն է բարձրանում, բայց հիմա արտառոց երևույթներ չեն նկատվում»,- նշել է Առափիի գյուղապետ Ալբերտ Այվազյանը։

«Սողանքի հետ կապված թույլ փոփոխություններ են արձանագրվել, վերջին շրջանում դրանք բավականին փոքր են ու խոշոր երևույթներ չենք ունեցել»,- ասել է Շիրակի մարզի ՃԿԿ պետ Մարտին Մկոյանը։

Ախուրյան գետին մոտ կառուցված գյուղի բնակելի տարածքի 121 հեկտարի զգալի մասը գրունտային ջրերն են ողողում։ Սողանքի ռիսկային գոտում 120 տուն է գտնվում։ Վերջին 4 տարվա ընթացքում սողանքային մարմնի հոսքի հարաբերական հանգստություն է, սա էլ կապում են 2017 թվականին գյուղում ճապոնական կառավարության աջակցությամբ ջրահեռացման համակարգ անցկացնելու հետ։

Տեղադրված սարքերն ամեն օր գրանցում են սողանքների շարժը, իսկ սարքի հաղորդած ազդանշաններն անմիջապես արձանագրվում են ճգնաժամային կառավարման կենտրոնում, բայց երբեմն սարքի գրանցած տեղաշարժը միայն սողանքային երևույթի ազդանշանը չէ։

«Արոտների ժամանակ անասունները մտնում են այն տարածք, որտեղ սարքերն են տեղադրված, ու սարքը շարժում է հասկանում, այսինքն՝ սխալ ինֆորմացիա է գնում սողանքի մասին, բայց մեզ մոտ ԱԻՆ մասնագետներ կան, արագ արձագանքում են։ Սարքերն արձանագրում են թեթև շարժումներն ու շեղումները»,- ասել է Ալբերտ Այվազյանը։

Սողանքային մարմնի շարժի ակտիվացումը կանխվեց նաև տարածքում դրենաժների կառուցման արդյունքում։ Գրունտային ջրերը այժմ կուտակվում են տների մոտ կառուցված փոքր ջրամբարում։ Սողանքային գոտում համեմատաբար պասիվ վիճակը չի նշանակում, որ վտանգը գյուղում անցած է։

Ի՞նչ արտակարգ միջոցառումներ են անհրաժեշտ հնարավոր վտանգների դեպքում։ Շիրակի մարզպետարանում ուսումնավարժանքի պլանային քննարկմանը զեկուցողները ներկայացրել են գործողությունների պլանը։ Առաջնային անելիքները որոնք են լինելու, եթե  սողանքի հետևանքով տուժի դպրոցը։

«Հաշվի առնելով, որ սողանքի հետևանքով ճաքեր են առաջացել դպրոցի պատերին, որոշում ենք կայացնում դպրոցի աշակերտների դասապատրաստումը տեղափոխել հարևան գյուղի՝ Ոսկեհասկի դպրոց։ Կհոգանք նաև աշակերտների տեղափոխման հարցը»,- զեկուցել է Շիրակի մարզպետարանի կրթության, մշակույթի և սպորտի վարչության պետը։

Պլանային նախապատրաստական ուսումնավարժանքը, չեն բացառում, որ գործնականում կիրառեն հենց գյուղի սողանքային հատվածում և բնակիչների մասնակցությամբ։ Առայժմ վարժանքը վերաբերում է մարզային, համայնքային կառույցների ղեկավարների արագ արձագանքման ու առաջնային անելիքների պլանների մշակմանը:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։