Ունեցվածքի գույքագրումը չափազանց կարևոր է. Կարեն Կարապետյան

Կառավարությունում տեղի ունեցած խորհրդակցության ընթացքում վարչապետին են ներկայացվել կառավարությանն առընթեր կադաստրի պետական կոմիտեի՝ 2017թ. գերակա խնդիրների կատարման և միջոցառումների իրականացման արդյունքները, 2018թ. անելիքները:
Կարեն Կարապետյանը կարևորել է գյուղատնտեսության համար հողերի հաշվառումը.

Մենք չօգտագործվող հողի խնդրին պետք է լուծում տանք: Այս պահին Գյուղատնտեսության նախարարությունը մտածում է՝ ինչպես անել, ակտիվացնել այն սեփականատերերին, որոնք հողը վերցրել են՝ չեն օգտագործում: Ինչպես նաև պետք է քննարկենք չաշխատող գույքի ակտիվացնելու հարցը: Այդ առումով՝ ունեցվածքի գույքագրումը չափազանց կարևոր է:

 Կադաստրի պետական կոմիտեի նախագահ Մարտին Սարգսյանը զեկուցել է, որ այդ հարցի շուրջ արդեն աշխատում են Գյուղատնտեսության նախարարության հետ: 

Այնուհետև Մարտին Սարգսյանը զեկուցել է, որ նախորդ տարվա ընթացքում օպտիմալացումների արդյունքում տնտեսվել է 378 մլն դրամ: Որպես պետական տուրք՝ պետական բյուջե է մուտքագրվել 800 մլն դրամ: Մատուցվող ծառայությունները պատվիրակվել են պետական իշխանության մարմինների սպասարկման գրասենյակների գործառույթներ իրականացնող օպերատորներին, և այդ առումով քաղաքացիներին մատուցվող ծառայությունների հետ կապված որևէ խնդիր չի արձանագրվել: 
2017-ի ընթացքում կադաստրի համակարգի տարածքային ստորաբաժանումներ ներկայացված դիմումների քանակն աճել է ավելի քան 20 տոկոսով՝ կազմելով 402 հազար դիմում, կոմիտեի աշխատակազմ էլեկտրոնային եղանակով մուտքագրված դիմումների թիվը կազմել է ավելի քան 11 հազար, ինչն ավելի է 15 տոկոսով: Էլեկտրոնային փաստաթղթաշրջանառության համակարգի միջոցով քաղաքացին հնարավորություն է ստացել դիմել և առնցանց ստանալ անհրաժեշտ փաստաթուղը: Նախորդ տարվա ընթացքում հանրապետությունում անշարժ գույքի օտարման գործարքների թիվը կազմել է 52 հազար 274, ինչը 2016-ի համեմատ ավելի է 11,8 տոկոսով, իսկ անշարժ գույքի վարձակալության գործարքների թիվը հաշվետու ժամանակահատվածում աճել է 22,4 տոկոսով: Կոմիտեի նախագահն ընդգծել է, որ 2018-ի ընթացքում հանրապետությունում անշարժ գույքի շուկայի գնահատումն իրականացվելու է նորովի, ըստ տարածքային չափանիշների: 

Անդրադառնալով իրականացվող բարեփոխումներին՝ Մարտին Սարգսյանը զեկուցել է անշարժ գույքի վերաբերյալ ամբողջական և ճշգրիտ տվյալների բազայի ձևավորման, առցանց էլեկտրոնային ծառայությունների ավելացման, մատուցվող ծառայությունների ընդլայնման ու սպասարկման որակի բարելավման ուղղությամբ իրականացված և առաջիկայում նախատեսվող քայլերը: 

Մատուցվող ծառայությունների ընդլայնման և սպասարկման որակի հետագա բարելավման նպատակով քննարկվում են ՀՀ հյուպատոսական հիմնարկներում կադաստրի սպասարկման գրասենյակներին բնորոշ գործառույթների իրականացման համար անհրաժեշտ միջոցների ստեղծման հնարավորությունները, ինչն էապես կդյուրացնի արտերկրում գտնվող մեր հայրենակիցների կողմից գործարքների իրականացումն ու ծառայությունների ստացումը: Արդեն իսկ Արցախի Հանրապետությունում և Սանկտ Պետերբուրգում ներդրվել է համապատասխան պիլոտային ծրագիր:
Կարեն Կարապետյանը կարևորել է ներկայացված ծրագրերի իրականացումը՝ հատկապես ընդգծելով գյուղատնտեսական նշանակության և արդեն իսկ օգտագործվող հողատարածքների հաշվառման, առկա վիճակագրական տվյալների ճշգրտման, կադաստրի համակարգի թվայնացման աշխատանքները: