Շիրակի մարզում հացահատիկի ցանքերն ավելացել են

Շիրակի մարզի ցածրադիր տարածաշրջաններում՝ Ախուրյանում և Անիում սկսվել են գյուղատնտեսական աշխատանքները: Գարնանացան գարի ու ցորեն են ցանում, հողը պարարտացնում բանջարեղենի մշակության համար: Անցած աշնանը մարզում 14 հազար հեկտար աշնանացան է մշակվել: Ակնկալվում է, որ գարնանացանի ցանքերը ևս, անցած տարվա համեմատ, ավելանալու են: Անցած տարի աշնանը շուրջ 600 հեկտար հողերը, որոնք խոտհարքների տակ են եղել, վարել են ու այս տարի մշակելու են:

Գյուղատնտեսական տարին Շիրակի մարզում փոքր-ինչ ուշ է սկսվել՝ եղանակները թույլ չէին տալիս ավելի շուտ վարուցանքի: Գարնանացանն առաջինն է, որին հաջորդելու է բանջարեղենի մշակությունը: Շղթայաբար բոլոր մշակաբույսներն այս տարի հողում ավելի ուշ են հայտնվում:

Ազատանի խոշոր հողատերերն ու ֆերմերները վաղուց գյուղի սահմաններից դուրս են եկել ու վարձակալական հողակտորներ են մշակում մարզի ցածրադիր հատվածներում: Կառնուտի, Ախուրյանի, Շիրակի ու Արևիկի հողերը ամենաբարենպաստն են հացահատիկի մշակության համար: Ընդհանուր այս տարի Շիրակի մարզում ցորենի ու գարու ցանքերն ավելացել են:

Մոտ 600 հեկտարը, որը նախորդ տարիներին խոտհարք է եղել, գյուղացիները վարել են ու պատրաստվում են ցանք կատարել:14 հազար հեկտար աշնանացան է մարզում կատարվել: Ամենաշատը Շիրակի մարզը 20 հազար հեկտար ցանքեր է ունեցել: Այս ցուցանիշը վերջին տարիներին նվազել էր, հիմա նորից աճ է գրանցվում, բայց էլի մարզի անմշակ հողերը շատ են:

«Շիրակի մարզում արտադրվում է տարեկան 60-80 հազար տոննա հացահատիկ, որը ՀՀ-ի պահանջարկի 20-30 %-ն է կազմում: Իսկ հնարավորություններ Շիրակի մարզում շատ կան: Մենք ունենք 78 հազար հեկտար վարելահողեր, որից 48 հազարն է մշակվում: Այս տարի շատ վարելահողեր, որտեղ խոտհարքներ էին ձևավորվել, վարել են ու մշակելու են: Նախորդ մի քանի տարիների ընթացքում խոտի բերքը ցածր էր և ֆերմերները տեսան, որ ավելի շատ բերք և եկամուտ ստացվում է հողը մշակելով, վարելով, ցանելով, քան թե խոտհարք ունենալով»,- Shantnews-ին ասել է Շիրակի մարզպետարանի գյուղատնտեսության բաժնի պետ Անդրանիկ Նալբանդյանը:

Հացահատիկի ցանքերի ավելացմանը նպաստել են նաև պետական աջակցության ծրագրերը: Մասնավորապես, գարնանացանի համար գարու և ցորենի սերմացուներ են տրամադրվում կառավարության 50 տոկոս սուբսիդավորմամբ: Մարզի գյուղատնտեսները օգտվել են նաև անտոկոս վարկավորումից: Ծրագիրն այս տարի ևս շարունակվում է:

«0 %-ով տրամադրվում է 3-15 մլն դրամ գումար: Ծրագիրը շարունակվում է նաև 2021 թվականին: Նույն ծրագրով 3-ից 30 մլն դրամ տրամադրվում է խոզաբուծության, ոչխարաբուծության, թռչնաբուծության, ինչպես նաև այգիների հիմնման համար: Տրամադրվում է 50 մլն դրամ անասնապահության համար: Շիրակի մարզում հետաքրքրվողներ և վարկերից օգտվողներ շատ կան»,- ասել է Անդրանիկ Նալբանդյանը:

Միայն անցած տարի վարկավորումից Շիրակի մարզում 3200 գյուղացի է օգտվել: Վարկավորման չափը կազմել է 4 մլրդ 600 մլն դրամ: Վարկի վերադարձելիության երաշխիքը բանկի համար գրավի առարկան է, իսկ գյուղացու համար՝ բերքն ու անասնապահությունից ստացված արդյունքը:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։