Գյումրիի թատրոնի ճեմասրահում ցուցադրվում են հին ու նոր ներկայացումների տասնյակ մանրակերտերը

Մարտի 27-ը թատրոնի միջազգային օրն է և այն առիթ է նորից ու նորից շեշտելու, որ հայկական թատրոնը  աշխարհում ամենահինն է և հայկական մշակույթի  առանցքային դերակատարը։ Իսկ  գյումրեցիների սերը թատրոնի նկատմամբ չափվում է հայտնի դարձած  համեմատությամբ, որ  գյումրեցին մեկ եկեղեցում է գլխարկը հանել, մեկ էլ՝ թատրոնում։

Հայտնի ու տաղանդավոր դերասաններ , ռեժիսորներ են աշխատել Գյումրիի դրամատիկական թատրոնում, բեմ են բարձրացել ներկայացումներ, որոնք մեծ ճանաչում են բերել քաղաքի թատրոնին։Դրամատիկականի  արխիվում են պահվում  թատրոնի  խաղացանկի հին ու նոր ներկայացումների բեմական ձևավորումների տասնյակ մանրակերտեր, որոնցից մի քանիսն արժանացել են նաև մրցանակների։

Թատրոնի ճեմասրահում, ապակյա ցուցափեղկերի տակ ցուցադրվող  մանրակերտերը  տարիների պատմություն ունեն, դրանք դարձել են թանգարանային նմուշներ, որոնք աճեմյանական բեմի  մի քանի տասնյակ անգամ փոքր  տարբերակներն են։

«Ռեժիսորն ու բեմանկարիչը գաղափարային համահեղինակներ են, որոնք միասին գրեթե միշտ ստեղծում են ներկայացումը։Ինչից է սկսվում այդ նկարչական փուլը․ սկսվում է նախ էսքիզներից, երբ դու բեմական տարածության մեջ տեղավորում ես քո դեկորատիվ ձևավորումը։ Երկրորդ փուլը, երբ  այդ էսքիզները կենդանանում են ու ստեղծվում է մանրակերտը»,-բեմանկարչական աշխատանքի մանրամասներն է Shantnews.am-ին  ներկայացրել Գյումրիի Վ․Աճեմյանի անվան դրամատիկական թատրոնի հագուստի նկարիչ, բեմանկարիչ Լուսինե Խաչատրյանը։

Նույն բեմն է,  բայց տարբեր ներկայացումների համար  դեկորներ ու աքսեսուարներ ստեղծելը  բեմանկարիչներից պահանջում է մանրակրկիտ ու  երկարատև աշխատանք: Բեմանկարչի ամենակարևոր խնդիրը հանդիսատեսի համար համոզիչ ու տրամադրող միջավայր ստեղծելն է,այլ կերպ ասած  պիեսի ժամանակաշրջանին բնորոշ պատմական տարածություն։

«Եթե խոսքը պատմական ներկայացման մասին է, աշխատանքը սկսվում նյութի, ժամանակաշրջանի  ու կենցաղի  ուսումնասիրությունից։ Ներկայացման մեջ փոխվում է միտքը, մենք բեմադրել ենք Մխիթար Գոշ, Վարդան Այգեկցի առակները։ Ուզում է լինի 2021 թվականը, ուզում է լինի 2050 թվականը` միտքը, միջավայրը մնում է նույնը, փոխվում է  միայն  մոտեցումը»,-ասում է Գյումրիի Վ․Աճեմյանի անվան դրամատիկական թատրոնի տնօրեն և ռեժիսոր Լյուդվիգ Հարությունյանը։

Գյումրիի թատրոնի ներկայացումների համար ստեղծված բեմանկարչական  ձևավորումներից մի քանիսն արժանացել են նաև մրցանակների, որոնց մանրակերտերը  թատրոնի թանգարանի ոսկե ֆոնդն են համարվում։

Ամենահինը Ջոկոմեդի  «Ոճրագործի ընտանիքը» ներկայացման  մանրակերտն է։ Նկարչական ձևավորման հեղինակը հայտնի բեմանկարիչ Եվգենի Սաֆրոնովն է։ Նա Գյումրիի թատրոնում աշխատել է 1985-88 թվականներին, երբ թատրոնի գլխավոր ռեժիսորն էր ժողովրդական արտիստ Խորեն Աբրահամյանը։

«Այն մեր թատրոնի լավագույն ներկայացումների շարքին  է պատկանում, որտեղ և՛ բեմադրությունը, և՛ թարգմանությունը  Խորեն Աբրահամյանինն է։ Շատ կարևոր է նաև այն փաստը, որ ներկայացման գլխավոր՝ Կորադոյի դերում   խաղացել է մեծանուն դերասան Խորեն Աբրահամյանը, և իր հրավերով է Եվգենի Սաֆրոնովը  ստանձնել ներկայացման բեմանկարչի պարտասխանատու աշխատանքը»,- պատմում է Գյումրիի Վ․Աճեմյանի անվան դրամատիկական թատրոնի գրական մասի ղեկավար Մկրտիչ Հովհաննիսյանը։

Բեմանկարիչների ստեղծած բոլոր մանրակերտերը կյանք ու շունչ են ստանում թատրոնի արհեստանոցում: Փորձառու վարպետները  պատրաստում են  բոլոր դեկորները, որոնք ամբողջական տեսք են ստանում  բեմում։ Հիմա վարպետները  զբաղված են թատրոնի նոր ներկայացման մանրակերտի վերարտադրմամբ:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։